"ތިލަފުށްޓަށް ޕޯޓް ބަދަލުކުރުމުން އިޤްތިޞާދަށް ބޮޑު ކުރިއެރުމެއް އަންނާނެ"
-
މަޝްރޫޢު ކުރިއަށްދާ ގޮތާމެދު ހިތްހަމަޖެހިވަޑައިގަންވާކަން ފާހަގަކުރެއްވި
-
އިޤްތިޞާދު ކުރިއެރުވުމުގެ އެންމެ މުހިންމު ދޮރާށި ކަމަށް ވިދާޅުވި
-
އަންނަ އަހަރު ނޮވެމްބަރު 11އަށް މަސައްކަތް ނިންމުކީ ޢަމާޒު
މާލެ ވިޔަފާރި ބަނދަރު ތިލަފުއްޓަށް ބަދަލުކުރުމުން ރާއްޖޭގެ އިގްތިސާދަށް ބޮޑު ކުރިއެރުމެއް އަންނާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިޢްޒު ވިދާޅުވެއްޖެއެވެ.
ރާއްޖޭގެ މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރުޢުކުރިއަށްދާ ގޮތް ބައްލަވާލެއްވުމަށްފަހު ރައީސުލްޖުމްހޫރިއްޔާ ވިދާޅުވީ މަޝްރޫޢުގެ މަސައްކަތް ކުރިއަށްދާގޮތާމެދު ވަރަށް ހިތްހަމަޖެހޭކަމަށެވެ. ރައީސް ވަނީ މިހާތަނަށް ކުރިއަށްގެންދިޔަ މަސައްކަތްތަކާއި މުޅި މަޝްރޫޢުގެ މަރުހަލާތައް ބެހިފައިވާގޮތާއި މަސައްކަތްތައް ނިންމުމަށް ކުރަމުންދާ މަސައްކަތްތަކުގެ އަދާހަމަ ބައްލަވާލައްވާފައެވެ.
މި މަޝްރޫޢާ ގުޅޭގޮތުން މީޑިއާތަކަށް ދެއްވި އިންޓަވިއުގައި ރައީސުލްޖުމްހޫރިއްޔާ ވިދާޅުވީ، މި މަޝްރޫޢުއަކީ ސަރުކާރުން މިވަގުތު އެންމެ އިސްކަންދޭ އެއް މަޝްރޫޢުކަމަށެވެ.
މިހާރު ރާއްޖޭގައި އޮތް ވިޔަފާރި ބަނދަރަކީ ރާއްޖޭގެ އިޤްތިޞާދު ކުރިއަރައިގެންދާ މިންވަރަށް އެކަށީގެންވާ ބަނދަރަކަށް ނުވޭ. ޚާއްސަކޮށް މިހާ ކުރު މުއްދަތެއްގައި ތަރައްޤީގެ ބޮޑެތި މަޝްރޫޢުތަކެއް ރާއްޖެއަށް އަންނައިރު، އެކަމަށް މަގުފަހިކުރަން ވަރަށް މުހިންމު މަޝްރޫޢެއް. އެހެން ބަނދަރު ބޮޑުކޮށް، ޒަމާނީ ބަނދަރެއް މި ތަރައްޤީކުރެވެނީ." ރައީސް ވިދާޅުވިއެވެ.
ބަނދަރުގެ ބައެއް މަސައްކަތްތައް މާލެ އިންޑަސްޓްރިއަލް ޒޯން ސަރަޙައްދުގައި ތައްޔާރުކުރާ ސަރަޙައްދަށް ބަދަލުކުރާނެކަންވެސް ރައީސް ފާހަގަކުރެއްވިއެވެ. ސަރުކާރުގެ ޢަމާޒަކީ އަންނަ އަހަރުގެ ނޮވެމްބަރު 11ގެ ނިޔަލަށް، ޕޯޓުގެ އެންމެހާ ޚިދުމަތްތައް ތިލަފުއްޓަށް ބަދަލުކުރުމެވެ.
އައު ބަނދަރާއެކު ޕޯޓުގެ ޚިދުމަތްތައް 4 ގުނަ ފުޅާވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ މިއީ މުޅި އިޤްތިޞާދު އިތުރަށް ފުޅާކުރުމަށް ހުޅުވޭ ދޮރެއްކަމަށެވެ.
"މިއީ ރާއްޖޭގެ އުފެންދުންތެރިކަން މައްޗަށް ގެންދިއުމަށް، ވިޔަފާރިތައް މައްޗަށް ގެންދިއުމަށް އެންމެ މުހިންމު މަޝްރޫޢު. ކަމާގުޅޭ ވުޒާރާތަކާއި، ކުންފުނިތައް އަދި ބޭރުގެ ފަރާތްތައް ގުޅިގެން މިހާތަނަށް މަސައްކަތް ގެންގޮސްފަވާ ހިސާބާމެދު ވަރަށް ހިތްހަމަޖެހޭ. އެކަމަށް ޝުކުރު އަދާކުރަން." ރައީސް ވިދާޅުވިއެވެ.
ޕޯޓުގައި މިވަގުތު ކުރަމުންދަނީ ޑޮމެސްޓިކް ކީ ވޯލް ނުވަތަ މަގަތު ފާލަމުގެ މަސައްކަތެވެ. އެ މަސައްކަތް ނިންމާ، މިމަހުގެ ފަހުކޮޅު ކީވޯލްއިން ޚިދުމަތް ލިބޭނެއެވެ.
ޕޯޓުގެ މަސައްކަތްތައް ބައްލަވާލެއްވުމަށް ރައީސްކުރެއްވި ޒިޔާރަތުގައި އިޤްތިޞާދީ ތަރައްޤީއާބެހޭ ވަޒީރު މުޙައްމަދު ސަޢީދާއި، އިތުރު ބައެއް ވަޒީރުންގެ އިތުރުން، އެމްޕީއެލްގެ ސީއީއޯ ހުސައިން ޝަފީޤް އަދި ކަމާގުޅޭ އެހެނިހެން އިދާރާތަކާއި އަދި މި މަޝްރޫޢުގައި ބަނދަރުގެ އިންޓަރނޭޝަނަލް ކީވޯލްގެ މަސައްކަތްކުރާ ޗައިނާގެ ކުންފުނިންވެސް ބައިވެރިވިއެވެ.