ރީ-ރަޖިސްޓްރޭޝަނަށް ޕީޕީއެމްއިން ފުރަމުންދާ ފޯމްތައް އިލެކްޝަންސް ކޮމިޝަނަށް ހުށަހަޅާނެ ކަމަށާއި ނަމަވެސް ފޯމް ހުށަހަޅާނީ ވަރަށް ބޮޑަށް ޔަޤީން ކުރުމަށްފަހު ކަމަށް އެޕާޓީން ބުނެފިއެވެ.
ޕީޕީއެމްއިން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ނާއިބު ރައީސް ޢަބްދުއްރަޙީމް ޢަބްދުﷲ ވިދާޅުވީ ރީ-ރަޖިސްޓްރޭޝަނަށް ޕީޕީއެމްއިން ފުރަމުންދާ ފޯމްތައް އިލެކްޝަންސް ކޮމިޝަނަށް ހުށަނާޅާކަމަށް ބުނެ އިދިކޮޅު ފަރާތްތަކުން ދައްކަމުން ދަނީ އެއްވެސް އަސްލެއް ހުރި ވާހަކަތަކެއް ނޫން ކަމަށެވެ.
ޢަބްދުއްރަޙީމް ވިދާޅުވީ ޕީޕީއެމްއިން ރީ ރަޖިސްޓްރީގެ ގޮތުގައި ފުރަމުންދާ ފޯމްތައް އިލެކްޝަންސް ކޮމިޝަނަށް ހުށަހަޅަމުން އަންނަކަމަށެވެ. ނަމަވެސް އެ ފޯމްތައް ހުށަހަޅަނީ ބަލަންޖެހޭ ވަރަށް ބެލުމަށްފަހު ކަމަށް އޭނާ ވިދާޅުވިއެވެ. އަދި މިހާތަނަށް ފުރާފައިވާ ހުރިހާ ފޯމްތަކެއް އެއްފަހަރާ ހުށަހެޅުމުގެ އެއްވެސް ނިޔަތެއް ނެތް ކަމަށް ޢަބްދުއްރަޙީމް ވިދާޅުވިއެވެ.
ޢަބްދުއްރަޙީމް ވިދާޅުވީ ޕީޕީއެމްއިން ރީރަޖިސްޓްރޭޝަންގެ ފޯމްތައް ފުރަމުންދަނީ ވަކި ފިކުރަކަށް ބެލުމެއް ނެތި ކަމަށެވެ. އަދި ކޮންމެ ފިކުރަކަސް ޕީޕީއެމްގެ އިލްތިމާސަކީ ރަށްވެހިވެފައިވާ ރަށްނޫން އެހެން ރަށެއްގައި ވޯޓުލާނަމަ ރަޖިސްޓްރީވުން ކަމަށް އޭނާ ވިދާޅުވިއެވެ.