ސިއްޙީ ދާއިރާގެ ތަރައްޤީގެ ދުވެލި ހިފަހައްޓައިގެން ރަނގަޅު ނަތީޖާއެއް ނެރެވޭނެ

ސިއްޙީ ދާއިރާއަށް މިހާރު ކުރާ ހޭދަ އެގޮތުގައި ހިފަހައްޓައިގެން ރަނގަޅު ޚިދުމަތެއް ފޮރުކޮށްދީ ރަނގަޅު ނަތީޖާއެއް ނެރެވޭނެކަމަށް ޤަބޫލުކުރައްވާކަމަށް ސިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ. ސިއްޙީ ދާއިރާއަކީ ދައުލަތުގެ ބަޖެޓުން އެންމެ ބޮޑު ހޭދައެއް ކުރާ އެއް ދާއިރާއެވެ.

ތަރުޖަމާނާއެކު އެޕިސޯޑުގައި ސިއްޙީ ވަޒީރު ޢަބްދުﷲ ނާޡިމް އިބްރާހީމް ވަނީ މާލޭ ސަރަހައްދުގެ ސިއްޙީ ޚިދުމަތްތައް ފުޅާކުރުމާ ގުޅޭގޮތުން އަލިއަޅުއްވާލައްވާފައެވެ. ޚާއްސަކޮށް މާލެ ސަރަޙައްދުގައި ޖީޕީ ކްލިނިކްތައް ތަރައްޤީކުރުމަށް ކުރާ މަސައްކަތްތަކާއި އެކަމުގެ މުހިއްމުކަން ވަޒީރު ފާހަގަކުރެއްވިއެވެ.

ސިއްޙީ ނިޒާމްގެ ތެރެއިން ރައްޔިތުންނަށް އޮތް ކަންބޮޑުވުންތަކުގެ ތެރެއިން އެއްކަމަކީ ސްޕެޝަލިސްޓް ޑޮކްޓަރުންނަށް ދެއްކުމަށްޓަކައި އޮންނަ ކިއު ބޮޑުވުންކަން ފާހަގަކުރައްވާ ވަޒީރު ވިދާޅުވީ، ދުނިޔޭގެ ގިނަ ޤައުމުތަކުގައި ސްޕެޝަލިސްޓް ޑޮކްޓަރުންނަށް ދައްކަނީ ޖީޕީ ކްލިނިކްތަކުން އާންމު ބަލިތަކުގެ ޑޮކްޓަރަކަށް ދެއްކުމަށްފަހުގައިކަމަށެވެ. ނަމަވެސް ރާއްޖޭގައި އެންމެ ކުރިންވެސް ފަރިތަވެފައިވަނީ ކުޑަކަމެއް ދިމާވިނަމަވެސް ސްޕެޝަލިސްޓަށް ދެއްކުމަށް ދިޔުން ކަމަށާއި މި ނިޒާމް ބަދަލުކުރަން ޖެހޭކަމަށް ވަޒީރު ވިދާޅުވިއެވެ. އަދި މިކަމަށް ކުރެއްވި އެންމެ މުހިންމު މަސައްކަތްތަކަކީ އާންމު ބަލިތަކުގެ ޑޮކްޓަރުންނަށް ދެއްކޭނެ އިންތިޒާމްތައް ހަމަޖެއްސުމަށް ޖީޕީ ކްލިނިކްތައް ތަރައްޤީކުރުންކަން ވަޒީރު ފާހަގަކުރެއްވިއެވެ.

ވަޒީރު ވަނީ މި ސަރުކާރުގެ ސިއްޙީ ސިޔާސަތު ރިފޯމް ކުރުމުގެ އެޖެންޑާގައި ރައީސްގެ އެންމެ މުހިއްމު އެއް ވިސްނުންފުޅަކީ މާލެ ސަރަޙައްދުގައި 6 ޖީޕީ ކްލިނިކް ޤާއިމްކުރުންކަން ފާހަގަކުރައްވާފައެވެ. މިގޮތުން މިހާރު މާލޭގައި އެފަދަ ކްލިނިކްއެއް ހުޅުވާފައިވާއިރު ކުރިއަށް އޮތްތަނުގައި ދަމަނަވެއްޓާއި ކުރީގެ ތެލަސީމިއާ ސެންޓަރު އެއްކޮށްލާ ބޭނުންވާ ވަޞީލަތްތަކާއެކު ޖީޕީ ކްލިނިކް ތަރައްޤީކުރުން ހިމެނޭކަމަށް ވަޒީރު ވިދާޅުވިއެވެ. މީގެ އިތުރުން ހުޅުމާލޭގައިވެސް ޖީޕީ ކްލިނިކް ތަރައްޤީކުރުމުގެ މަސައްކަތް ކުރަމުންދާކަން ވަޒީރު ފާހަގަކުރެއްވިއެވެ.

"މި ނިޒާމްގެ ތެރެއަށް ދިވެހން ފަރިތަވުމުގެ ނަތީޖާއަކަށް ވާނީ ކުދި ކުދި ކަންކަމުގައި މައި ހޮސްޕިޓަލަށް ދާން ނުޖެހި ޖެނެރަލަށް ޕްރެކްޓިޝަނަރއަކަސް ގޮސް ، ޑޮކްޓަރުގެ ލަފަޔާއެކު ދައްކަންޖެހޭ ސްޕެޝަލިސްޓަކަށް ދެއްކޭނެ މަގު ފަހިވެގެން ދިޔުން. ބަލިމީހާގެ ހާލަތަށް ބަލާ ކިއު ބައިޕާސް ކޮށް ސްޕެޝަލިސްޓަކަށް ދެއްކުމުގެ މަގު ޖީޕީ ކްލިނިކްގެ ތެރެއިން ހަމަޖެހިގެންދާނެ. އެއީ މިނިޒާމަށް ގެނެވޭނެ ބޮޑު ބަދަލަކަށް ވާނެ."" ސިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވިއެވެ.

ވަޒީރު ވަނީ މިހާރުވެސް އައިޖީއެމްއެޗްގެ އިމަޖެންސީއަށް އަންނަ މީހުންގެ ތެރެއިން ދެބައިކުޅަ އެއްބަޔަކީ ކޮންމެހެން އެމަޖެންސީއަށް ދާން ނުޖެހި ފަރުވާ ހޯދޭނެ މީހުންކަން ފާހަގަކުރައްވާއެވެ. އަދި އާންމު ބަލިތަކުގެ ޑޮކްޓަރުންނަށް ދެއްކުމުގެ އިންތިޒާމް ޖީޕީ ކްލިނިކްއިން ލިބޭގޮތް ހަމަޖެހިފައި އޮތުމުން ރައްޔިތުންނަށް ވަރަށް ބޮޑު ލުއިފަސޭހައެއް ލިބިގެންދާނެކަމަށެވެ.

އެކަމުގެ ނަތިޖާއެއްގެ ގޮތުން މައި ހޮސްޕިޓަލްގެ އިމަޖެންސީ ރޫމްގައި އެންމެ ކްރިޓިކަލް ހާލަތުގައި އޮންނަ މީހާއަށް މިހާރަށްވުރެ ރަނގަޅަށް ޚިދުމަތްދިނުމަށް މަގުފަހިވާނެކަމަށްވެސް ވަޒީރު ވިދާޅުވިއެވެ. ވަޒީރު ވަނީ އެފަދަ ކްލިނިކްތަކުގެ ސަބަބުން ވަގުތާއި ޚަރަދުގެ ގޮތުންވެސް ލުޔެއް ލިބިގެންދާނެކަން ފާހަގަކުރައްވާފައެވެ.

ވަޒީރު ނާޡިމް ވިދާޅުވީ ސިއްޙީ ދާއިރާއަށް މިހާރު ކުރާ ހޭދަ އެގޮތުގައި ހިފަހައްޓައިގެން ރަނގަޅު ޚިދުމަތެއް ފޮރުކޮށްދެވި ރަނގަޅު ނަތީޖާއެއް ނެރެވޭނެކަމަށް ޤަބޫލުފުޅުކުރައްވާކަމަށެވެ. ރާއްޖެއަކީ ތަރައްޤީވަމުން އަންނަ ޤައުމަކަށްވާއިރު ސިއްޙީ ދާއިރާއަށް ބޮޑެތި ހޭދަތަކެއް ކުރިނަމަވެސް ކަންކަން ރަނގަޅު ކުރެވޭނީ މުޅި ނިޒާމް ބަދަލުކޮށްގެންކަން ވަޒީރު ފާހަގަކުރެއްވިއެވެ.