ދަނގެތީގެ ރަށްގިރުމުގެ މައްސަލައަށް ހައްލު އަންނާނެގޮތަށް އަންނަ އަހަރު ބަނދަރު ތަރައްޤީކޮށްދޭނަން: ރައީސް

އަރިއަތޮޅު ދެކުނުބުރީ ދަނގެތީގެ ރައްޔިތުންނަށް މިވަގުތު ދިމާވެފައިވާ އެންމެ ބޮޑު އެއް މައްސަލައަކީ ބަނދަރުގެ ދަތިކަންކަމަށާއި، ރައްޔިތުން އެދޭގޮތަށް ބަނދަރު ތަރައްޤީކުރުމުގެ ޢަމަލީ މަސައްކަތް މި ފެށޭ އަހަރު ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ދަނގެތީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދަނގެތި ކައުންސިލާއެކު ބޭއްވެވި ބައްދަލުކުރެއްވުމުގައި ރަށަށް އެންމެ މުހިންމު ކަމެއްގެގޮތުގައި ފާހަގަކުރައްވާފައިވަނީ ބަނދަރުގެ މައްސަލަކަމަށެވެ. ބަނދަރުގެ ދަތިކަމަކީ ޒަމާންވީ ބޮޑު މައްސަލައެއްގެ ގޮތުގައި ފާހަގަކުރައްވަމުން ރައީސް ވިދާޅުވީ، ދަނގެތީގެ އިޤްތިޞާދު ކުރިއެރުމަށާއި، ރަށުގެ އިޖުތިމާޢީ، އަދި ލަފާފުރުމުގެ މައްސަލައަށް ހައްލެއް ގެނެސްދެއްވާނެކަމަށެވެ. އެގޮތުން އަންނަ އަހަރު ބަނދަރުގެ ޢަމަލީ މަސައްކަތް ފަށްޓަވައި، 2026 ވަނަ އަހަރު މަޝްރޫޢު ނިންމަވާނެކަމަށް ރައީސް ވިދާޅުވިއެވެ.

"ފެށޭ އަހަރު ދަނގެތީގެ ލޮބުވެތި ރައްޔިތުން އެދޭގޮތަށް އެހުރިހާ މައްސަލައެއް ހައްލުވާގޮތަށް ބަނދަރު ހަދައިދޭނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ ދަނގެތީގެ ބަނދަރު ތަރައްޤީކުރާނީ ދުރު މުސްތަގުބަލަށްވެސް ބޭނުންކުރެވޭނެގޮތަށްކަމަށެވެ.

ދަނގެއްޗަކީ ލޯކަލް ޓޫރިޒަމް ފުޅަވަމުން އަންނަ ރަށެކެވެ. މިވަގުތު 18 ގެސްޓް ހައުސް ހިންގަމުންދެއެވެ. ރައީސް ވަނީ އެރަށުގެ ލޯކަލް ޓޫރިޒަމްގައި ހަރަކާތްތެރިވަނީ ހަމައެކަނި އެރަށު މީހުންކަން ފާހަގަކުރައްވާ އެކަމަށް ތައުރީފްކުރައްވާފައެވެ.

އެހެންކަމުން ރައްޔިތުންގެ ކުރިއެރުމާއި ޓޫރިޒަމަށްވެސް ބަނދަރު ތަރައްޤީކުރުން މުހިންމުކަމަށާއި، މިއާއެކު ކުރިއަށް އޮތް ދެއަހަރު ދުވަހުގެތެރޭގައި ޓޫރިޒަމްގެ އެނދުގެ އަދަދު އެރަށޫގައި 600 އަށް އަރާނެކަމަށް ވިދާޅުވިއެވެ. އަދި ރަށުގެ ބަނދަރު ތަރައްޤީކުރާނީ ރަށްގިރުމުގެ މައްސަލައަށްވެސް ޙައްލު ގެނެވޭނެގޮތަށްކަމަށްވެސް ރައީސް ވިދާޅުވިއެވެ.

ރައީސް ވަނީ އަންނަ އަހަރުގެ ފަހުކޮޅު ނުވަތަ 2026 ވަނަ އަހަރު ދަނގެތީގެ ބިން ހިއްކައި ބޯހިޔާވަހިކަމުގެ މަޝްރޫޢު ހިންގަވާނެކަމަށްވެސް ވިދާޅުވެފައެވެ. މީގެ އިތުރުންވެސް ރަށުގެ ރައްޔިތުން އެދޭގޮތަށް ސަގާފީ ސެންޓަރެއްވެސް ހިންގައި ރައްކާތެރިގޮތުގައި ކުނި ނައްތާލެވޭނެ ނިޒާމުވެސް ޤާއިމްކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.