ހުއްޓިފައިވާ ހުރިހާ މަޝްރޫޢުއެއް އަންނަ މަހު ފަށަނީ، ޔޮޓު މެރީނާ 6 މަސްތެރޭ ފަށާނެ: ރައީސް

ރާއްޖޭގެ އެކި ކަންކޮޅުތަކުގައި ހުއްޓިފައިވާ ހުރިހާ މަޝްރޫޢުއެއް އަންނަ ފެބުރުއަރީ މަހުން ފެށިގެން ބާރު ދުވެލީގައި ހިނގައިގަންނަން ފަށާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ހއ. އުލިގަމު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ހއ. އުލިގަމުގައި ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މިއަހަރުގެ ބަޖެޓުގެ ތެރެއިން އުލިގަމުގެ ތަރައްޤީއަށް ގިނަ ކަންތައްތަކެއް ކޮށްދިނުމަށް ކަނޑައަޅައި ޕްލޭންކޮށްފައިވާކަމަށެވެ. އެގޮތުން އެރަށަށް މިވަގުތު އެންމެ މުހިންމީ ސިއްޙީ ޚިދުމަތް ރަނގަޅުކުރުންކަމަށާއި، މިހާރު ހުރި ސިއްޙީ މަރުކަޒަކީ ޖާގައާއި ވަސީލަތްތަކުގެ ދަތިކަން އިންތިހާއަށް އޮތްތަނެއްކަމަށް ރައީސް ވިދާޅުވިއެވެ. އެހެންކަމުން މިކަން ނިމުމަކަށްގެނެސް ޙާލަތު ބަދަލުކޮށް ރަނގަޅު ފެންވަރުގެ ސިއްޙީ މަރުކަޒެއް ޢިމާރާތްކޮށްދޭނެކަމަށް ރައީސް ވިދާޅުވިއެވެ.

އުލިގަމުގެ އައު ސިއްޙީ މަރުކަޒު އެޅުމަށް އެމްޓީސީސީއާއެކު ވަރަށް އަވަހަށް ސޮއިކޮށް، ސައިޓް މޮބިލައިޒްކޮށް ރަމަޟާންމަހުގެ ފަހުން ޢަމަލީ މަސައްކަތް ފެށޭނެކަމުގެ ޔަޤީންކަން ރައީސް ދެއްވިއެވެ.

ރައީސްގެ ވާހަކަފުޅުގައި ވަނީ އުލިގަމު ބަނދަރުގެ ޖާގައިގެ ދަތިކަން އޮތުމުން، އެކަމަށްވެސް ހައްލު ގެނެސްދޭނެކަމަށް ވިދާޅުވެފައެވެ. އަދި އުލިގަމަށް އޮތް ކުނީގެ މައްސަލައަށްވެސް މިއަހަރު ޙައްލެއް ގެނެސްދެއްވާނެކަމުގެ ޔަޤީންކަން ރައީސް ދެއްވިއެވެ.

"ކުނި މެނޭޖުކުރުމުގެ ސެންޓަރުގެ މަސައްކަތަށް އަމަލީގޮތުން ވަރަށް އަވަހަށް ވާސިލްކޮށްދޭނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސްގެ ވާހަކަފުޅުގައި އުލިގަމަށް ކުޅިވަރުގެ ވަސީލަތްތައްވެސް ބޭނުންވާކަން ފާހަގަކުރައްވާ އެމަނިކުފާނު ވަނީ މިހާރު ކުރިއަށްދާ ދަނޑުގެ މަޝްރޫޢުގައި ހުރިހާ ވަސީލަތެއް ހަމަކުރުން ނުހިމެނޭކަމަށް ވިދާޅުވެފައެވެ. އެއީ މިދިޔަ ސަރުކާރުގައި ދަނޑު ތަރައްގީކުރުމަށް ހަވާލުކޮށްފައިވާ ގޮތްކަމަށާއި، ދަނޑުތައް ތަރައްޤީކުރުމުގައި އެކިކަންކަން އެކި ކުންފުނިތަކާ ހަވާލުކޮށްފައި އޮތުމުން އެންމެ ރަނގަޅަށް މަޝްރޫޢު ކުރިއަށް ނުދާކަމަށް ވިދާޅުވިއެވެ.

ނަމަވެސް މިސަރުކާރުން އެކަމަށް ބަދަލު ގެންނަވާފައިވާކަމަށާއި، އެގޮތުން ދަނޑު ތަރައްޤިކުރާއިރު ހުރިހާ ވަސީލަތަކާއެކު ފުރިހަމަ ދަނޑެއް ތަރައްޤީކުރާނީ އެއް ކުންފުންޏަކުންކަމަށް ރައީސް ވިދާޅުވިއެވެ. މިގޮތަށް އުލިގަމު ދަނޑުގެ މައްސަލަވެސް ހައްލުކޮށްދޭނެކަމަށް ރައީސް ވިދާޅުވިއެވެ.

މިދިޔަ ސަރުކާރުގައި އެއް ކުންފުންޏަކަށް އެކި މަޝްރޫޢުތައް އެއްފަހަރާ ހަވާލުކޮށްފައިހުރީ ކުރިއަށް ނުދާނެގޮތަށްކަން ފާހަގަކުރައްވާ ރައީސް ވިދާޅުވީ އޭގެތެރޭގައި ފެނާ ނަރުދަމާއާއި، ކުޅިވަރުގެ ވަސީލަތްތައް ޤާއިމްކުރުމާއި ތައުލީމީ އަދި ސިއްޙީ ދާއިރާގެ މަޝްރޫއުތައް ހިމެނޭކަމަށެވެ. ބައެއް އަތޮޅުތަކުގެ ހުރިހާ މަޝްރޫޢުއެއްވެސް އެއް ކުންފުންޏަކަށް ދީފައި އެބަހުރިކަމަށް އެމަނިކުފާނު ވިދާޅުވިއެވެ.

ރައީސް ވަނީ ހުއްޓިފައިވާ މަޝްރޫއުތައް އަލުން ފަށަން އިދާރީ ގިނަ މަސައްކަތްތަކެއް ކުރިއަށްދާކަމަށާއި، މިހާރު ކުރިއަށްދަނީ ކުރީގެ އެއްބަސްވުންތައް ބާޠިލުކުރުންފަދަ ކަންކަންކަމަށް ވިދާޅުވެފައެވެ. އެހެންކަމުން ކުރިއަށް އޮތް ފެބުރުއަރީމަހު އެ މަޝްރޫޢުތައް ވަރަށް ބާރަށް ހިނގައިގަންނާނެކަމަށް ރައީސް ވިދާޅުވިއެވެ.

"އެހެންކަމުން މިކަންކަން ސަރުކާރުގެ ކުންފުންޏަކަށް ހަވާލުކުރާނަން. އެހެންވީމަ މިކަންކަން ހިނގައިގަންނާނެ. މިރަށުގައި ސްކޫލުގެ މަސައްކަތްވެސް މި ދެންނެވި ސިޔާސަތުގެ ދަށުން ޓަރމިނޭޓްކުރެވި އަލުން ސްޓާޓް ކުރާނަން. ރާއްޖޭގެ ހުރިހާ ރަށެއްގައި މިހެން ހުރިހާ މަޝްރޫއުއެއް ހުއްޓިފައިހުރީ މިހެންވެ. ހުރިހާ މަޝްރޫޢުތައް ސޯޓްއައުޓްކުރެވި ފެބުރުއަރީ މަހު ހުރިހާ މަޝްރޫޢުއެއް ހިނގައި ގަންނަނާނެ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ އެވާހަކަ ތަފްސީލްކޮށްދިނީ އެކަމުގެ ދެފުށް ފެންނަގޮތަށް ހާމަކޮށް އެ އެމަސައްކަތް ފަށައިގަތުމަށްކަމަށެވެ.

ރައީސް ވިދާޅުވީ، މިދައުރުގެ ދެއަހަރު ދުވަހުގެ ތެރޭގައި ހުރިހާ ރަށެއްގައި ފުރިހަމަ ކުޑަކުދިންގެ ޕާކެއް ތަރައްޤީކުރުމާއި، އިންޑޯ ޖިމާއެކު ފިޓްނަސް އެންޑް ރެކްރިއޭޝަން ސެންޓަރާއި މޫދަށް އެރޭ ސަރަހައްދު ތަރައްޤީކުރުން ކަނޑައަޅާފައިވާކަމަށެވެ. އެކަން ފުރިހަކޮށްދޭނެކަމަށް ރައީސް ވިދާޅިވިއެވެ.

އުލިގަމަކީ ޒަމާނުއްސުރެ ގިނަ ޢަދަދެއްގެ ޔޮޓުތައް އަންނަ ރަށެއްކަމުން ފުރިހަމަ ޔޮޓް މެރީނާއެއް ޤާއިމްކުރުމަށް ކުރިއަށް އޮތް 6 މަސް ތެރޭގައި ފެށުމަށް އެމްޕީއެލުން ފަށައިގަންނަން ތައްޔާރުވެފައިވާކަން ރައީސް ފާހަގަކުރެއްވިއެވެ. މީގެ އިތުރުން ސްޕޯޓްސް ފިޝިން ބޮއި އެޅުމަށް އުލިގަމު ރައްޔިތުން އެދޭތީ، ދެމަހެއްހާ ދުވަސްތެރޭގައި އެ ސްޕޯޓްސް ބޮއި ޤާއިމްކޮށްދޭނެކަމަށްވެސް ވިދާޅުވިއެވެ.

ހުއްޓިފައިވާ މަޝްރޫޢުތައް އަންނަ މަހު ފަށްޓަވާނެކަމަށް ރައީސް ވިދާޅުވެފައިވާއިރު، މީގެ ކުރިން އެމަނިކުފާނު ވަނީ އެ މަޝްރޫޢުތައް ދެން ހިންގާނީ ސަރުކާރުގެ ފުރިހަމަ ބާރު ހިނގާގޮތަށްކަމަށް ވިދާޅުވެފައެވެ.

އެމަނިކުފާނުގެ ސިޔާސަތަކީ އާބަދީ ކުދި ރަށްރަށްވެސް ހަމަހަމަކަމާއެކު ތަރައްޤީކުރުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.