ކުރީ ސަރުކާރުން މަޝްރޫޢުތައް ހިންގާފައިވަނީ އެއްވެސް އިޚްލާސްތެރިކަމެއް ނެތި އަމިއްލަ މަންފާއަށް: ވަޒީރު ޑރ.މުއްޠަލިބު

ކުރީ ސަރުކާރުން މަޝްރޫޢުތައް ހިންގާފައިވަނީ އެއްވެސް އިޚްލާސްތެރިކަމެއް ނެތި އަމިއްލަ މަންފާއަށްކަމަށް ޢުމްރާނީ ތަރައްޤީއާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. ވަޒީރު ވަނީ ކުރީ ސަރުކާރުން ހިންގާފައިވާ ބޮޑެތި އެތައް މަޝްރޫޢެއް ހިންގާފައިވާގޮތް ހާމަކުރައްވާފައެވެ.

"ހަފްތާ 52" ޕެނަލް ޑިސްކަޝަންގައި ވާހަކަފުޅުދައްކަވަމުން ޢުމްރާނީ ތަރައްޤީއާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ ތަރައްޤީގެ މަޝްރޫޢުތައް ޕްލޭންކޮށް ހިންގުމަށް ޒިންމާވާންޖެހޭ ވުޒާރާއެއްގެ ގޮތުގައި ކުރީގެ ނޭޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މިނިސްޓްރީއެއް އޮތްނަމަވެސް ބޮޑެތި ބައެއް މަޝްރޫޢުތައް އެ މިނިސްޓްރީގެ ބައިވެރިވުމެއް ނެތި ހިނގާފައިވާކަމަށެވެ.

އެގޮތުން ހަނިމާދޫ އިންޓަރނޭޝަނަލް އެއަރޕޯޓު މަޝްރޫއާއި، ގަމު އިންޓަރނޭޝަނަލް އެއަރޕޯޓާއި ފެލިވަރު މަސް ފެކްޓްރީގެ މަސައްކަތް އިޢުލާންކޮށް އެކަން ކުރިއަށްގެންދިޔައީ އޭރުގެ މިނިސްޓްރީ އޮފް އިކޮނޮމިކް ޑިވެލޮޕްމަންޓުންކަމަށް ވަޒީރު ޑރ. މުއްޠަލިބު ވިދާޅުވިއެވެ. ވަޒީރު ވިދާޅުވީ، މިފަދަ ބޮޑެތި މަޝްރޫޢުތައް ޕްލޭންކުރުމުގައި ކަމާގުޅޭ އިދާރާތަކުގެ ޓެކްނިކަލް މީހުން ބޭނުން ނުކުރުމުން ބޭކާރު ގިނަ މަސައްކަތްތަކެއް ކޮށްފައިވާކަމަށެވެ.

"ހަގީގަތުގައި މިހުންނަނީ، ވަރަށް ބޮޑަށް ރޭވިގެން ރައްޔިތުންނަށް އެންމެ ފައިދާވާގޮތަށް، ބެލުމެއް ނެތި ސިޔާސީ މަންފާއަށް ކުރެވިފައިވާ މަސައްކަތްތަކެއް. ކުރީގެ ރައީސްގެ އަމިއްލަފުޅު ރަށް، ހިންނަވަރުގައި އެބައަޅާ 100 ހައުސިން ޔުނިޓުގެ މަސައްކަތް މިހާރުވެސް. 2024 ވަނަ އަހަރުގެ ބަޖެތުގައި އިނީ 1.9 މިލިއަން ރުފިޔާ. 2025 ވަނަ އަހަރު ޕްރޮޖެކްޓް ނިމެންޖެހޭ. 2025 އަށް އެސްޓިމޭޓްކޮށްފައިވާ ބަޖެޓަކީ 1.4 މިލިއަން ރުފިޔާ. މިދައްކަނީ ބިމުން މައްޗަށް ނާރާ މަސައްކަތް މާބޮޑަށް ކުރިއަށް ނުގޮސްހުރި 100 މިލިއަން ރުފިޔާގެ ޕްރޮޖެކްޓެއްގެ ވާހަކަ. މިއީ ބަޖެޓު ހަދަން އެއްވެސް ކަހަލަ ވިސްނުމެއް ހުރެގެންކޮށްފައިވާކަމެއް ނޫން. ރައްޔިތުންގެ ލޮލުގައި އަނދުން އެޅުވުމަށްޓަކައި ކޮށްފައިވާ ކަންކަން." ވަޒީރު ވިދާޅުވިއެވެ.

މިފަދަ ބައެއް މަޝްރޫޢުތަކުން މިސާލު ޖައްސަވަމުން ވަޒީރު ވިދާޅުވީ، ހަނިމާދޫ އިންޓަރނޭޝަނަލް އެއަރޕޯޓުގައި 1 ކިލޯމީޓަރުގެ ފިއުލް ޖެޓީއެއް ޤާއިމުކުރަން ނުޖެހޭނެކަމަށެވެ. ސަބަބަކީ ހަނިމާދޫއަކީ ފަޅު ފުން ސަރަޙައްދެއްކަމުން ފަޅު ތެރެއަށް ތެޔޮ ބާޖެއް ވައްދައިގެންވެސް އެކަން ކުރެވޭނެކަން ވަޒީރު ފާހަގަކުރެއްވިއެވެ.

15 މިލިއަން ޑޮލަރު ޚަރަދުކޮށްގެން ތަރައްޤީކުރަން ފަށާފައި އޮތް މި ފިއުލް ޖެޓީގެ މަސައްކަތް ނުހުއްޓާ ސަރުކާރުން ކުރިއަށްގެންދަނީ އެމަސައްކަތް ހުއްޓާލައިފިނަމަ މިހާރު ދައުލަތަށް ލިބޭ މާލީ ގެއްލުން ބޮޑުވާނެތީކަމަށް ވަޒީރު ވިދާޅުވިއެވެ.

މީގެއިތުރުން ގިރާވަރު ފަޅު ހިއްކުމަށް އިކޮނޮމިކް މިނިސްޓްރީގެ ދަށުން ހިންގަމުންދިޔަ މޯލްޑިވްސް ފަންޑް މެނޭޖްމަންޓް ކުންފުންޏާއި ޙަވާލުކޮށްފައިވާއިރު އެއީ މަޝްރޫޢު ހިންގާ ކުންފުންޏެއް ނޫންކަމަށާއި އެއީ ދައުލަތުގެ ފަންޑު މެނޭޖްކޮށް ޢާމްދަނީ ހޯދުމަށް އުފައްދާފައިވާ ކުންފުންޏެއްކަމަށް ވަޒީރު ވިދާޅުވިއެވެ.

މިގޮތުން އެކި ފަހަރުމަތިން އެޑްވާންސްގެ ގޮތުގައި 40 ހަކަށް މިލިޔަން ޑޮލަރު އެކުންފުންޏަށް ދައްކާފައިވާކަން ވަޒީރު ފާހަގަކުރެއްވިއެވެ. އަދި މަޝްރޫޢަކީ ރައްޔިތުންނާއި ގުޅުންހުރި މަޝްރޫޢުއެއްކަމުން މަސައްކަތް އަވަހަށް ނިންމުމަށް މިސަރުކާރު ޙަވާލުވުމަށްފަހުވެސް އެޑްވާންސްގެ ބާކީ ދައްކާފައިވީނަމަވެސް އަދިވެސް މަސައްކަތް ކުރިއަށް ނުދާކަން ވަޒީރު ފާހަގަކުރެއްވިއެވެ.

ވަޒީރުގެ ވާހަކަފުޅުގައިވަނީ ގުޅިފަޅުން ގޯތި ދިނުމަށް ކުރީ ސަރުކާރުން މަސައްކަތްކޮށްފައިވާގޮތަށްވެސް ކަންބޮޑުވުން ފާޅުކުރައްވާފައެވެ. އެގޮތުން ރައްޔިތުންނަށް ބޭނުންވާ އަސާސީ އެއްވެސް ޚިދުމަތެއް ދެވޭނެ ޖާގަ ނުދީ ގޯތި ދޫކޮށްފައިވާކަން ވަޒީރު ފާހަގަކުރެއްވިއެވެ. އަދި ކުރީ ސަރުކާރުން މަސައްކަތްކޮށްފައިވަނީ ކޮންމެ ގޮތަކުން ވެރިކަމަށް އައުމަށް ކަމަށާއި އެއްވެސް ގޮތަކަށް ރައްޔިތުންގެ ހެވާއި ލާބައަށް ނޫންކަމަށް ވަޒީރުވަނީ ވިދާޅުވެފައެވެ.