ހިލޭ އެހީގެ ގޮތުގައި އެއް ބިލިއަނަށްވުރެ ގިނަ ރުފިޔާ އަންނަ އަހަރު ލިބޭނެ ކަމަށް ލަފާކޮށްފިއެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ 29 ބިލިއަން ރުފިޔާގެ ބަޖެޓުގައި ރާއްޖޭގެ ފިޒިކަލް ޙާލަތާއި ތަޞައްވަރު ބަޔާންކޮށްފައިވާ ބާބުގައި ބުނެފައިވަނީ އަންނަ އަހަރަށް ލަފާކުރެވޭ ޢާމްދަނީގެ ތެރެއިން ބޭރުގެ ހިލޭ އެހީގެ ގޮތުގައި 1053 މިލިއަން ރުފިޔާ ލިބޭނެކަމަށް ލަފާކުރެވޭ ކަމަށެވެ.
ހިލޭ އެހީގެ ގޮތުގައި މަޝްރޫއުތައް ހިންގުމަށް 713.7 މިލިއަން ރުފިޔާ އަދި ފައިސާއިން 339.2 މިލިއަން ރުފިޔާ ލިބޭނެ ކަމަށް ވަނީ ލަފާކޮށްފައެވެ.
ބަޖެޓުގައި ބުނެފައިވާ ގޮތުގައި 335.5 މިލިއަން ރުފިޔާ އަކީ މިހާރުވެސް ހިލޭ އެހީގެ ދަށުން ހިންގާ މަޝްރޫޢުތަކަށް ލިބޭ ފައިސާއެވެ. އަދި 320.2 މިލިއަން ރުފިޔާ އަކީ ހިލޭ އެހީ ހޯދައިގެން ކުރިއަށް ގެންދިއުމަށް ހަމަޖެހިފައިވާ މަޝްރޫޢުތަކަށް ލިބޭނެ ކަމަށް ލަފާކޮށްފައިވާ ފައިސާ ކަމަށްވެސް އަންނަ އަަހަރަށް ލަފާކޮށް މަޖިލީހަށް ހުށަހަޅާފައިވާ ބަޖެޓުގައި ވަނީ ބުނެފައެވެ.
ބަޖެޓުގައި ބުނެފައިވާ ގޮތުގައި ހިލޭ އެހީގެ ތެރެއިން 308.4 މިލިއަން ރުފިޔާއަކީ އެކި ޤައުމުތަކާއި ޖަމިއްޔާތަކުން އެހީގެ ގޮތުގައި އިންތިޚާބީ ރައީސްގެ ސަރުކާރުން ހޯދަން ރާވާފައިވާ ފައިސާ ކަމަށެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް 29 ބިލިއަން ރުފިޔާގެ ބަޖެޓެއް ހުށަހަޅާފައިވާއިރު
ބަޖެޓު ހުށަހަޅުއްވަމުން ފިނޭންސް މިނިސްޓަރު އަޙްމަދު މުނައްވަރު ވިދާޅުވީ އަންނަ އަހަރު އިގްތިސާދީ ދުވެލި ހުންނާނެ ކަމަށް ލަފާކުރެވެނީ 6.8 ޕަސެންޓްގައި ކަމަށެވެ.