ދެމެހެއްޓެނިވި ގޮތެއްގައި ދަނޑުވެރިކަން ކުރިއަރުވަން ސަރުކާރުން ދަނީ މަސައްކަތް ކުރަމުން: ވަޒީރު ޑރ.ރަމީލާ

ދެމެހެއްޓެނިވި ގޮތެއްގައި ދަނޑުވެރިކަން ކުރިއެރުވުމަށް ސަރުކާރުން ގެންދަވަނީ މަސައްކަތް ކުރަމުން ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. ޢާއިޝަތު ރަމީލާ ވިދާޅުވެއްޖެއެވެ.

ވަޒީރު މިހެން ވިދާޅުވީ، ދެކުނު އޭޝިއާ ސަރަޙައްދުގައި ކްލައިމެޓް ސްމާޓް އެގްރިކަލްޗަރ ކުރިއެރުވުމަށް ސާކް އެގްރިކަލްޗަރ ސެންޓަރުން ކުރިއަށްގެންދާ ހައި ލެވެލް ޕޮލިސީ ފޯރަމްގައި ވާހަކަފުޅުދައްކަމުންނެވެ.

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވީ، ދެމެހެއްޓެނިވި ގޮތެއްގައި ދަނޑުވެރިކަން ކުރިއެރުވުމަށް ސަރުކާރުން މަސައްކަތް ކުރަމުންދާކަމަށެވެ. އެގޮތުން މި ސަރަޙައްދުގެ ރައްޔިތުންނަށް ކާބޯތަކެތީގެ ރައްކާތެރިކަމާއި އިޤްތިޞާދީ ފުރުޞަތުތައް ކަށަވަރުކޮށްދިނުމާއެކު، ބަދަލުވަމުންދާ މޫސުމާއި ދެމެހެއްޓެނިވި ދަނޑުވެރިކަމުގެ ދާއިރާއަކަށް ވާސިލުވުމަށް މިފަދަ ބައްދަލުވުންތަކަކީ މުހިންމު ބައްދަލުވުންތަކެއްކަމަށް ވަޒީރު ވިދާޅުވިއެވެ.

ދެކުނު އޭޝިއާއަކީ ދުނިޔޭގެ އާބާދީގެ ބޮޑު ބައެއް ދިރިއުޅޭ ސަރަޙައްދެއްކަން ފާހަގަކުރައްވާ ވަޒީރު ވިދާޅުވީ، މިއީ މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާ އެއް ސަރަޙައްދުކަމަށެވެ. އެގޮތުން ކަނޑުގެ ލޮނުގަނޑު އުފުލުމާއި މޫސުމީ ބަދަލުތަކުގެ ސަބަބުން ދަނޑުވެރިކަމުގެ އުފެއްދުންތެރިކަމާއި ކާބޯތަކެތީގެ ރައްކާތެރިކަމަށް ވަރަށް ބޮޑަށް އަސަރުކުރާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، ރާއްޖެފަދަ ޖަޒީރާ ޤައުމުތަކުން ރަށްގިރުމާއި ކަނޑުގެ ލޮނުގަނޑު އުފުލުމުގެ މައްސަލަތަކާއި ވަރަށް ބޮޑަށް ކުރިމަތިލާން ޖެހޭކަމަށެވެ. އެހެންކަމުން ދެމެހެއްޓެނިވި ތަރައްޤީއާއި މޫސުމަށް އަންނަ ބަދަލުތަކާއި އެކުވެސް ދަނޑުވެރިކަން ކުރެވޭނެ ގޮތް ސަރުކާރުން ފަހިކުރަމުންދާކަމަށް ވަޒީރު ވިދާޅުވިއެވެ.

"ދަނޑުވެރިކަމާއި، ގޮނޑުދޮށް ބެލެހެއްޓުމާއި، ކާރިސާތަކަށް އިޖާބަދިނުމަށް އަމާޒުކޮށްގެން ހިންގާ ޕްރޮގްރާމްތަކަކީ އަޅުގަނޑުމެންގެ ދިގު މުއްދަތުގެ ހޭނުވުމުގެ ސްޓްރެޓެޖީގެ މުހިންމު ބައިތަކެއް. މީގެ އިތުރުން، ބަދަލުވަމުންދާ މޫސުމުގެ ޙާލަތްތަކަށް އަޅުގަނޑުމެންގެ ދަނޑުވެރިކަމުގެ ދާއިރާ ހޭނުވުމަށްޓަކައި ވަރޓިކަލް ފަރމިންގ، ބަޔޮލޮޖިކަލް ޕެސްޓް ކޮންޓްރޯލް، އަދި ދުޅަހެޔޮ ގަސްގަހާގެހީގެ
ބާވަތްތައް ފަދަ މަޝްރޫޢުތައް ވަނީ ތަޢާރަފުކުރެވިފައި." ރަމީލާ ވިދާޅުވިއެވެ.

ދަނޑުވެރިކަމާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވީ، ދަނޑުވެރިކަމުގެ މުސްތަޤްބަލަށް ސައިންސްގެ އަލީގައި ބަދަލުގެނެވޭނެ ޙައްލުތައް ހޯދުމަށް ކުރެވޭ މަސައްކަތްތަކުގައި ފުޑް ޕޮލިސީ ރިސަރޗް އިންސްޓިޓިއުޓްއިން އަދާކުރަނީ މުހިންމު ދައުރެއްކަމަށެވެ.

އެގޮތުން ސައިންސްގެ އަލީގައި ހޯދާ ހޯދުންތައް މެދުވެރިކޮށް ރާއްޖެފަދަ ޤައުމުތަކަށް ސައިންސްގެ މައްޗަށް ބިނާކޮށް އެކުލަވާލެވޭ ސިޔާސަތުތަކުގެ ވަސީލަތްތަކާއި މަޢުލޫމާތުތައް ފޯރުކޮށްދިނުމުގައި މުހިންމު ދައުރެއް އަދާކުރާކަން ވަޒީރު ފާހަގަކުރެއްވިއެވެ.

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވީ، މިފަދަ ބައްދަލުވުންތަކަކީ ރާއްޖޭގެ ދަނޑުވެރިކަމަށް އިތުރު ކުރިއެރުންތަކެއް ގެނުވަދޭނެ ބައްދަލުވުންތަކެއްކަމަށް ޤަބޫލުފުޅުކުރައްވާކަމަށެވެ.

މި ފޯރަމްގެ ތެރެއިން ދަނޑުވެރިކަމާބެހޭ ވަޒީރު ޑރ. ޢާއިޝަތު ރަމީލާ ވަނީ އީޖާދީ ވަޞީލަތްތަކުގެ އެހީގައި ދެމެހެއްޓެނިވި ދަނޑުވެރިކަމަކަށް ކުރެވިދާނެ މުހިންމު މަސައްކަތްތަކާއި، މި ދާއިރާއިން ހޭލުންތެރިކަން އިތުރުކުރުމަށް ތައްޔާރުކޮށްފައިވާ ޚާއްސަ ލީފްލެޓްތަކާއި، ވީޑިއޯ މެޓީރިއަލްތަކެއް ލޯންޗްކޮށްދެއްވާފައެވެ.

ކްލައިމެޓް ސްމާޓް އެގްރިކަލްޗަރ ކުރިއެރުވުމަށް ސާކް އެގްރިކަލްޗަރ ސެންޓަރއިން ކުރިއަށްގެންދާ ސަރަޙައްދީ މަޝްރޫޢެއް ކަމުގައިވާ "ކޮންސޯޓިއަމް ފޮރ ސްކޭލިންގ އަޕް ކްލައިމެޓް ސްމާޓް އެގްރިކަލްޗަރއިން ސައުތު އޭޝިއާ" މަޝްރޫޢަކީ 2021 ވަނަ އަހަރުން ފެށިގެން މި ސަރަޙައްދުގެ 6 ޤައުމެއްގައި ކުރިއަށް ގެންދާ މަޝްރޫޢެކެވެ. މަޝްރޫޢުގެ ޢަމަލީ މަސައްކަތްތައް ހިނގަމުންދަނީ ބަންގްލަދޭޝް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީލަންކާގައެވެ.

ދިވެހިރާއްޖެއަކީ މި ސަރަޙައްދުގައި ހިމެނޭ އެހެން ޤައުމުތަކެކޭ އެއްފަދައިން ހަނޑުލާއި ގޮވާމުގެ ބާވަތްތައް ހައްދާ ޤައުމަކަށް ނުވިނަމަވެސް، މި މަޝްރޫޢުގައި ހިމެނޭ ކްލައިމެޓް ސްމާޓް އެގްރިކަލްޗަރއާއި މައުލޫމާތު ޙިއްޞާކުރުމަށް ހިންގާ އެކި ޕްރޮގްރާމްތަކާއި ހަރަކާތްތަކުގައި ބައިވެރިވުމުގެ ފުރުޞަތު މި މަޝްރޫޢުގެ ދަށުން ދިވެހިރާއްޖެއަށް ދަނީ ލިބެމުންނެވެ.

މި ފޯރަމަކީ ޕްރޮޖެޓުގެ މަސައްކަތްތައް މިހާރު ގޮސްފައިވާ މިންވަރު ދެނެގަތުމަށާއި، އެކި ޤައުމުތަކުގައި މި މަޝްރޫޢުގެ ދަށުން ކުރަމުންގެންދާ މަސައްކަތްތަކުގެ މައުލޫމާތު ޙިއްޞާ ކުރުމުގެ އިތުރުން މަޝްރޫޢުގެ މަޤްޞަދުތައް ޙާޞިލް ކުރުމަށް ކުރަން ހުރި މަސައްކަތްތަކާއި ގުޅޭ ގޮތުން
މެންބަރުންގެ މެދުގައި މަޝްވަރާކުރުމަށް ބޭއްވޭ ބައްދަލުވުމެކެވެ. 2023 ވަނަ އަހަރުގެ ސްޓިއަރިން ކޮމިޓީ ބައްދަލުވުން ބާއްވާފައިވަނީ ސްރީލަންކާގައެވެ.