އަސްކަރީ ޤާބިލިއްޔަތުކަން ވަރުގަދަކޮށް، އިޤްތިޞާދު ބިނާކުރުމުގައި ކާމިޔާބު 52 ހަފްތާ!

"އިރާދަކުރެއްވީތީ، މިއަދަކީ ޒަމާންތަކަކަށްފަހު، ދިވެހީން ދިވެހީންގެ ރާއްޖެއަށް އަލުން އެނބުރި ދިޔުމުގެ ޚާއްޞަ ދަތުރަށް ރިޔާ ކޮށާލި ދުވަސް. މި ވަގުތަކީ ދިވެހީންގެ އުންމީދުތައް ހާސިލުކޮށްދީ، ކަންބޮޑުވުންތައް ހައްލުކޮށްދިނުމުގެ ލޮބުވެތި ވިންދުތައް އަޅުގަނޑުމެންގެ ހިތްތަކުން ޖަހަމުންދާ ވަގުތު."

މިއީ 2023 ވަނަ އަހަރު ބޭއްވި ރިޔާސީ އިންތިޚާބު ކާމިޔާބުކުރައްވާ، ދިވެހި ޒަޢާމަތާ ހަވާލުވެވަޑައިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޤައުމާ މުޚާޠަބުކުރައްވައި ދެއްވި ފުރަތަމަ ތަޤުރީރު ފަށްޓަވަމުން އެންމެ ފުރަތަމަ ވިދާޅުވި ބަސްކޮޅެވެ. މިއަދު އެމަނިކުފާނުގެ ސަރުކާރަށް އަހަރެއްފުރުން ފާހަގަކުރަމުންދާއިރު، ދިވެހިންގެ ހުރި ބޮޑެތި ކަންބޮޑުވުންތަކަށް ޙައްލު ހޯދުމަށް އެމަނިކުފާނު ފެށްޓެވި މަސައްކަތުގައިވެސް މުހިންމު ކުރިއެރުންތަކަކާއި ކާމިޔާބީއެއް މިވަނީ ހޯދާފައެވެ.

ރައީސް ޑރ. މުޢިއްޒުގެ ރިޔާސީ ވަޢުފުޅުތަކުގެ ތެރެއިން އެންމެ މުހިއްމު އެއް ވައުދުފުޅަކީ ގޮތް ނޭނގޭ އެއްބަސްވުންތަކެއްގެ ތެރެއިން ރާއްޖޭގައި ޤާއިމްވެ ތިބި ބޭރުގެ ސިފައިން ރާއްޖެއިން ފޮނުވާލެއްވުމެވެ. އެގޮތުން ރާއްޖޭގައި ބޭރުގެ އެއްވެސް ޤައުމެއްގެ ސިފައިން ތިބެގެން ނުވާނެކަމަށާއި ދިވެހި ޤައުމުގައި ޤާއިމްވެތިބި ހުރިހާ ބޭރުގެ ސިފައިން ޑިޕްލޮމެޓިކް ރިވެތި އުޞޫލުގެ ދަށުން އަނބުރާ ޤައުމަށް ފޮނުވާލައްވާނެކަމަށް އެމަނިކުފާނު ވެވަޑައިގެންނެވި ވަޢުދުފުޅު، އެމަނިކުފާނުގެ ވެރިކަމުގެ އެންމެ ފުރަތަމަ އަހަރުގެ ތެރޭގައި މިވަނީ ފުއްދަވާފައެވެ.

ހަމައެހެންމެ ރާއްޖޭގެ ޤައުމީ ދިފާޢީ ބާރުގެ އަސްކަރީ ޤާބިލުކަން އިތުރުކޮށް ވަރުގަދަކުރެއްވުމަށްޓަކާވެސް ރައީސް ޑރ. މުޢިއްޒުގެ ސަރުކާރުގެ ފުރަތަމަ 52 ހަފްތާގެ ތެރޭގައި މިވަނީ މުހިންމު ފިޔަވަޅުތަކެއް އަޅުއްވާފައެވެ. މިގޮތުން އެންމެ ފާހަގަކޮށްލެއްވޭ އެއް މަސައްކަތަކީ ދިވެހި ޤައުމީ ދިފާޢީ ބާރުގައި ފުރަތަމަ ފަހަރަށް ވައިގެ ގޮތްޕެއް އުފައްދަވާ، އެންމެފަހުގެ ޒަމާނީ ޑްރޯންތަކާއެކު ރާއްޖޭގެ ސަރަޙައްދު 24 ގަޑިއިރު ބެލެހެއްޓޭނެ ޤާބިލުކަން ޤާއިމުކޮށްދެއްވުމެވެ.

ދިވެހި ސިފައިންގެ ޚިދުމަތަށް މުޅިން އަލަށް ތަޢާރަފުކުރި އާންމޭންޑް އޭރިއަލް ވެހިކަލް، ޔޫއޭވީތަކަކީ 220 ކިލޯމީޓަރުގެ ބާރުމިނުގައި މެދުނުކެނޑި 20 ގަޑިއިރު ދުއްވުމުގެ ޤާބިލްކަން ލިބިފައިވާ އުޅަނދުތަކެކެވެ. އަދި ރޭގަނޑު އަނދިރީގައިވެސް ސަރޗް އެންޑް ރެސްކިއު އޮޕަރޭޝަންތައް ހިންގުމުގެ ޤާބިލުކަން މި އުޅަނދަށް ލިބިފައިވެއެވެ.

މީގެ އިތުރުން ދިވެހިރާއްޖޭގެ ކަނޑުގެ ސަލާމަތީ ފައުޖެއްގެ ގޮތުގައި އެމްއެންޑީއެފް ކޯސްޓްގާޑްގެ އެލީޓް ޔުނިޓް، ސްޕެޝަލް ބޯޓް ސްކޮޑްރަން، ރައީސުލްޖުމްހޫރިއްޔާ ވަނީ އިފްތިތާޙްކޮށްދެއްވާފައެވެ. އަލަށް އިފުތިތާހުކުރި އެސްބީއެސްއަކީ އެމްއެންޑީއެފް ކޯސްޓްގާޑްގެ ތެރޭގައި ޚާއްޞަ ތަމްރީނު ލިބިފައިވާ އެލީޓް މެރިޓައިމް ޔުނިޓެކެވެ. މިއީ މެރިޓައިމް ޑޮމެއިންގައި ރެޕިޑް ރެސްޕޮންސްއާއި ހައި ސްޓޭކްސް އޮޕަރޭޝަންތަކަށް ޚާއްޞަ ޔުނިޓެކެވެ.

ދިވެހި ފުލުހުންގެ ޚިދުމަތާއި، ޤައުމީ ދިފާޢީ ބާރުގެ އޮޕަރޭޝަނަލް ކެޕޭސިޓީ އިތުރުކޮށްދިނުމަށްޓަކާ ބޭނުންވާ ވަޞީލަތްތައް އިތުރުކުރުމަށް މިފެށޭ 2025 ވަނަ އަހަރުގެ ބަޖެޓުގެ ތެރެއިންނާއި ބޭރުގެ އެހީގައި މުހިންމު މަސައްކަތްތަކެއް ކުރައްވާނެކަމަށް މިއަހަރުގެ ނަޞްރުގެ ދުވަހު ބޭއްވެވި ރަސްމީ ޖަލްސާގައި ރައީސް ޑރ. މުޢިއްޒު ވަނީ ވިދާޅުވެފައެވެ.

މަޑުޖެހިފައިވާ ބިޔަ މަޝްރޫޢުތައް އަލުން ހިނގަން ފެށުން!

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގަތީ، ރާއްޖޭގެ އިޤްތިޞާދު ހީނަރުވެ، ތަރައްޤީގެ މަޝްރޫޢުތައް މަޑުޖެހި، ރައްޔިތުންގެ ކަންބޮޑުވުންތައް އިންތިހާއަށް އިތުރުވެފައި އޮތް ދަނޑިވަޅެއްގައެވެ.

ވެރިކަމަށްވަޑައިގެން އެމަނިކުފާނަށް އެންމެ ފުރަތަމަވެސް ކުރިމަތިލައްވަން ޖެހިވަޑައިގެންނެވި އިމްތިޙާނަކީ ރާއްޖޭގެ އިޤްތިޞާދު ހަމަ މަގަށް އެޅުވުމެވެ. އެހެންކަމުން ކުރީ ސަރުކާރުން ވާރުތަވި ދަރަނިތައް މެނޭޖްކުރުމާއި، އިޤްތިޞާދީ ދުވެލި އަދި ތަރައްޤީގެ އިންޖީނު އަލުން ހިންގައިގަތުމަށް ރައީސް ޑރ. މުޢިއްޒު ވަނީ އަވަސް ފިޔަވަޅުތަކެއް ދައުރުގެ އެންމެ ކުރީކޮޅު އަޅުއްވަން ފަށްޓަވާފައެވެ.

މިގޮތުން އެންމެ މުހިންމު އެއް މަސައްކަތަކީ ޢުމްރާނީ ތަރައްޤީގެ ރޮނގުން ރާއްޖޭގައި މިވަގުތު ކުރިއަށްދާ އެންމެ ބިޔަ ދެ މަޝްރޫޢުކަމަށްވާ ވެލާނާ އިންޓަރނޭޝަނަލް އެއަރޕޯޓް ޒަމާނީ ފެންވަރަށް ތަރައްޤީކުރުމާއި، ތިލަމާލޭ ބްރިޖުގެ މަސައްކަތުގެ ސްޕީޑް އަވަސްކުރެއްވުމެވެ. މި ދެ މަޝްރޫޢަށް އިންވެސްޓްކުރާ ޑޯނަރ ޕާޓްނަރުންނާއި، މަޝްރޫޢުގެ ޢަމަލީ މަސައްކަތްކުރިއަށްދާ ކޮންޓްރެކްޓަރުންނާއެކު ސަރުކާރުން ބޭއްވެވި މަތީފަންތީގެ މަޝްވަރާތަކާއެކު މި ދެ މަޝްރޫޢުގެ ދުވެލިވެސް މިހާރު ވަނީ ބޮޑުތަނުން އަވަސްކުރެވިފައެވެ.

ތިލަމާލޭ ބްރިޖުގެ މަސައްކަތަށް ބަލާއިރު، މިދިޔަ އަހަރުގެ އޮކްޓޫބަރު މަހުގެ 15 ވަނަ ދުވަހާއި ހަމައަށް ނިމިފައިވަނީ ބްރިޖުގެ އެންމެ %28.70 މަސައްކަތްކަމަށެވެ. އެހެންނަމަވެސް މިއަހަރުގެ އޮކްޓޫބަރު މަހުގެ 15 ވަނަ ދުވަހާއި ހަމައަށް، މިވޭތުވެދިޔަ 52 ހަފްތާގެ ތެރޭގައި ބްރިޖުގެ %46.58 މަސައްކަތް ވަނީ ނިމިފައެވެ.

އެކި ފަހަރު އެކި ތާރީޚްތައް ދެމުންދިޔަ މި މަޝްރޫޢުވެސް ކަނޑައަޅާފައިވާ ޓައިމްލައިނަށްވުރެ ދިގުދެމިގެންދިޔަ ނަމަވެސް މިހާރުގެ އަންދާޒާއަކީ މިފެށޭ 2025 ވަނަ އަހަރު ބޮޑެތި ކުރިއެރުންތަކެއް މި މަޝްރޫޢުގެ ތެރެއިންވެސް ލިބިގެންދާނެކަމަށެވެ.

ވީއައިއޭ ޒަމާނީ ފެންވަރަށް ތަރައްޤީކުރުމަށް ހިންގާ ބިޔަ މަޝްރޫޢުގެ މަސައްކަތް އަވަސްކުރުމަށް ކުރެވޭ މަސައްކަތްތަކުގެ ތެރެއިން އައު ފަޔަރ ސްޓޭޝަނާއި، އައު ކާގޯ ޓަރމިނަލާއި، އައު ފިއުލް ފާމާއި ފިއުލް ހައިޑްރަންޓް ނިޒާމުގެ މަސައްކަތް ނިންމާ މިހާރު ވަނީ ބޭނުންކުރަން ފަށާފައެވެ.

މި މަޝްރޫޢުގެ ތެރެއިން މިހާރު އެންމެ ބާރަށް ކުރިއަށްދާ މަސައްކަތަކީ އަހަރަކު 7 މިލިޔަން ފަތުރުވެރިންނަށް ޚިދުމަތްދެވޭ ފެންވަރަށް ތަރައްޤީކުރަމުންދާ އައު އިންޓަރނޭޝަނަލް ޕަސެންޖަރ ޓަރމިނަލްގެ މަސައްކަތް ނިންމުމެވެ.

މި ޓަރމިނަލަށް ބޭނުންވާ ކޮންސްޓްރަކްޝަންގެ ހުރިހާ މަސައްކަތެއްހެން މިހާރު ވަނީ ނިމިފައެވެ. އަދި މިހާރު ކުރިއަށްދަނީ އެއިރޯ ބްރިޖްތަކާއި ޓަރމިނަލް އޮޕަރޭޝަނަލައިޒް ކުރުމަށް ބޭނުންވާ ވަޞީލަތްތައް ޤާއިމުކޮށް، އެތެރޭގައި ކުރަންޖެހޭ މަސައްކަތްތަކެވެ.

ސަރުކާރުގެ އަމާޒަކީ މިތަން އަންނަ އަހަރުގެ ފުރަތަމަ ކުއަރޓަރުގެ ތެރޭގައި ފުލްފްލެޖްޑް ތަނެއްގެ ގޮތުގައި އޮޕަރޭޝަނަށް ގެނައުމެވެ.

ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ ބިޔަ މަޝްރޫޢުގެ ފުރަތަމަ ފިޔަވަހީގެ މަސައްކަތްތައް މިހާރުވެސް ކުރިއަށްދާއިރު، ވީއައިއޭގެ ތަރައްޤީ އިތުރު ހަރުފަތަކަށް ގެންދިއުމަށްޓަކާ މިއަހަރުގެ ޖެނުއަރީމަހުގެ 4 ވަނަ ދުވަހު ވަނީ މި މަޝްރޫޢުގެ ދެވަނަ ފިޔަވަހިވެސް އިފްތިތާޙްކޮށްފައެވެ.

ދެވަނަ ފިޔަވަހީގެ ތެރެއިން އެއަރޕޯޓުގެ ޓަރމިނަލާއި ތެޔޮ ރައްކާކުރުމާއި ޕާކިން ކެޕޭސިޓީ އެތައް ގުނައެއް އިތުރުކުރެވިގެންދާނެއެވެ. ހަމައެހެންމެ އެއަރޕޯޓު ކައިރީ އޮތް ފުނަދޫ ޚާއްސަ އިކޮނޮމިކް ޒޯނެއްގެ ގޮތުގައި ތަރައްޤީކުރުން ހިމެނެއެވެ. މިއާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ އަހަރަކު 25 މިލިޔަން ފަސިންޖަރުންނަށް ޚިދުމަތް ދެވޭ ފެންވަރަށް މައި އެއަރޕޯޓް ގެނައުމެވެ.

އިޤްތިޞާދު ކޮޅަށް ޖަހައި، ސިންދަފާތު ކުރުމަށް މުހިންމު މަޝްރޫޢުތަކެއް!

ރާއްޖޭގެ އިޤްތިޞާދީ ދުވެލި ހަލުވިކޮށް، ބޭރުގެ ދަރަނި މެނޭޖްކުރުމަށް ރައީސް ޑރ. މުޢިއްޒު ނިންމެވި އެންމެ ހަރުދަނާ އެއް ނިންމެވުމަކީ ފައިސާ ޗާޕުކުރަމުންދިޔަ ދިޔުން ހުއްޓާލެއްވުމެވެ. އެމަނިކުފާނު މިހާރުވެސް ދެއްވާ ޔަޤީންކަމަކީ ދެންވެސް މި ސަރުކާރުން ޤައުމު ހިންގާނީ ޕަބްލިކް އެކައުންޓް އޯވަރޑްރޯ ނުވަތަ ފައިސާ ޗާޕުނުކޮށްކަމުގެ ޔަޤީންކަމެވެ.

ނިމިދިޔަ ސަރުކާރުން އެކި ފަރާތްތަކަށް ދައްކަންޖެހޭ ބިލުތަކާއި މުވައްޒަފުންނަށް މުސާރަ ދިނުމަށް 8 ބިލިޔަން ރުފިޔާއަށްވުރެ ބޮޑު އަދަދެއް ޗާޕުކޮށްފައިވާއިރު، މި ސަރުކާރުން ދައުލަތުގެ ޚަރަދުތައް ހަމަޖައްސަމުން ދަނީ އެއްވެސް ވަރަކަށް ފައިސާ ޗާޕުނުކޮށްކަން އެއީ މާލީ އިދާރާތަކުން ތަޢުރީފާއެކު ފާހަގަކުރާ ކަންކަމެވެ. އެއްވެސް ވަރަކަށް ފައިސާ ޗާޕުނުކޮށް، އާމްދަނީ ހޯދައިގެން އެކި ފަރާތްތަކަށް ދައްކަން އޮތް 13 ބިލިޔަނަށް ވުރެ ގިނަ ރުފިޔާ ރައީސް ޑރ. މުޢިއްޒުގެ ސަރުކާރުން ވަނީ ދައްކާ ޚަލާސްކޮށްފައެވެ.

މިއާއެކު ރައީސުލްޖުމްހޫރިއްޔާ ޑރ. މުޢިއްޒު ފެށްޓެވި އަނެއް މުހިންމު މަސައްކަތަކީ ރާއްޖޭގެ އިޤްތިޞާދު ހަމައެކަނި ފަތުރުވެރިކަމަށް ބަރޯސާވެފައި އޮތްއޮތުން ނިމުމަކަށް ގެންނަވާ، އަމްދަނީ ލިބޭނެ އިތުރު ސިނާޢަތްތަކާއި މަސައްކަތްތައް ތަޢާރަފުކުރެއްވުމެވެ. އެގޮތުން ރާއްޖޭގެ އުތުރާއި ދެކުނުގައި ސްޕެޝަލް އިކޮނޮމިކް ޒޯންތައް ޤާއިމުކުރެއްވުމާއި، އުތުރުތިލަފަޅުގައި ދަނޑުވެރިކަމަށް ޚާއްސަ އިޤްތިޞާދީ ސަރަޙައްދެއް ޤާއިމުކުރެއްވުމާއި، ރާއްޖޭގައި މެރިކަލްޗަރ ސިނާޢަތް ތަރައްޤީކުރުމަށް ސަރަޙައްދުތައް ކަނޑައެޅުއްވުމާއި، ބަންކަރިންގެ ޚިދުމަތް ތަޢާރަފުކުރެއްވުމަށް ނިންމެވި ނިންމެވުމަކީ މިގޮތުން ކުރެވުނު މުހިންމު މަސައްކަތްތަކެކެވެ.

ބަންކަރިންގެ ޚިދުމަތުން މިހާތަނަށް 1.5 މިލިޔަން އެމެރިކާ ޑޮލަރުގެ އާމްދަނީއެއް ލިބިފައިވާކަން ސަރުކާރުން ވަނީ ހާމަކުރައްވާފައެވެ. ބަންކަރިންގެ ޚިދުމަތް ފެށުމުން އޭގެ ތެރެއަށް މުޅިން އަލަށް 400 މިލިޔަން ޑޮލަރު ވަންނާނެކަމަށް ސަރުކާރުން ލަފާކުރައްވައެވެ. މިއާއެކު 6 ބިލިޔަން ދިވެހި ރުފިޔާގެ މުޅިން އައު ސިނާއަތެއް އުފެދޭނަކަމަށް ސަރުކާރުން ވިދާޅުވެއެވެ.

ހަމައެހެންމެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް ޑިވެލޮޕްމެންޓް ބޭންކް އޮފް މޯލްޑިވްސް ލިމިޓެޑްގެ ނަމުގައި ދިވެހި ސަރުކާރުގެ ސައްތައިންސައްތަ ޙިއްޞާ އެކުލެވިގެންވާ، ސަރުކާރުގެ ބޭންކެއް ވަނީ ޤާއިމުކުރައްވާފައެވެ.

މި ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދެވި ބޭންކެކެވެ.

މި ބޭންކްގެ ޚިދުމަތް ފެށުމުން، އިޤްތިޞާދީ އަދި މާލީ ކުރިއެރުމަށް ބޭނުންވާ ދިގު މުއްދަތުގެ ފައިނޭންސިންގެ ޚިދުމަތް ދިވެހިރާއްޖޭގައި ތަޢާރަފު ވެގެންދާނެކަމަށް ސަރުކާރުން ވިދާޅުވެއެވެ. މި ބޭންކް ހުޅުވުމަކީ ދިވެހިރާއްޖޭގެ މާލީ ދާއިރާ ހަރުދަނާކަމާއެކު ފުޅާކޮށް ތަރައްޤީ ކުރުމަށް އެޅިގެންދާނެ މުހިންމު ފިޔަވަޅެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ 5 އަހަރުގެ ދަޢުރު ނިމޭއިރު، އެމަނިކުފާނުގެ މެނިފެސްޓޯގައި ހިމެނޭ ތަޞައްވުރާ އެއްގޮތަށް ގިނަ މަޝްރޫޢުތަކެއް ހިންގާ އޭގެ ޚިދުމަތާއި މަންފާ ރައްޔިތުންނަށް ލިބުމެވެ.

މަޑުޖެހިފައި ހުރި ތަރައްޤީގެ މަސައްކަތް އަލުން ފަށައި، ތަރައްޤީގެ ދުވެލި މެކުހަށް ޖެހުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ އިސްކަންދެއްވާ މަސައްކަތްކަން އެމަނިކުފާނުގެ ވެރިކަމުގެ ފުރަތަމަ 52 ހަފްތާގެ ތެރޭގައި ރައްޔިތުންނަށް މިވަނީ ސާބިތުކޮށްދެއްވާފައެވެ.