އަރަބި އިސްލާމީ ޤައުމުތަކުގައި ރާއްޖެ އިޝްތިހާރުކުރުމަށް އަންނަ އަހަރު ރޯޑްޝޯއެއް ބާއްވަނީ

އަރަބި އިސްލާމީ ޤައުމުތައް ނުވަތަ މެދު އިރުމައްޗަށް އަމާޒުކޮށްގެން އަންނަ އަހަރު ރޯޑްޝޯއެއް ބޭއްވުމަށް ހަމަޖެހިފައިވާކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަންގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވެއްޖެއެވެ. ޝިއުރީ މިހެން ވިދާޅުވީ، ޕީއެސްއެމް ނިއުސްއިން ގެނެސްދޭ "ޚިދުމަތްތެރިން" ޕްރޮގްރާމްގައި ވާހަކަދައްކަވަމުންނެވެ.

ރާއްޖޭގެ ފަތުރުވެރިކަން ދުނިޔޭގެ އެކި ސަރަހައްދުތަކުގައި އިޝްތިހާރުކުރުމުގެ މަސައްކަތް އެމްއެމްޕީއާރުސީން އަންނަނީ ކުރަމުންނެވެ. ނަމަވެސް މީގެކުރިން އަރަބި އިސްލާމީ ޤައުމުތަކުގައި ރާއްޖެ އިޝްތިހާރުކުރުމަށް އެންމެ އެކަށީގެންވާ މަސައްކަތްތަކެއް ކުރެވިފައެއް ނުވެއެވެ.

"ޚިދުމަތްތެރިން" ޕްރޮގްރާމްގައި ވާހަކަދައްކަވަމުން އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވީ، އަންނަ އަހަރު މެދު އިރުމަތީގައި ރޯޑްޝޯއެއް ބޭއްވުމަށް މިހާރު ހަމަޖެހިފައިވާކަމަށެވެ. މި ރޯޑްޝޯ ކުރިއަށްގެންދާނީ މެދުއިރުމަތީގެ ހުރިހާ ޤައުމުތައް ހިމެނޭގޮތަށްކަން އޭނާ ފާހަގަކުރެއްވިއެވެ.

"ސައުދީ، ޤަތަރު، ދުބާއީ، ދެން ވަރަށް ފަހުން އަޅުގަނޑުމެންނަށް ބައްދަލުކުރި ގަލްފް އެއަރ ބަހްރެއިންގެ އެއަރލައިން. އެބޭފުޅުންވެސް ވަރަށް ސަޕޯޓިވް. އެބޭފުޅުންނާއި ވާހަކަދައްކައިގެން އެބޭފުޅުން ވިދާޅުވި ވިދާޅުވުމަކަށް އަޅުގަނޑުމެން މިހާރު ބަހްރެއިންވެސް އިންކްލޫޑްކޮށްފައި އިންނާނީ އިނގޭތޯ. ކުރިއަށްއޮތް އަހަރު އަޅުގަނޑުމެންނަށް ފެނިގެންދާނެ މިޑްލް އީސްޓަށްވެސް ހަމަ ފޯކަސްކޮށްގެން ރޯޑްޝޯތަކާއި މާކެޓިންގ އެކްޓިވިޓީތަކާއި ކުރިއަށްގެންދާތަން". ޝިއުރީ ވިދާޅުވިއެވެ.

މިއަހަރުގެ ފުރަތަމަ 10 މަސްދުވަހު މެދު އިރުމަތިން ރާއްޖެއަށް 67،224 ފަތުރުވެރިން ވަނީ ޒިޔާރަތްކޮށްފައެވެ. އެމްއެމްޕީއާރުސީގެ މާކެޓިން ހަރަކާތްތައް ކުރިއަށްގެންދަނީ އެއިރަކު އެންމެ މުހިންމު މާކެޓްތަކަށް އަމާޒުކޮށްގެންނެވެ. އަހަރުގެ ކުރީކޮޅު އިންޑިއާއިން ރާއްޖެއަށް އައި ފަތުރުވެރިންގެ އަދަދު ދަށްވުމާއި ގުޅިގެން އެމްއެމްޕީއާރުސީން ވަނީ އެ ޤައުމުގައި ރާއްޖެ އިޝްތިހާރުކުރުމަށް ބޮޑު ރޯޑްޝޯއެއް ބާއްވާފައެވެ.

ވެލްކަމް އިންޑިއާގެ ނަމުގައި ބޭއްވި މި ރޯޑްޝޯ އިންޑިއާގެ އެންމެ ބޮޑު 3 ސިޓީގައި ވަނީ ބާއްވާފައެވެ. މި ރޯޑްޝޯއަށްފަހު އިންޑިއާއިން ރާއްޖެ އަންނަ ފަތުރުވެރިންގެ އަދަދު އިތުރުވެފައިވާކަމަށް އެމްއެމްޕީއާރުސީން ވަނީ ވިދާޅުވެފައެވެ.