އާބާދީގައި ގާތްގަނޑަކަށް 570 މީހުން ދިރިއުޅެމުން އަންނަ ހއ. ފިއްލަދޫއަށް މިވަގުތު ދިމާވެފައިވާ އެންމެ ބޮޑު އެއް މައްސަލައަކީ ލަފާފުރުމުގެ ދަތިކަމެވެ.
ފިލައްދޫގެ ރައްޔިތުންނަށް އުފާވެރިކަން ގެނެސްދިނީ އެރަށުގައި 150 ފޫޓު ދިގު، 250 ފޫޓު ފުޅާ ބަނދަރެއް ހެއްދެވުމުގެ މަސައްކަތް ސަރުކާރުން އާރު.އާރު މޯލްޑިވްސް ޕްރައިވެޓް ލިމިޓެޑާއި ހަވާލުކުރެއްވި ހިސާބުންނެވެ. މި މަޝްރޫޢުގެ ޢަމަލީ މަސައްކަތް ހައުސިންގ މިނިސްޓަރ ޑރ. މުޙައްމަދު މުޢިއްޒު ފަށްޓަވައިދެއްވުމުން ފިއްލަދޫ ރައްޔިންގެ މޫނުމަތިން ފެނިގެންދިޔައީ ހިތްހަމެޖުމާއި އުފާވެރިކަމެވެ. 28 މިލިއަނަށްވުރެ ގިނަ ރުފިޔާ ޚަރަދުކުރައްވައިގެން އެރަށުގައި އަލަށް ފެށްޓެވި މަޝްރޫޢާއެކު، އިޤްތިޞާދީގޮތުން އާ ދޮރުތަކެއް ހުޅުވިގެންދާނެކަން ފިއްލަދޫ ރައްޔިތުން ޤަބޫލުކުރިއެވެ.
"ބަނދަރެއް ނެތުމުގެ ސަބަބުން، ފެރީ ކައިރިކުރުމުގައި ތަކުރާރުކޮށް ދަތިތަކާއި ކުރިމަތިލާންޖެހޭ. ޚާއްސަގޮތެއްގައި މާބަނޑު އަންހެނުންނަށާއި، ތުއްތުކުދިން ގޮވައިގެން ދަތުރުކުރުމުގައި. އެދަތިކަމާއި، އުނދަގޫ އަދި ހިތްދަތިކަމުގައި ދުވަސްތައް ގުނަމުން ދަނިކޮށް މިއަދު މި އުފާވެރި މަންޒަރު ފެނިގެންމިދިޔައީ. އަޅުގަނޑުމެން މިތިބީ ވަރަށްވެސް އުފަލުން" ޕީ.އެސް.އެމްއާއި ވާހަކަދެއްކި ފިއްލަދޫ ރައްޔިތެއް ބުންޏެވެ.
img:http://s2.psmnews.mv/images/660x400/14854022100885.jpg|ފިއްލަދޫ ބަނދަރު ޕްރޮޖެކްޓްގެ ޗާޓު، އެރަށު ރައްޔިތުންގެ ބަޔަކު ބަލަނީ
ފިއްލަދޫ ކައުންސިލްގެ ނާއިބު ރައީސް މުޙައްމަދު މޫސާ ވިދާޅުވީ، ދީފައިވާ މުއްދަތުގެ ތެރޭގައި ބަނދަރުގެ މަޝްރޫޢުގެ ނިންމަވާނެކަމުގެ ޔަޤީންކަން އެ މަސައްކަތް ހަވާލުކޮށްފައިވާ ކޮންޓްރެކްޓަރު ދެއްވާފައިވާކަމަށެވެ. އަދި ފިއްލަދޫގެ ބަނދަރު ހެދުމަށް ހަމަޖެހިފައިވާ ސަރަޙައްދަކީ ރައްޔިތުން ދިރިއުޅޭ ސަރަޙައްދާއި ތަންކޮޅެއް ދުރު ހިސާބެއްކަމުން، ރައްޔިތުންނަށް ބަނދަރުގެ ބޭނުން ފަސޭހައިން ކުރެވޭނެހެން ބަނދަރާއި އިންވެގެން އެއްގަމު ސަރަޙައްދުގެ މަގުތައްވެސް ރަނގަޅު ފެންވަރެއްގައި ހެދުމަށް ހަމަޖެހިފައިވާކަމަށް މުހައްމަދު މޫސާ ވިދާޅުވިއެވެ.
"60 ފޫޓު މަގަކާއެކު ބަނދަރާއި ރަށުގެ މީހުން ދިރިއުޅޭ ސަރަޙައްދާއި ގުޅުވާލެވޭނެ. އެ މަގުވެގެންދާނީ ވެލިއެޅި، ކޮމްޕެކްޓް ކުރެވި، މަގުގެ ދެ ފަރާތަށް އަލިވާގޮތަށް ލައިޓުވެސް ޖެހިގެންދާނެ މަގަކަށް. ބަނދަރުގައިވެސް އަޅުގަނޑުމެން ދެ ފަރާތަކަށް އަލިވާގޮތަށް ލައިޓުޖަހާ، ބަނދަރުގައި ޕޭވްމަންޓް ގާ 20 ފޫޓަށް އެތުރިގެންދާނެ" މުޙައްމަދު މޫސާ ވިދާޅުވިއެވެ.
ފިއްލަދޫ ބަނދަރުގެ މަސައްކަތް ރަސްމީގޮތުން ފައްޓަވައިދެއްވުމަށް ހައުސިންގ މިނިސްޓަރ ޑރ. މުޙައްމަދު މުޢިއްޒާއި، އެމަނިކުފާނުގެ ޓީމުން އެރަށަށް ކުރެއްވި ދަތުރުފުޅުގައި، ފިއްލަދޫ ކައުންސިލާއި ބައްދަލުކޮށް، ރަށުގައި ހުރި މައްސަލަތައް ބައްލަވައި ރައްޔިތުން ޝަކުވާތަކާއި އެންމެ ބޭނުންވާ ކަންކަން ވަނީ އޮޅުންފިލުއްވާފައެވެ.
ފިއްލަދޫ ބަނދަރު ހެދުމުގެ މަޝްރޫޢު 300 ދުވަހުގެ ތެރޭގައި ނިންމަވާގޮތަށް އާރު.އާރު މޯލްޑިވްސް ޕްރައިވެޓް ލިމިޓެޑާއި ސަރުކާރުން ހަވާލުކުރައްވާފައި ވަނީ 2016 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ. ބަނދަރުގެ މަސައްކަތް ނިންމާ، އެތަން ރަސްމީކޮށް ބޭނުންކުރަން ފެށޭނެ ދުވަހަކީ ފިއްލަދޫ ރައްޔިތުން މިހާރު އެންމެ އިންތިޒާރު ކުރަމުންދާ އެއް ދުވަހެވެ.