ފުރަ މާލެއަކީ ކޮންކްރީޓް ޖަންގައްޔެކޭ އަބަދުވެސް މީހުން ބުނެއުޅެއެވެ. މި ކޮންކްރީޓް ޖަންގަލީގައި އަޅުގަނޑުމެން ދިވެހިންގެ އެތައް އާއިލާއެއް ދިރިއުޅެމުންދާއިރު، މީގެ އަހަރުތަކެއް ކުރިއަށް ބަލާލާނަމަ ދަރިން ގޮވައިގެން ހިތްފަސޭހަ ކޮށްލުމަށާއި އެ ދަރިން ހިތްއުފާ ކޮށްލުމަށް ދާނެ އެންމެ އެކަށީގެންވާ ތަނެއް މާލޭގައި ނެތޭ ބުނުމަކުން ދޮގަކަށް ނުވާނެއެވެ.
ހުސް ޖާގަ ކޮޅެއް ހުއްޓަސް އެތަނުގައި ކޮންމެވެސް ޒާތެއްގެ ވޯކްޝޮޕެއް ނުވަތަ ކޮންމެވެސް އެހެން ކަމެއް ކުރާނެއެވެ. ނަމަވެސް މިއަދު އެ ޒަމާން ފަސްދީފިއެވެ. 2013 ވަނަ އަހަރުގެ ރިޔާސީ އިންތިޚާބުގެ ކެމްޕެއިން ރެލީ ތަކުގައި އަދުގެ ރައީސުލްޖުމްހޫރިއްޔާ ޢަބްދުﷲ ޔާމީން ވިދާޅުވީ އެމަނިކުފާނު ރާއްޖޭގެ ވެރިކަމަށް ކުރިމަތިލެއްވީ ރާއްޖޭގެ ބޮޑެތި މައްސަލަތައް ޙައްލު ކުރުމަށް ކަމަށެވެ. އެ ބޮޑެތި މައްސަލަތަކުގެ ތެރެއިން އެންމެ ބޮޑު އެއް މައްސަލައަކަށް ވެފައިވަނީ ޤައުމުގެ އިޖްތިމާޢީ ފޭރާމެވެ. ވަކިން ޚާއްސަކޮށް ފުރަ މާލޭގެ އިޖްތިމާޢީ ފޭރާމަކީ ވީދި ހަލާކުވެފައިވާ ފޭރާމެކެވެ.
އަދުގެ ސަރުކާރުން މިއަދު އަންނަނީ ކޮންކްރީޓް ޖަންގައްޔެއްގެ ގޮތުގައި އޮތް މާލޭގެ މަލަމަތި ބަދަލުކޮށް އިޖްތިމާޢީގޮތުން ރައްކާތެރި، ރައްޔިތުންނަށް ހިތްފަސޭހަކަން ގެނެސްދޭ ތަނަކަށް މާލެ ހެދުމަށް ބޮޑެތި މަސައްކަތްތަކެއް ކުރަމުންނެވެ. ސަރުކާރުގެ ބެލުމުގެ ދަށުގައި ހުރި ބިންތައް ރައްޔިތުންނަށް އެންމެ އެކަށޭނެ ގޮތަށް ތަރައްޤީކުރުމަށް ދަނީ ގިނަ މަޝްރޫޢުތަކެއް ހިންގަމުންނެވެ. ހިތްފަސޭހަ މައިޒާންތަކާއި ޕާކުތައް ތަރައްޤީކޮށް ރައްޔިތުންނަށް އުފާވެރިކަން ގެނެސްދޭ އެތައް މަޝްރޫއެއްގެ މަސައްކަތް ސަރުކާރުން ދަނީ ކުރަމުންނެވެ.
- ރައްޔިތުންނަށް ހިތްފަސޭހަ ވަގުތުތަކެއް ހޭދަކުރެވޭނެހެން ސަރުކާރުން ތަރައްޤީކޮށްފައިވާ ބައެއް މައިޒާންތައް :
- ރަސްފަންނު
- ސުނާމީ ބިނާ މައިޒާން
- އިސްކަންދަރު މައިޒާން
- ރައިވެރިބެ މައިޒާން
- ރެހެންދި މައިޒާން
- ހިއްތަން މައިޒާން
- ރަސްރަނި ބަގީޗާ ފާހަކޮށްލެވޭއެވެ.
ސަރުކާރުން ކުރިއަށްގެންދާ މިފަދަ މަޝްރޫޢުތަކަކީ ހުރިހާ ރައްޔިތުންނަށް ޝާމިލް ވެވޭނެ ގޮތަށް ލާބަޔާއި މަންފާ ލިބޭގޮތަށް ކުރިއަށް ގެންދާ މަޝްރޫޢުތަކެކެވެ. އެގޮތުން ރައްޔިތުން ޤަބޫލުކުރާ ގޮތުގައި މިފަދަ ޕާކުތައް މިއަދު މާލޭގައި ހެދުން ކިތަންމެހާވެސް ލަސްވެއްޖެއެވެ. މިއަދު މި ޕާކްތައް ހުޅުވުމުގެ ސަބަބުން ދަރިން ގޮވައިގެން ހިތްފަސޭހަ ކޮށްލުމަށް ހަފްތާ ބަންދުތަކުގައި ރަށުން ބޭރަށް ފުރަ ފުރައިގެން ދިޔަ ދިއުމަށް ނިމުމެއް އަތުވެއްޖެ ކަމަށް ރައްޔިތުން ބުނެއެވެ.
ޤައުމުގެ އިޖްތިމާޢީ ފޭރާން ރަނގަޅުވުމުގެ ނަތީޖާއަކަށް ވެގެންދަނީ ސަރުކާރަށް ތަރައްޤީގެ މަޝްރޫޢުތައް ކުރިއަށް ގެންދިއުމަށް ފަހިވެގެން ދިއުމެވެ. ތަރައްޤީގެ މަޝްރޫޢުތައް ކުރިއަށްގެންދިއުމުގައި ސަރުކާރުން އެންމެ ބޮޑު އިސްކަމެއް ދެނީ ރައްޔިތުންގެ ބޭނުންތަކަށެވެ. ރައީސުލްޖުމްހޫރިއްޔާ ޢަބްދުﷲ ޔާމީންގެ ސަރުކާރަކީ އަބަދުވެސް ރައްޔިތުން އެކަމަކަށް ތަކުލީފު އުފުލަމުން އަންނަ ކަންތައްތަކަށް ހެޔޮ ބަދަލު ގެނެސްދޭ ސަރުކާރެކެވެ.
މާލޭގެ ދިރިއުޅޭ ރައްޔިތުންގެ ޝަކުވާއަކަށް އަބަދުވެސް ވެފައިވަނީ މާލޭގެ މަގުތަކުގެ އަޑި ގުޑަންތައް ގިނަ ވާހަކައެވެ. ނަމަވެސް ސަރުކާރުން މާލޭގެ މަގުތައް ރަނގަޅު ފެންވަރަކަށް ހަދާނެކަން އިޢުލާން ކުރުމާއިއެކު މާލޭގައި ދިރިއުޅޭ ރައްޔިތުންނަށް އުންމީދު އާވެގެންދިޔައެވެ.
ރާއްޖޭގެ އާބާދީގެ 80 ޕަސެންޓު މީހުން ދިރިއުޅޭ މާލޭގެ ގިނަ މަގުތަކެއް ރަނގަޅު ފެންވަރަކަށް ހަދާނެ ކަން އިޢުލާންކޮށް އެކަމުގެ އަމަލީ މަސައްކަތް ހައުސިން މިނިސްޓްރީން ވަނީ ފަށާފައެވެ. އެގޮތުން އެންމެ ފުރަތަމަ މަސައްކަތް ފެށީ މާލޭގެ އެންމެ ކާރޫބާރު ބޮޑު އެއް މަގު މަޖީދީ މަގުންނެވެ. މަޖީދީ މަގުގެ މަސައްކަތް ބާރު ސްޕީޑުގައި ނިންމާލިއިރު މިއަދު އެ މަގުގައި ދުއްވާފައި ދިއުމެކޭ ތާރު މަގެއްގައި ދުއްވާފައި ދިއުމެކޭ އެއްފަދައެވެ. އެހާވެސް ފަސޭހައެވެ.
މާލޭގެ މަގުތައް ރަނގަޅު ފެންވަރަކަށް ހެދިއިރު މި މަސައްކަތުގެ ދަށުން މަގުތަކުގެ ގާތައް ނަގައި، ފެން ހިންދާ ނިޒާމާއި ދުވާރުވެސް ވަނީ ރަނގަޅު ފެން ވަރަކަށް ހަދާފައެވެ. މަޖީދީމަގުގެ މަސައްކަތް ނިންމުމަށްފަހު ހައުސިން މިނިސްޓްރީގެ އަމާޒު މިހާރު ހުރީ ބްރިޖުގެ މަސައްކަތް ނިމެންވާއިރަށް ބޮޑުތަކުރުފާނު މަގުގެ ބައެއްގައި ތާރު އެޅުމަށެވެ. އެ މަޝްރޫޢުގެ ޢަމަލީ މަސައްކަތް ފަށައިގެން ކުރިއަށްދާއިރު މިއީ މާލޭގެ މަގުތައް މިފަދަ ފެންވަރެއްގައި 30 އަހަރު ފަހުން ހަދާ ފުރަތަމަ ފަހަރެވެ.
މާލެއެކޭ އެއްގޮތަށް އަތޮޅުތަކުގެ ރައްޔިތުންގެވެސް އެންމެ ބޮޑު އެއް ޝަކުވާއަކަށް ވެފައިވަނީ ރަށްރަށުގެ މަގުތަކުގެ ހާލަތު ދަށް ވާހަކައެވެ. ރައްޔިތުން ބޭނުން ވަނީ ރަށްރަށުގެ މަގުތައްވެސް ޒަމާނީ ފެންވަރެއްގައި ހެދުމަށެވެ. ކޮންމެ ސަރުކާރަކުންވެސް ތޯތޯ ވާހަކަތައް ދެއްކުމުން މާޔޫސްވެފައި ތިބި އަތޮޅުތަކުގެ ރައްޔިތުންގެ މޫނު މައްޗަށް އުފާވެރިކަން ގެނެސްދިނީ ހައްދުން މަތި ބޮޑުމަގެވެ. ލ. އަތޮޅު ގަމާއި ފޮނަދޫއާއި ދެމެދު އޮންނަ 16 ކިލޯމީޓަރުގެ މަގު ތާރު އަޅައިގެން ޒަމާނީ ފެންވަރެއްގައި ތަރައްޤީ ކުރުމާއިއެކު ރާއްޖޭގެ އެހެން އަތޮޅު ތަކުގެ ރައްޔިތުންވެސް އެފަދަ މަގުތަކެއް ނުވަތަ ޒަމާނީ މަގުތަކެއް އެ ރަށްތަކަށް ބޭނުންވެގެން ދިޔައެވެ.
ސަރުކާރުން ބުނީ ފަސް އަހަރުގެ ތެރޭގައި ހުރިހާ ރައްޔިތުންގެ އުއްމީދު ފުރިހަމަ ނުކޮށްދެވުނު ނަމަވެސް ސަރުކާރަށް ލިބިފައިވާ ކުރު މުއްދަތެއްގައި ގިނަ ރަށެއްގެ މަގުތައް ހެދުމަށް މަސައްކަތް ކުރާނެ ކަމަށެވެ. އެގޮތުން ސަރުކާރުން ވަނީ 9 ރަށެއްގެ މަގުތައް ޒަމާނީ ފެންވަރަކަށް ހަދާފައެވެ. 13 ރަށެއްގެ މަގުތައް ޒަމާނީ ފެންވަރަކަށް ހެދުމުގެ މަސައްކަތް ކުރަމުން އަންނައިރު މި މަސައްކަތަށް 760 މިލިއަނަށްވުރެ ގިނަ ރުފިޔާ ވަނީ ޚަރަދު ކުރެވިފައެވެ. ސަރުކާރުގެ އަމާޒަކީ 2018ވަނަ އަހަރު ނިމުމުގެ ކުރިން އިތުރު 13 ރަށެއްގެ މަގު ހަދާ ނިންމުމެވެ.
މީގެކުރިން އަޅުގަނޑުމެންނަށް އަޑު އިވިގެން ދަނީ ސަރުކާރުތަކުން ރާއްޖޭގެ ރަށްތަކަށް ތަރައްޤީގެ މަޝްރޫޢުތައް ގެނައުމުގައި އާބާދީ ބޮޑެތި ރަށްތަކަށް ބަލާ ވާހަކައެވެ. ނަމަވެސް މިއަދު އެދުވަސްތައް ފަސްދީފިއެވެ. އަދުގެ ސަރުކާރުން ތަރައްޤީ ގެނައުމުގައި އާބާދީ ބޮޑު ރަށެއް ނުވަތަ ކުޑަ ރަށަކަށް ބެލުމެއް ނެތެވެ. ސަރުކާރުން މިކުރާ މަސައްކަތްތަކަށް ރައްޔިތުން ތިބީ ޝުކުރު އަދާކުރާނެ ގޮތެއްވެސް ނޭނގިފައެވެ.
އިޖުތިމާޢީ ފޭރާން ރަނގަޅުކޮށް ފަސްބައިގައި ޖެހިފައިވާ ލަށްތައް ފިލުވައި ޤައުމުގެ ރައްޔިތުންނަށް ހިނިތުންވުން ގެނެސްދިނުމަށް އަތުކުރި އޮޅާލައިގެން ކުރަން ފެށި މަސައްކަތް އަދިވެސް ދަނީ ބާރަށް ކުރިއަށެވެ. ރައީސް ޔާމީން ވިދާޅުވީ، ރައްޔިތުންނަށް އުފާވެރި ޒަމާނެއް ހޯދައިދެއްވާނެ ކަމަށެވެ. އުފާވެރި ޙަޔާތެއްގެ ދަންމަރު ރައްޔިތުންނަށް ދިއްލައިދޭނެ ކަމަށެވެ. އަދި އުފާވެރިކަމެއް މުޅި ދިވެހި ދީބަށް ދައްކައިދޭނެ ކަމަށެވެ.