ސިނަމާލެ ބްރިޖަކީ ޒަމާނީ ތަރައްޤީއަށް ރާއްޖެކުރާ ދަތުރުގައި މުހިއްމު ކާމިޔާބީއެއް ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ސިނަމާލެ ބްރިޖު ހުޅުވުމުގެ ރަސްމިއްޔާތުގައި މިރޭ ވާހަކަފުޅުދައްކަވަމުން ރައީސް ޢަބްދުﷲ ޔާމީން ވިދާޅުވީ މިއަދު ދިވެހިން މި އިފްތިޙާލު ކުރަނީ ތަރައްޤީއާ ތަމައްދުނުގެ ރަން ޒަމާނެއް ކަމަށެވެ. ރައީސް ޔާމީން ވިދާޅުވީ މީގެ 21 އަހަރުކުރިން ހުޅުމާލެ ތަރައްޤީ ކުރި ހިސާބުން ފެށިގެން ކަނޑު ހުރަސްކޮށް ކޮންމެ ދުވަހަކު އެތައް ދިވެހިންތަކެއް ކުރަމުންދިޔައީ އުނދަގޫ ދަތުރުތަކެއް ކަމަށެވެ.
"އަޅުގަނޑުގެ މަޤުޞަދަކަށް ވީ އެކަން ފަސޭހަކޮށް އެކަން ބަދަލުކޮށްލަން. އެކަން މި ބްރިޖާ އެކު ނިމިގެން ހިނގައްޖެ،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ހުޅުމާލެ ހިއްކަން ފެށިއިރު އޮތް އެންމެ ބޮޑު ގޮންޖެހުމަކަށް ވީ ހުޅުމާލެ އާއި މާލެއާ ދޭތެރޭގައި ދަތުރު ފަތުރު ކުރުން ކަމަށެވެ. އަދި ދޭތެރޭގައި ބްރިޖެއް އަޅަން ޖެހޭކަން އެމަނިކުފާނަށް ވިސްނިވަޑައިގަތް ކަމަށާއި ނަމަވެސް ދިވެހި ދަޢުލަތުގެ މާލިއްޔާގައި އެވަރުގެ ތަނަވަސް ކަމެއް ނެތް ކަމަށް ރައީސް ޔާމީން ވިދާޅުވިއެވެ.
"އެހެންވެ، އަޅުގަނޑު އެކަން ޗައިނާގެ ރައީސަށް ދެންނެވިތާ ތިން އަހަރާ 11 މަސް ދުވަހުގެ ތެރޭގައި މި ވަނީ ބްރިޖް ހަގީގަތަކަށް ވެފައި،" ރައީސް ޔާމީން ވިދާޅުވިއެވެ.
ރައީސް ޔާމީންގެ ވާހަކަފުޅުގައި ވަނީ ބްރިޖުގެ މަސައްކަތުގައި ޗައިނާ ސަރުކާރުން ދިން އެހީތެރި ކަމަށް ޝުކުރު އަދާކުރައްވާފައެވެ. އެމަނިކުފާނު ވިދާޅުވީ ސިނަމާލެ ބްރިޖަކީ ދިވެހިންނަށްވެސް ބޮޑު ޤައުމަކާ އެކު ކަންކަން ކުރެވިދާނެ ކަމުގެ މިސާލެއް ކަމަށެވެ.