ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިޙުގެ ރަސްމީ ގެކޮޅަކީ މުލީއާގެ ކަމުގައި ހަމަޖައްސައިފިއެވެ.
ރައީސް އޮފީހުން މިރޭ ބުނީ ރައީސުލްޖުމްހޫރިއްޔާ ދިރިއުޅުއްވާ ރަސްމީ ގެކޮޅަކީ "މުލީއާގެ" ކަމަށާއި، ރައީސުލްޖުމްހޫރިއްޔާގެ ނައިބު ދިރިއުޅުއްވާ ރަސްމީ ގެކޮޅަކީ "ހިލާލީގެ" ކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙް ހަމަޖައްސަވައިފައިވާ ކަމަށެވެ.
މީގެ 104 އަހަރުކުރިން އައްސުލްޠާން މުހައްމަދު ޝަމްސުއްދީންގެ ވެރިކަމުގައި ހަދާފައިވާ މުލީއާގެއަކީ ރައީސް ޞާލިޙު ދިރިއުޅުއްވާ ރަސްމީ ގެކޮޅު ކަމުގައި ހަމަޖެއްސެވިއިރު އެގެކޮޅަށް އަދި އެމަނިކުފާނު ބަދަލުވި ކަމެއް އެނގިފައެއްނުވެއެވެ. ރައީސް ޞާލިޙާއި އެމަނިކުފާނުގެ ޢާއިލާ މުލީއާގެއަށް ބަދަލުވުމުގެ ކުރިން މުލީއާގެ މަރާމާތު ކުރުމުގެ މަސައްކަތްތަކެއްވެސް ދަނީ ކުރަމުންނެވެ.
ނާއިބު ރައީސް ފައިޞަލް ދިރިއުޅުއްވުމަށް ހަމަޖެއްސެވި ރަސްމީ ގެކޮޅަކީ ކުރީގެ ރައީސް ޢަބްދުﷲ ޔާމީނާއި އެމަނިކުފާނުގެ ޢާއިލާ ދިރިއުޅުއްވި ގެކޮޅެވެ.
ރައީސް ޞާލިޙު ދިރިއުޅުއްވާ ގެކޮޅު ކަމަށްވާ މުލީއާގެއަކީ ކުރީގެ ރައީސް މުޙައްމަދު ނަޝީދުވެސް ދިރިއުޅުއްވި ގެކޮޅެވެ. އަދި 1994 ވަނަ އަހަރު ތީމުގޭ މިހާރު ހުރިގޮތަށް އިމާރާތްކޮށް ނިމެންދެން ކުރީގެ ރައީސް މަޢުމޫން ޢަބްދުލްޤައްޔޫމްވެސް މުލީއާގޭގައި ވަނީ ދިރިއުޅުއްވާފައެވެ.