ދެހާސް ތިރީސްވަނަ އަހަރުގެ މިނިވަން ދުވަސް އަންނައިރު ރާއްޖޭގައި 18 އަހަރު ފުރިފައިވާ ކޮންމެ ދިވެއްސަކަށް ބޯހިޔާވަހިކަން ލިބި ބޯހިޔާވެހިކަމުގެ މައްސަލައަށް ޙައްލު ލިބިގެންދާނެ ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ރާއްޖޭގެ 53ވަނަ މިނިވަން ދުވަހުގެ މުނާސަބަތުގައި ޖުމްހޫރީ މައިދާނުގައި އޮތް ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ 2030 ވަނައަހަރު އަންނައިރު 18 އަހަރު ފުރިފައިވާ ކޮންމެ ދިވެހި ރައްޔިތަކަށް މަދުވެގެން އެއްހާސް އަކަފޫޓުގެ ބިމެއް ނުވަތަ އެޕާޓުމަންޓެއް ލިބިގެންދާނެ ކަމަށެވެ. ރައީސް ޔާމީން ވަނީ އެހާތަނަށް ރާއްޖޭގައި ހިޔާވަހިކަން ނެތް އެއްވެސް މީހަކު ނުހުންނާނެ ކަމުގެ ފުރިހަމަ ޔަޤީންކަން ދެއްވާފައެވެ.
"ބައިނަލްއަޤްވާމީ ވައިގެ ބަނދަރު ނިމިގެންދާއިރު ކަނޑުގެ ބަނދަރުގެ މަސައްކަތް ފެށިގެންދާނެ ކަމުގެ ޔަޤީންކަން ލިބުމާއި މާލެ-ހުޅުމާލެ ބްރިޖު ނިމޭއިރު މާލެ-ވިލިނގިލި ގުޅީފަޅު އަދި ތިލަފުށީ ބްރިޖުގެ މަސައްކަތް ފެށޭކަމުގެ އުއްމީދު އޮތުމަކީ އަޅުގަނޑުގެ މަސައްކަތަށް ކުރިމަތިކުރުވާ ގޮންޖެހުންތަކާއި ކުރިމަތިލުމުގެ ހިތްވަރު އާލާވާ ކަމެއް،"
ރައީސް ޔާމީންގެ ވާހަކަފުޅުގައި ވިދާޅުވިއެވެ.
ހުޅުމާލޭގެ ދެވަނަ ފިޔަވަހީގައި ބިނާކުރުމަށް އަމާޒުކޮށްފައިވާ އެއްލައްކަ މީހުންގެ ބޯހިޔާވަހިކަމާއި "ވިލިމާލެ 2"ގައި ބިނާކުރުމަށް އަމާޒުކޮށްފައިވާ ތިންލައްކައަށްވުރެ ގިނަ މީހުންގެ ބޯހިޔާވަހިކަމުގެ މަޝްރޫޢު ނިމިގެންދާއިރު ކުރިއަށް އޮތް 10 އަހަރަށް ދިވެހިންނަށް ބޭނުންވާ ހުރިހާ ކަމެއްހެން ފުރިހަމަ ވެގެންދާނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. ރައީސް ޢަބްދުﷲ ޔާމީންގެ ވާހަކަފުޅުގައި ސަރުކާރުން ހިންގާ ކޮންމެ މަޝްރޫޢުއަކުންވެސް ރައްޔިތުންނަށް ދިމާވެފައިވާ ކޮންމެވެސް މައްސަލައަކަށް ޙައްލު ލިބިގެންދާނެކަން ފާހަގަކުރެއްވިއެވެ.
"ތިލަދުއްމަތިން ފެށިގެން އައްޑު އަތޮޅާއި ހަމައަށް ތަރައްޤީއާ ތަމައްދުންގެ ހެޔޮ ބަދަލު ތަޖުރިބާ ނުކުރާ ހަމައެއްވެސް ރައްޔިތަކު ނުހުންނާނެ ކަމަށް އަޅުގަނޑު މި ދަންނަަވަނީ ހިތްހަމަޖެހުމާއިއެކު. ރާއްޖޭގެ އެކި ސަރަޙައްދުތަކުގައި ހިންގާ ތަރައްޤީގެ އެކި މަޝްރޫޢުތަކާއި ރައްޔިތުންގެ ދިރިއުޅަމަށް ގެނެސްދޭ ހެޔޮބަދަލުގެ ސަބަބުން އުއްމީދުގެ ރަން ފަތިހަކަށް އަލިވިލިއްޖެ ކަމަށް އަޅުގަނޑު މި ދަންނަވަނީ އުފަލާއިއެކު،"
ރައީސް ޔާމީން ވިދާޅުވިއެވެ.
"ވިލިމާލެ 2" ގެ ނަމުގައި ބިޔަ މަޝްރޫޢެއް ހިންގަވާނެކަމުގެ އިޝާރާތެއް ރައީސް ދެއްވާފައިވީނަމަވެސް މިރައްމިއްޔާތުގައި އެކަމުގެ ތަފްސީލް ހާމަކުރައްވާފައެއްނުވެއެވެ. މިނިވަންދުވަހުގެ މުނާސަބަތުގައި ބޭއްވި މިޖަލްސާގައި ޝަރަފުވެރިކަމުގެ ޤައުމީ އިނާމު ފަސް ބޭފުޅަކަށް ލިބިވަޑައިގެންފައިވާއިރު ހިތްވަރު ދިނުމުގެ ޤައުމީ އިނާމު 15 ބޭފުޅަކަށް ވަނީ ލިބިވަޑައިގެންފައެވެ.