އަމާޒަކީ ޑިޖިޓަލް ވަޞީލަތްތަކާއެކު ދެވޭ ޞިއްޙީ ޚިދުމަތްތަކުގެ ފެންވަރު ރަނގަޅުކުރުން: ވަޒީރު ނާޡިމް

ސަރުކާރުގެ އަމާޒަކީ ޑިޖިޓަލް ވަޞީލަތްތަކާއެކު ރާއްޖޭގައި ދެވޭ ޞިއްޙީ ޚިދުމަތްތަކުގެ ފެންވަރު ރަނގަޅުކުރުންކަމަށް ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ އިންޑިޔާގެ މަލްޓިނޭޝަނަލް ހޮސްޕިޓަލް ހިންގާ ކުންފުންޏެއްކަމަށްވާ އެޕޯލޯ ހޮސްޕިޓަލްސްގެ ފަރާތުން ބޭއްވި 12 ވަނަ އިންޓަރނޭޝަނަލް ޕޭޝަންޓް ސޭފްޓީ ކޮންފަރެންސްގެ ތެރެއިން ކުރިއަށްދިޔަ ގްލޯބަލް ހެލްތު ޑަޔަލޮގްގައި ވާހަކަފުޅުދައްކަވަމުންނެވެ.

މި ކޮންފަރެންސްގައި ވާހަކަފުޅުދައްކަވަމުން ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވީ ޑިޖީޓަލް ޞިއްހީ ނިޒާމެއްގެ ތެރެއިން ރައްކާތެރި އަވަސް ޞިއްހީ ނިޒާމެއް ޤާއިމްކުރެވޭ ކަމަށެވެ. އަދި އިންސާނުންނަށް ކުރެވޭ ބައެއް ކުށްތައް މަދުކޮށް، ފެންވަރު ރަނގަޅު ފަރުވާއެއް ދިނުމުގައި ޑިޖިޓަލް ޓެކްނޮލޮޖީގެ ވަޞީލަތްތައް މުހިންމު ދައުރެއް އަދާކުރާކަމަށް ވަޒީރު ވިދާޅުވިއެވެ.

At the #IHD2025, Minister @ANazim2019 joined the high-level panel “Transformations in Patient Safety”, emphasizing the need for actionable strategies to leverage digital health for equitable healthcare access. #PatientSafety #DigitalHealth #GlobalHealth #IPSC2025 #ApolloIHD pic.twitter.com/31c6pJczC4

— Ministry of Health (@MoHmv) February 22, 2025

ވަޒީރު ވިދާޅުވީ، ރާއްޖޭގައިވެސް ޑިޖިޓަލް ވަޞީލަތްތައް ޤާއިމުކޮށް ޞިއްހީ ނިޒާމު ހަރުދަނާކުރުމަކީ ސަރުކާރުގެ އަމާޒެއް ކަމަށެވެ. އެ ގޮތުން ރާއްޖޭގެ ޑިޖިޓަލް ހެލްތު ބްލޫޕްރިންޓް ފްރޭމްވަރކް ވަރަށް އަވަހަށް އިފްތިތާޙުކުރެވޭނެ ކަމަށް ވަޒީރު ވިދާޅުވިއެވެ. އަދި މި ފްރޭމްވަރކް ފަރުމާކޮށްފައިވާނީ ދެވޭ ޚިދުމަތުގެ ފެންވަރު ރަނގަޅުކޮށް، ޞިއްޙީ ގިނަ ޚިދުމަތްތަކެއް ގިނަ ބަޔަކަށް ލިބޭނެ މަގު ފަހިވާނެ ގޮތްތައް ހިމަނައިގެން މަގުޗާޓެއްގެ ސިފައިގައިކަމަށް ވަޒީރު ވިދާޅުވިއެވެ.

"އަޅުގަނޑުމެން މިހާރު ވަނީ ޕްރައިމަރީ ހެލްތު ކެއަރއާއި ވެކްސިނޭޝަންއާ ގުޅުހުން ހުރި ޑިޖިޓަލް ޕްލެޓްފޯމްތައް ވަނީ ޤާއިމްކޮށްފައި. މި ފިޔަވަޅުތަކާއެކު ރާއްޖެއަކީ ޑިިޖިޓަލް ޞިއްހީ ނިޒާމެއް ޤާއިމްކުރުމުގެ ދާއިރާގައި ސަރަހައްދީ ގޮތުން ފާހަގަކޮށްލެވޭ ޤައުމެއް." ވަޒީރު ވިދާޅުވިއެވެ.

Delhi: Maldivian Health Minister Abdulla Nazim Ibrahim on 12th International Patient Safety Conference says, "I believe the topics of the conference—digital health and incorporating technology in healthcare—are among the most important areas that we, as health leaders, need to… pic.twitter.com/3k9IYm8BLj

— IANS (@ians_india) February 21, 2025

ވަޒީރު ވިދާޅުވީ، ޑިޖިޓަލް ޞިއްހީ ނިޒާމެއްގެ ސަބަބުން ގިނަ ފައިދާތަކެއްވި ނަމަވެސް، އެފަދަ ނިޒާމަކުން ދިމާވާ ދަތިތަކާމެދުވެސް ވިސްނާލަންޖެހޭ ކަމަށެވެ. އެގޮތުން ޑިޖިޓަލް ޕްލެޓްފޯމްތަކުގައި ހުންނަ މަޢުލޫމާތު ރައްކާތެރިކަމާއެކު ބެލެހެއްޓުމާ މެދު ވިސްނަންޖެހޭކަން ވަޒީރު ފާހަގަކުރެއްވިއެވެ. އަދި މިކަން ކުރެވޭނީ ސައިބަރ ސެކިޔުރިޓީ ފްރޭމްވަރކްތައް ހަރުދަނާކޮށް، އަބަދުވެސް ސިސްޓަމްތައް މޮނިޓަރކޮށްގެންކަން ވަޒީރު ފާހަގަކުރެއްވިއެވެ.

އިންޓަނޭޝަނަލް ޕޭޝަންޓް ސޭފްޓީ ކޮންފަރެންސްގައި ބައިވެރިވެވަޑައިގަތުމަށް ޞިއްހީ ވަޒީރު އިންޑިޔާއަށް ދަތުރުފުޅު ފެށްޓެވީ މިދިޔަ ބުރާސްފަތި ދުވަހުއެވެ. އަދި އާދިއްތަ ދުވަހު ވަޒީރުގެ ދަތުރުފުޅު ނިންމަވާލެއްވުމަށް ވަނީ ހަމަޖެހިފައެވެ.