މާލީ ބާރުވެރިކަން ލިބޭގޮތަށް އެންމެ އަގުބޮޑު ރައުސްމާލު ފުރަތަމަ ފަހަރަށް ރައްޔިތުންގެ އަތްމައްޗަށް

ރާއްޖޭގެ ލާމަރުކަޒީ ނިޒާމު ފައްކާކޮށް، ކައުންސިލްތައް ބާރުވެރިކުރުވާ، ސަރުކާރާއި ރައްޔިތުންނާ ވީހާވެސް ގާތުން ދެފުށް ފެންނަ ގޮތެއްގައި މަސައްކަތްތައް ބައްޓަންކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މަސައްކަތްޕުޅުގެ މިސްރާބެވެ.

ވެރިކަމާ ހަވާލުވެވަޑައިގެން މިވީ އަހަރަކާއި ދެމަސްދުވަހުގެ ތެރޭގައި ރާއްޖޭގެ ކޮންމެ ކައުންސިލަކާ ވަކިވަކިން ބައްދަލުކުރައްވާ ރައްޔިތުންނާ ކައުންސިލްތަކުގެ އަޑު ރައީސުލްޖުމްހޫރިއްޔާ ވަނީ އައްސަވާފައެވެ. ރާއްޖޭގެ ކޮންމެ ރަށަކަށް އަމިއްލަފުޅަށް ވަޑައިގެން ޚިޔަލާ މަޝްވަރާ އެމަނިކުފާނު ގެންދަވަނީ ހޯއްދަވަމުންނެވެ.

ކައުންސިލަތައް ބާރުވެރިކުރުމަށް ކުރާ މަސައްކަތުގައި ރައީސް ޑރ. މުޢިއްޒުގެ އެންމެ ބޮޑު ވިސްނުންފުޅަކީ ކައުންސިލްތައް މާލީގޮތުން ބާރުވެރިކުރުވާ، އަމިއްލަ ފައިމައްޗަށް ތެދުވެ، ރަށުގެ ތަރައްޤީއަށް ގިނަގުނަ މަސައްކަތްތައް ކުރާ ކައުންސިލްތަކަކަށް، އަތޮޅާއި ރަށު އަދި ސިޓީ ކައުންސިލްތައް ހެއްދެވުމެވެ.

ކައުންސިލްތަކަށް އާމްދަނީ އިތުރުކުރުމަށް ލިބޭ ފަހި ފުރުޞަތެއް!

ލާމަރުކަޒީ ނިޒާމު ހަރުދަނާކުރުމަށް ކުރާ މަސައްކަތުގައި މިއަދަކީ، ތާރީޚުގައި ލިޔެވިގެންދާ ދުވަހެކެވެ.

މިއީ ރާއްޖޭގެ އެންމެ އަގު ބޮޑު އެސެޓްތައް ލާމަރުކަޒުކުރެވި، ރައްޔިތުންގެ އަތްމައްޗަށް ދޫކޮށްލެވޭ ފުރަތަމަ ފަހަރެވެ. އިޤްތިޞާދީ މަސައްކަތް ކުރުމަށް ފުރަތަމަ ފަހަރަށް ކައުންސިލްތަކަށް ފަޅު ރަށްތަށް ދޫކުރި ފަހަރެވެ. އެ ރަށްތަކާމެދު އަމަލުކުރާނެ އުސޫލުތައް ކަނޑައަޅައި، އެ ރަށްތަކުގެ ސީދާ މަންފާ ރައްޔިތުންނަށް އެވަނީ ޚާއްސަކުރެވިފައެވެ.

މި މަސައްކަތަށް 28 ފަޅު ރަށެއް ކަނޑައެޅި، ފުރަތަމަ ބުރުގައި 3 ކައުންސިލަކަށް 4 ފަޅުރަށް މިވަނީ ދޫކޮށްފައެވެ. މިއީ، ކައުންސިލްގެ އިޚްތިޞާޞުން ބޭރުން، ފަޅުރަށްރަށް ކައުންސިލްތަކަށް ދޫކުރެވޭ އެންމެ ފުރަތަމަ ފަހަރެވެ. މިއީ ލާމަރުކަޒީ ނިޒާމުގެ ތާރީޚުގައި ދައުލަތުގެ ވަސީލަތްތައް ލާމަރުކަޒުކުރެވި، ކައުންސިލްތައް ބާރުވެރިކުރެވޭ ފުރަތަމަ ފަހަރުވެސްމެއެވެ.

މިއީ، ލާމަރުކަޒީ ނިޒާމު ހަރުދަނާކުރުމަށް ޚާއްސަ ޕްލޭނަކާއެކު ވަކި ވިސްނުމެއްގައި ކުރެވޭ ވަރަށް މުހިންމު މަސައްކަތެކެވެ. ރައީސުލްޖުމްހޫރިއްޔާގެ 100 ދުވަހުގެ ވަޢުދުތަކުގެ ތެރޭގައި ހިމެނިގެން، މި މަސައްކަތް ކުރިއަށްގެންދެވީ ފަޅު ރަށްތައް ދޫކުރުމާއި އަދި ލާމަރުކަޒީ ގަވާއިދުތަކާއި އުސޫލުތަކަށް ބަދަލު ގެންނަވައިގެންނެވެ.

މި ރަށްތައް ދޫކުރަނީ ކައުންސިލްތަކަށް ތަފާތު ގިނަ ވިޔަފާރިތައް އެ ރަށްތަކުގައި ކުރެވޭގޮތަށެވެ. އެގޮތުން ސިނާޢީ މަސައްކަތްތަކާއި ދަނޑުވެރިކަމާއި މަސްވެރިކަމާއި އަދި ފަތުވެރިކަމާ ގުޅުންހުރި ވިޔަފާރިތައްވެސް ކުރެވޭނެއެވެ. ނަމަވެސް މުޅި ރަށް އެއްކޮށް އިންވެސްޓަރަކަށް ކުއްޔަށް ދޫކޮށްގެން ކުރާ މަސައްކަތްތަކެއް ނުކުރެވޭނެއެވެ. އޭގެ ބަދަލުގައި ރައްޔިތުން ބައިވެރިކޮށްގެން ހިންގޭގެ އެކި ވިޔަފާރިތައް ކުރިއަށްގެންދިއުމަށް ސަރުކާރުން ބާރުއަޅައެވެ.

ކައުންސިލްތަކަށް ތާރީޚީ ކާމިޔާބެއް!

ފަޅު ރަށްތަށް ހަވާލުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާ ބެހޭ ވަޒީރު ޢާދަމް ޝަރީފް ޢުމަރު ވިދާޅުވީ މި ފެނިގެންދަނީ ލާމަރުކަޒީ ނިޒާމު ހަރުދަނާ ކުރެއްވުމަށް ރައީސުލްޖުމްހުރިއްޔާ ވެވަޑައިގެންނެވި ވަޢުދު ފުއްދަވަމުންދާ ތަންކަމަށެވެ.

ރައީސުލްޖުމްހޫރިއްޔާއަކީ ކައުންސިލްގެ މަސައްކަތްތައް ތަޖުރިބާ ކުރައްވާފައިވާ ބެފުޅަކަށްވާތީ، ކައުންސިލްތަކުގެ ބޭނުންތައް ވަރަށް ބޮޑަށް އެނގިވަޑައިގެން މަސައްކަތް ކުރައްވާ ބޭފުޅެއްކަމަށް ވަޒީރު ފާހަގަކުރެއްވިއެވެ.

"މީގެކުރިން މިފަދަ އެއްވެސް އުސޫލެއް ނެތް. ވަރަށް ޒިންމާދާރުކަމާއެކު ހަރުދަނާ ވިސްނުމުގައި މި މަސައްކަތް މި ކުރެއްވީ. ގިނަ ގޮންޖެހުންތަކާއެކުވެސް ކައުންސިލްގެ މަންފާތަކަށް މި އުސޫލު އެކުލަވާލީ." އާދަން ޝަރީފް ޢުމަރު ވިދާޅުވިއެވެ.

ކައުންސިލްތަކުން ފަޅު ރަށްތައް ހޯދުމުގެ ފުރުޞަތު މިހާރުވެސް އޮތީ ހުޅުވާލާފައެވެ. އެހެންކަމުން ކައުންސިލްތަކުން ރައްޔިތުންނާއެކު އިސްނަގައި މި ފުރުސަތުގެ ބޭނުން ހިފުމަށް އަވަސްވުމަކީ ރައީސުލްޖުމްހުރިއްޔާގެވެސް އެންމެ ބޮޑު އިލްތިމާސެވެ.

މިއަދު މި އެޅުއްވި ފިޔަވަޅާއެކު، ކައުންސިލްތްކުގެ ފުދުންތެރިކަން އިތުރުވެ، އޭގެ ހެޔޮ ނަތީޖާ ރައްޔިތުންނާއި ރަށުގެ ކުރިއެރުމަށް ފެންނާނެއެވެ.