ދިވެހި ކުންފުނިތަކަށް ދޭންޖެހޭ އިތުރު 500 މިލިޔަން ރުފިޔާ އަންނަ ހަފްތާގައި ދޫކުރާނަން: ރައީސް

ސަރުކާރުން ދިވެހި ކުންފުނިތައް މެދުވެރިކޮށް ހިންގާފައިވާ މަޝްރޫޢުތަކަށް ދައްކަންޖެހޭ ފައިސާގެ ތެރެއިން، އަންނަ ހަފްތާގެ ތެރޭގައި 500 މިލިއަން ރުފިޔާ ދޫކުރައްވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ހުވަދު އަތޮޅަށް ކުރައްވަމުންދާ ދަތުރުފުޅުގެތެރެއިން ގދ.ހޯނޑެއްދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ 2024ވަނަ އަހަރަށް ހެދި ބަޖެޓު އޮތީ، އައު ސަރުކާރަކަށް މަސައްކަތްތައް ކުރިއަށްގެންދަން ފުރުޞަތު ލިބޭގޮތަށް ނޫންކަމަށާއި އެބަޖެޓު އޮތީ އައު ސަރުކާރުގެ މަސައްކަތްތަކަށް ދަތިވާގޮތަށްކަމަށް ރައީސް ވިދާޅުވިއެވެ.

ރައީސް ވިދާޅުވީ އޭގެ ދަތިކަމާހުރެ ވަރަށް ގިނަ މަސައްކަތްތައް ހުރީ ހުއްޓިފައިކަމަށެވެ. އަދި ފަށާފައި ހުރި މަސައްކަތްތައްވެސް ކުރިއަށް ގޮސްފައިހުރީ ވަރަށް ލަސްކޮށްކަމަށެވެ. ރައީސް ވިދާޅުވީ ކުންފުނިތަކުގެ ބަޖެޓުގެ މައްސަލަތައް އިންތިހާއަށް އޮތްއިރު، ކުންފުނިތަކުން މަސައްކަތްކުރުވާފަ ދޭންޖެހޭ ފައިސާ ދިނުމަށް އެހީވުމަށް އަންނަ ހަފްތާގެ ތެރޭގައި ކުންފުނިތަކަށް ފައިސާ ދޫކުރައްވާނެކަމަށެވެ.

"އަންނަ ހަފްތާގައި ސަރުކާރުން 500 މިލިއަން ރުފިޔާ އެބަ ދޫކުރަން ދިވެހި ކުންފުނިތަކަށް. މީގެތެރޭގައި ކުދި އަދި މެދުފަންތީގެ ކުންފުނިތައް ހިމެނޭ. ސަރުކާރުން މަސައްކަތްކުރުވާފައި ފައިސާ ނުދީ އެތައް ކުންފުންޏެއް އެބަހުރި." ރައީސް ވިދާޅުވިއެވެ.

ރައީސް ވިދާޅުވީ ފެނަކަ، އާރްޑީސީ އެމްޓީސީސީ އަދި ވެމްކޯ ފަދަ ކުންފުނިތަކުން، އަމިއްލަ ކުންފުނިތައް މެދުވެރިކޮށް މަސައްކަތްކުރުވާފަ ބޮޑެތި އަދަދުތަކުން ފައިސާ ނުދައްކާ ހުރިކަމަށެވެ. މިހުރިހާ ފައިސާ ރޯދައިގެ ކުރިން ދައްކާ ޚަލާސްކުރުމަށް މަސައްކަތްކުރައްވަމުންދާކަމަށް ރައީސުލްޖުމްހޫރިއްޔާ ވިދާޅުވިއެވެ.

މިސަރުކާރުން ވެރިކަމާ ހަވާލުވިއިރު ދަޢުލަތުގެ ދަރަނި 200 ބިލިއަން ރުފިޔާއަށް އަރައެވެ. މީގެތެރޭގައި ދިވެހި ކުންފުނިތަކަށް ދައްކަންޖެހޭ 9 ބިލިއަން ރުފިޔާ ހިމެނެއެވެ. މި ފައިސާގެތެރެއިން ސަރުކާރުގެ ފުރަތަމަ އަހަރުގެތެރޭގައި 6.6 ބިލިއަން ރުފިޔާ ވަނީ ދައްކާފައެވެ.