ކުމުންދޫ ސްކޫލުގެ މަލްޓި ޕަރޕަސް ހޯލުގެ މަސައްކަތް އެފްޑީސީއަށް
-
އަމަލީ މަސައްކަތް ކުރިއަށް އޮތް 3 މަހެއްހާ ދުވަހުގެ ތެރޭގައި ފެށިގެން ދާނެ
-
އަންނަ އަހަރުގެ ބަޖެޓުގައި ހިމަނައިގެން ކުމުންދޫ ސުކޫލްގައި އިތުރު ވަސީލައްތައް ޤާއިމްކުރާނެ
ހދ. ކުމުންދޫ ސްކޫލްގެ މަލްޓި ޕަރޕަސް ހޯލުގެ މަސައްކަތް ފަހި ދިރިއުޅުން ކޯޕަރޭޝަން، އެފްޑީސީއާ ހަވާލުކޮށްފިއެވެ.
މި މަސައްކަތް އެފްޑީސީއާ ހަވާލުކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތިލަދުންމަތީ ދެކުނުބުރިއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކުރިނބީ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގެ ތެރެއިންނެވެ.
މަލްޓި ޕަރޕަސް ހޯލު އެޅުމުގެ އެއްބަސްވުމުގައި ތަޢުލީމީ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ ޙުސައިން ސަޢީދު މުޙައްމަދެވެ. އަދި އެފްޑީސީގެ ފަރާތުން ސޮއިކުރެއްވީ އެކުންފުނީގެ ޑެޕިއުޓީ މެނޭޖިންގ ޑިރެކްޓަރ އިބްރާހީމް ރައްޒާނެވެ.
ކުމުންދޫ ސުކޫލްގެ މަލްޓި ޕަރޕަސް ހޯލުގެ މަސައްކަތާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މި މަސައްކަތުގެ އަމަލީ މަސައްކަތް ކުރިއަށް އޮތް 3 މަހެއްހާ ދުވަހުގެ ތެރޭގައި ފެށިގެން ދާނެކަމަށެވެ. އެގޮތުން މި މަސައްކަތް ކުރާއިރު އަންނަ އަހަރުގެ ބަޖެޓުގައި ހިމަނައިގެން ކުމުންދޫ ސުކޫލަށް އިތުރު ޖާގަ އިތުރުކުރުމާއި ވަށާފާރު ރޭނުމާއި ސްޓާފް ރޫމާއި ސައިންސްލެބް ހިމެނޭހެން މުހިންމު މަސައްކަތްތަކެއް ކުރައްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ އަންނަ އަހަރުގެ ބަޖެޓުގައި ހިމަނައިގެން ކުމުންދޫ ސުކޫލްގައި އިތުރު ވަސީލައްތައް ޤާއިމްކުރުމުގެ މަސައްކަތްކޮށްދެއްވާނެކަމަށެވެ.