ތުޅާދޫ ހޮސްޕިޓަލު މިއަހަރުގެ ނިޔަލަށް ނިންމަނީ

ބ. ތުޅާދޫ ހޮސްޕިޓަލުގެ މަސައްކަތް މިއަހަރުގެ ނިޔަލަށް ނިންމުމަށް މަސައްކަތް ކުރަމުންދާ ކަމަށް މޯލްޑިވްސް ޓްރާންސްޕޯޓް އެންޑް ކޮންސްޓަރް އެމްޓީސީސީން ވިދާޅުވެއްޖެއެވެ.

އާބާދީގައި 3100 އަށްވުރެ ގިނަ މީހުން ދިރިއުޅޭ ބ.ތުޅާދޫގައި ޞިއްޙީ ޚިދުމަތް ތަރައްޤީނުވެ އޮތުމަކީ އެރަށުގެ ރައްޔިތުންގެ އޮތް ޒަމާންވީ ޝަކުވާއެކެވެ. އެކަމަށް ޙައްލެއް ގެނައުމަށްޓަކައި ސަރުކާރުން ތުޅަދޫގައި މުޅިން އައު ހޮސްޕިޓަލެއް ތަރައްޤީ ކުރުމުގެ މަސައްކަތް ފެށީ، 2023 ވަނަ އަހަރުގެ ޖުލައި މަހުގެ 24 ވަނަ ދުވަހުގައެވެ. މަސައްކަތް ޙަވާލުކޮށްފައިވަނީ، 1 އަހަރާއި 6 މަސް ދުވަހުގެ ތެރޭގައި ނިންމުމަށެވެ. އެހެންނަމަވެސް އެކި ސަބަބުތަކާހުރެ މަސައްކަތް އެކަށީގެންވާ ބާރުމިނުގައި ކުރިއަށް ނުދެއެެވެ.

އެމްޓީސީސީން މިހާރު މަސައްކަތް ކުރަމުންދަނީ، މިމަޝްރޫޢުގެ މަސައްކަތް މިއަހަރުގެ ނިޔަލަށް ނިންމުމަށެވެ. އެމްޓީސީސީން ވިދާޅުވީ، ތުޅާދޫ ހޮސްޕިޓަލު މަޝްރޫޢުގެ ދަށުން މިހާރު ކުރަމުންދަނީ ރާނާ ސިމެންތި ޖެހުމުގެ މަސައްކަތް ކަމަށެވެ.

2 ފަންގިފިލާއަށް ތަރައްޤީ ކުރާ ތުޅާދޫ ހޮސްޕިޓަލުގެ މަސައްކަތް އެމްޓީސީސީއާއި ހަވާލުކޮށްފައިވަނީ 124 މިލިއަން ރުފިޔާއަށެވެ. 30 އެނދުގެ ހޮސްޕިޓަލެއްގެ ގޮތުގައި ތުޅާދޫ ހޮސްޕިޓަލު ތަރައްޤީކުރަނީ، ޒަމާނީ ވަޞީލަތްތަކާއެކުގައެވެ. މިމަޝްރޫޢުގެ ދަށުން ހޮސްޕިޓަލުގައި އެކޮމޮޑޭޝަން ބްލޮކެއް ތަރައްޤީ ކުރުމަށްވެސްވަނީ ހަމަޖެހިފައެވެ.

ގިނަ ރިސޯޓުތަކެއް އޮންނަ ބ.އަތޮޅުގައި މިވަގުތު ހޮސްޕިޓަލު ހުންނަނީ އޭދަފުށީގައެވެ. އަތޮޅުގައި އިތުރު ހޮސްޕިޓަލެއް ތަރައްޤީވެގެން ދިޔުމަކީ، ތުޅާދޫގެ އިތުރުން މުޅި އަތޮޅަށްވެސް އަންނާނެ ކުރިއެރުމެއް ކަމަށް ތުޅާދޫ ރައްޔިތުން ދެކެއެވެ. ޞިއްޙީ ޚިދުމަތް ހޯދުމަށް މިހާރު ތުޅާދޫ ރައްޔިތުން ގިނަ ފަހަރަށް ދާންޖެހެނީ އޭދަފުއްޓަށް ނުވަތަ މާލެއަށެވެ. އެހެންކަމުން ތުޅާދޫ ހޮސްޕިޓަލު ތަރައްޤީވެގެން ދިޔުމުން ބޭސްފަރުވާއަށް ރަށުން ބޭރަށް ދިޔުމަށް އުފުލި ތަކުލީފުތަކާއި އަދި ކުރި ބޮޑު ހޭދަ ނިމުމަކަށް އަންނާނެއެވެ.