ޝަރުޢީ ދާއިރާގެ އެއްވެސް އިވެންޓަކަށް ނުވަތަ ޙަރަކާތަކަށް އަދި ޝަރުޢީ އެއްވެސް އަޑުއެހުމަކަށް މީގެފަހުން ރާއްޖެޓީވީ ނުވެއްދުމަށް ސުޕްރީމް ކޯޓުން ނިންމައިފިއެވެ.
ސުޕްރީމް ކޯޓުން މިއަދު ކުރި އިޢުލާނެއްގައި ބުނެފައި ވަނީ މިދިޔަ މަހުގެ 31ވަނަ ދުވަހު ރާއްޖެ ޓީވީން ގެނެސްދީފައިވާ "ފަށާއިރު" ޕްރޮގްރާމް ހުށަހަޅައިދިން ފަރާތްތަކުން އެ ޕްރޮގްރާމްގައި، ޝަރުޢީ ކޯޓުތަކާއި ފަނޑިޔާރުންގެ، އަދި ވަކިން ޚާއްޞަކޮށް ދިވެހިރާއްޖޭގެ ސުޕްރީމް ކޯޓާއި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ޙުރުމަތް ކެނޑޭ އަދި މުޅި ޝަރުޢީ ދާއިރާގެ ކަރާމާތާއި ޤަދަރަށް އުނިކަން ލިބޭ ފަދަ ކޮންޓެންޓް ގެނެސްދީފައިވާކަން ފާހަގަކުރެވިފައިވާ ކަމަށެވެ.
އެހެންކަމުން ރާއްޖެޓީވީގެ އެ ޢަމަލަކީ ކޯޓުގެ ޙުރުމަތް ރައްކާތެރިކުރުމާއިބެހޭ ޤަވާއިދާއި ޙިލާފު ޢަމަލެއް ކަމަށްވެސް އެ އިޢުލާނުގައި ވަނީ ބުނެފައެވެ.
ރާއްޖެޓީވީގެ އެ މައްސަލަ ބަލައި ތަޙުޤީޤުކޮށް މައްސަލައިގެ އިތުރު ގޮތެއް ކަނޑައަޅަންދެން ޝަރުޢީ އެއްވެސް ކޯޓެއްގެ ޝަރީޢަތުގެ އަޑުއެހުންތަކާއި، ޝަރުޢީ ދާއިރާއިން އިންތިޒާމްކުރާ އެއްވެސް ޙަރަކާތެއް ކަވަރ ކުރުމުގެ ފުރުޞަތު ރާއްޖެ ޓީވީ އަށް ނުދިނުމަށް ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ މަޖިލީހުން ވަނީ ނިންމަވާފައިވާ ކަމަށް އެ އިޢުލާނުގައި ވަނީ ބުނެފައެވެ.