ވެމްކޯގެ "ފަތުރުވެށި" ޚިދުމަތާއި އިތުރު 3 ރިސޯޓު ގުޅިއްޖެ

ވޭސްޓް މެނޭޖުމަންޓް ކޯޕަރޭޝަން، ވެމްކޯގެ ރިސޯޓުތަކުން ކުނި ނަގައިދިނުމުގެ ޚިދުމަތް "ފަތުރުވެށި" ޚިދުމަތާއި އިތުރު 3 ރިސޯޓެއް ގުޅިއްޖެއެވެ.

ވެމްކޯއިން ކުނި ނަގައިދިނުމުގެ ޚިދުމަތް ލިބިގަތުމުގެ ގޮތުން، މި ޚިދުމަތަށް އަލަށް ގުޅުނު ރިސޯޓުތަކާއެކު އެއްބަސްވުމެއްގައި ވަނީ ސޮއިކޮށްފައެވެ.

ވެމްކޯގެ މެނޭޖިންގ ޑިރެކްޓަރ މުޖްތަބާ ޖަލީލު ވިދާޅުވީ، މީގެ ކުރިން ރިސޯޓުތަކުގެ ކުނި ތިލަފުށްޓާ ހަމައަށް ގެންނަނީ އަމިއްލަ ފަރާތްތަކުން ކަމަށެވެ. މިގޮތަށް ކުނި ގެންނައިރު، ބައެއް ކުނި ކަނޑައަށް އެޅިފައިހުންނަކަން ފާހަގަވާކަމަށް މުޖްތަބާ ވިދާޅުވިއެވެ. އެހެންކަމުން އެންމެ ރަނގަޅު ގޮތަކީ ވެމްކޯގެ ކުނި ގެންދިޔުމުގެ ޚިދުމަތާ ގުޅުންކަމަށް މުޖްތަބާ ވިދާޅުވިއެވެ.

މުޖްތަބާ ވިދާޅުވީ ރިސޯޓުތަކުގެ ކުނި އުކާލުމަށް ކުންފުނީގައި ހަރުދަނާ ޒަމާނީ ނިޒާމެއް މިހާރު ޤާއިމްކުރެވިފައިވާ ކަމަށެވެ.

"މި ޚިދުމަތުން އަޅުގަނޑުމެން ޚަރަދުކުރަންޖެހެނީ ލޮޖިސްޓިކަށް އެކަނި. މި ޚިދުމަތުގެ ސަބަބުން ކުންފުންޏަށް ބޮޑު އާމްދަނީއެއް ލިބޭނެ. އަޅުގަނޑުމެންގެ އަމާޒަކީ ރާއްޖޭގެ ހުރިހާ ރިސޯޓެއްވެސް ވެމްކޯގެ ކުނި ނަގައިދިނުމުގެ ޚިދުމަތަށް ގެނައުން." މުޖްތަބާ ވިދާޅުވިއެވެ.

ވެމްކޯއިން ރިސޯޓުތަކުން ކުނި ނަގައިދިނުމުގެ ޚިދުމަތް ފަށާފައިވަނީ މިއަހަރުގެ ޖުލައި މަހުގެ 11 ވަނަ ދުވަހުއެވެ. މި ޚިދުމަތް ލިބިގަންނަން ފެށި އެންމެ ފުރަތަމަ ރިސޯޓުތަކަކީ ކޮރާކޮރާ މޯލްޑިވްސްއާއި އަލިލާކޮޓެއިފަރާއި ނޮކު މޯލްޑިވްސްއެވެ.

މި ޚިދުމަތާ އަލަށް ގުޅުނު 3 ރިސޯޓަކީ މަލާހިނި ކުޑަބަނޑޮސްް މޯލްޑިވްސްއާއި، ޖުމައިރާ އޮޅަހަލި މޯލްޑިވްސްއާއި މޫވެންޕްކް ކުރެދިވަރު މޯލްޑިވްސްއެވެ. އަދި އިތުރު ދެ ރިސޯޓަކާއެކު މި ޚިދުމަތާ ގުޅުމުގެ އެއްބަސްވުމުގައި ސޮއިކުރެވޭނެ ކަމަށާއި އޭރުން ޖުމްލަ 8 ރިސޯޓަށް ޚިދުމަތް ދެވެން ފެށޭނެކަމަށް ވެމްކޯއިން ވިދާޅުވެއެވެ.

ވެމްކޯއިން ވިދާޅުވީ، ރިސޯޓުތަކުން އުފައްދާ ކުނި ނަގައިދޭން ފަށާފައިވަނީ ކުންފުނީގެ ސަރަޙައްދީ ޓްރާންސްފރ ސްޓޭޝަންތަކަށް ކުނި ގެންދިއުމުގައި ރިސޯޓުތަކަށް ގޮންޖެހުންތަކާ ކުރިމަތިލާންޖެހޭތީ މި މައްސަލަ ހައްލުކުރުމަށް ކަމަށެވެ. އެހެންކަމުން މި ޚިދުމަތަށް ރަޖިސްޓްރީކުރާ ހުރިހާ ރިސޯޓްތަކަށްވެސް ވެމްކޯގެ އުޅަނދުތަކުގައި ކުނި ނަގައިދޭނެކަމަށް ވެމްކޯއިން ވިދާޅުވިއެވެ.