މިއަދުން ފެށިގެން ރާއްޖޭގައި ވޭޕް ވިއްކުމާއި ބޭނުންކުރުން މަނާ!

މިއަދުން ފެށިގެން ރާއްޖޭގައި ވޭޕް ބޭނުންކުރުމާއި ވޭޕްގެ ބާވަތްތައް ވިއްކުމާއި ހިލޭބެހުން މަނާވާނެއެވެ.

ވޭޕްގެ އެކި ބާވަތްތައް ރާއްޖެ އެތެރެކުރުމާއި ރާއްޖޭގައި ބޭނުންކުރުމާއި ހިލޭބެހުމާއި ވިއްކުން މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ މިދިޔަ އޮކްޓޫބަރު މަހުގެ 14 ވަނަ ދުވަހުއެވެ. ރައީސްގެ މި ނިންމެވުން ތަންފީޒްކުރެއްވުމަށް ދުންފަތް ކޮންޓްރޯލްކުރުމާބެހޭ ޤާނޫނު އިސްލާޙުކޮށް، އެ ޤާނޫނަށް ޢަމަލުކުރަން ފަށާފައިވަނީ މިދިޔަ މަހުގެ 15 ވަނަ ދުވަހުން ފެށިގެންނެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާޙުގައިވަނީ އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުން، މިދިޔަ މަހުގެ 15 ވަނަ ދުވަހުން ފެށިގެން މަނާވާނެ ކަމަށެވެ. އެއާ އެއްގޮތަށް ރާއްޖެއަށް ވޭޕް އެެތެރެކުރުން މިހާރު ވަނީ ހުއްޓާލާފައެވެ.

މީގެ އިތުރުން ރާއްޖޭގައި އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ބޭނުންކުރުމާއި ހިލޭބެހުމާއި ވިއްކުން މަނާކުރުމަށް ނިންމާފައިވަނީ މިމަހުގެ 15 ވަނަ ދުވަހުން ފެށިގެންނެވެ. އެހެންކަމުން ރާއްޖޭގައި ވޭޕު ބޭނުންކުރުމާއި ވިއްކުމާއި ހިލޭބެހުން މިއަދުން ފެށިގެން މަނާވާނެއެވެ. އަދި މި ގެއްލުންހުރި ޢަމަލުކުރާ މީހުންނާމެދު ޤާނޫނުގައި ބަޔާންކޮށްފައިވާ ފިޔަވަޅުތައް ތަންފީޒްކުރަން ފަށާނެއެވެ.

ވޭޕާ ގުޅިގެން އަޅާނެ ފިޔަވަޅުތައް:

ދުންފަތް ކޮންޓްރޯލްކުރުމާބެހޭ ޤާނޫނުގެ ދަށުން ރާއްޖެއަށް ވޭޕްގެ ބާވަތްތަކާއި އެއާއެކު ބޭނުންކުރުމަށް ތައްޔާރުކޮށްފައި ހުންނަ ބާވަތްތައް އެތެރެކޮށްފިނަމަ 50،000 ރުފިޔާއިން ޖޫރިމަނާ ކުރާނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕަކަށް 10،000 ރުފިޔާގެ މަގުން ޖޫރިމަނާކުރާނެއެވެ.

އަދި ވޭޕްކުރަން ބޭނުންކުރާ އެއްވެސް ބާވަތެއްގެ އާލާތެއް ރާއްޖޭގައި ވިއްކައިފިނަމަ، 20،000 ރުފިޔާއިން ޖޫރިމަނާކުރުމާއެކު ވިއްކި ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރާނެއެވެ. އަދި އެފަދަ އެއްޗެއް ހިލޭ ބަހައިފިނަމަ އެކަން ކުރި މީހަކު 10،000 ރުފިޔާއިން ޖޫރިމަނާކުރާނެއެވެ.

މީގެ އިތުރުން ވޭޕް ކުރުމަށް ބޭނުންކުރާ އެއްވެސް އާލާތެއް ކުޑަކުއްޖަކަށް ވިއްކައިފިނަމަ ނުވަތަ ހިލޭ ދީފިނަމަ އެފަދަ އާލާތްތައް ވިއްކުމުންނާއި ހިލޭ ބެހުމުންކުރާ ޖޫރިމަނާގެ އިތުރަށް 50،000 ރުފިޔާގެ ޖޫރިމަނާއެއް ކުރާނެކަމަށްވެސް މިހާރު އަމަލުކުރަން ފަށާފައިވާ އިސްލާހުގައި ވަނީ ބަޔާންކޮށްފައެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނެވުނު އެހެން އިސްލާޙުތަކަށް ބަލާލާއިރު، ރާއްޖޭގައި ހުއްދަ ލިބިގެން ވިއްކާ ދުންފަތުގެ އެއްވެސް ބާވަތެއް ގަނެ ވިއްކޭނީ 21 އަހަރުން މަތީގެ މީހުންނަށްކަމަށް ވަނީ ބަޔާންކޮށްފައެވެ. ކުރިން 18 އަހަރުން މަތީގެ ކޮންމެ މީހަކަށްވެސް ދުންފަތުގެ ބާވަތްތައް ގަނެވިއްކެއެވެ.

މި ޤާނޫނުގެ ދަށުން ދުންފަތުގެ އެއްވެސް ބާވަތެއް އެ ވިއްކާ ފަރާތަކުން އިސްތިހާރުކުރުމާއި، ޤާނޫނާ ޚިލާފަށް ދުންފަތުގެ ބާވަތްތައް އިސްތިހާރުކުރުމާއި، ސްޕޮންސަރކުރުމާއި، ޕްރޮމޯޓުކުރުން ވަނީ މަނާކޮށްފައެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނެވުނު އިސްލާޙުތަކާ ގުޅިގެން އިޞްލާޙުކުރަންޖެހޭ ގަވާއިދުތަކާއި އުޞޫލުތައް މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 60 ދުވަހުގެ ތެރޭގައި ހަދައި، ދިވެހިސަރުކާރުގެ ގެޒެޓުގައި ޝާއިޢުކުރަންޖެހޭނެއެވެ.

ރާއްޖޭގައި ވޭޕް ބޭނުންކުރުން މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ ވަރަށް މުހިންމު މަޤުޞަދެއްގައެވެ. އެއީ މިޤައުމުގެ މީހުންގެ މެދުގައި ހަރުދަނާކަމާއި ހުނަރުވެރިކަމާއި އުފެއްދުންތެރިކަން އަށަގެންނެވުމަށް ނިންމެވި ނިންމެވުމެކެވެ. އެއީ ދުޅަހެޔޮކަމާއި ޚުލްޤުވެރިކަމާއި މުރާލިކަން ދިވެހިންގެ މެދުގައި އަށަގެންނެވުމަށް އެޅުއްވި ފިޔަވަޅެކެވެ.

ވޭޕާއި ދުންފަތުގެ އުފެއްދުންތައް ބޭނުންކުރުމަކީ މިހާއަށް ބޮޑެތި ބަދަލުތަކެއް ގެންނަ ކަމެކެވެ. ޞިއްޙީ ގޮތުން މީހާ ބަލިކަށިކޮށްލާ ކަމެކެވެ. މިހާގެ އަޚުލާޤަށް ނުބައި އަސަރުތަކެއްކުރާ ކަމެކެވެ. ސިކުނޑި ކޮށިވާ ކަމެކެވެ. ނަތީޖާއަކަށްވަނީ އަޅުގަނޑުމެންގެ ކިބައިން އުފެއްދުންތެރިކަމާއި ހަރުދަނާކަން ބީވެ ދިޔުމެވެ. އެހެންކަމުން ރައީސްގެ ނިންމެވުމުގެ ސަބަބުން ޤައުމުގެ މުސްތަޤުބަލު އުޖާލާވެގެންދާނެކަމަށް ގިނަ ބަޔަކުދަނީ ބުނަމުންނެވެ.

ރައީސުލްޖުމްހޫރިއްޔާ ހަމައެކަނި ނިންމެވީ ވޭޕް ބޭނުންކުރުން މަނާކުރުމަށް އެކަންޏެއް ނޫނެވެ. ވޭޕް ބޭނުންކުރުން ހުއްޓުވުމަށް ނުވަތަ ދުންފަތާ ދުރުވުމަށް އެހީތެރިވުމަށްވެސް މުހިންމު ފިޔަވަޅުތަކެއް އެޅުއްވުމަށް ވަނީ ނިންމަވާފައެވެ. އެގޮތުން ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް ސިއްޙީ ޚިދުމަތްދޭ ހުރިހާ ތަނަކުން އެހީތެރިކަން ފޯރުކޮށްދޭނެ އިންތިޒާމް ހަމަޖެއްސުމުގެ މަސައްކަތް ސަރުކާރުން މިހާރު ވަނީ ފަށްޓަވާފައެވެ.

މީގެއިތުރުން ދުންފަތުގެ އިސްތިޢުމާލުނުކުރާ ރަށްރަށް ފާހަގަކުރުމަށް އިނާމެއް ތަޢާރުފުކުރުމަށާއި އެ އިނާމު ލިބޭ ރަށެއްގެ އިޖްތިމާޢީ ކަންކަމަށް މާލީ އެހީތެރިކަން ދިނުންފަދަ ކަންކަން ކުރުމަށްވެސް ސަރުކާރުން ވަނީ ނިންމަވާފައެވެ. އަދި ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ ބޭސް، އެސް.ޓީ.އޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލް ޤާއިމުކޮށްފައިވާ ރަށްތަކުން ލިބޭނެ އިންތިޒާމު ހަމަޖެއްސުމަށްވެސް ރައީސް ވަނީ ނިންމަވާފައެވެ.