ކުނި މެނޭޖްކުރުމުގެ ދާއިރާއިން ތަމްރީންވުމަށް 14 ދިވެހިން ނިއު ދިއްލީއަށް
-
ތަމްރީން ކުރިއަށްދާނީ 4 ދުވަހުގެ މުއްދަތަކަށް
-
ކުނި މެނޭޖްކުރުން ހަރުދަނާކުރުމަށް ސަރުކާރުން ގިނަ މަސައްކަތްތަކެއްކުރޭ
ރަށްރަށުގައި ކުނި މެނޭޖްކުރުމުގެ މަސައްކަތް ހަރުދަނާކުރުމުގެ ގޮތުން އަތޮޅުތަކުގެ ރަށްތަކުން ހޮވާލެވުނު 14 ދިވެއްސަކު ތަމްރީނަށް އިންޑިޔާއަށް ފުރައިފިއެވެ.
މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން ވިދާޅުވީ ކުނި މެނޭޖްކުރުމުގެ ދާއިރާއިން ދިވެހިން ތަމްރީންކުރުމަށް ހަމަޖެހިފައިވަނީ ނިއު ދިއްލީގައި ހުންނަ ޓެރީ ސްކޫލް އޮފް އެޑްވާންސްޑް ސްޓަޑީޒްއިން ކަމަށެވެ. އެގޮތުން އެ އިންސްޓިޓިއުޓްއިން ކުރިއަށްގެންދާ "ވޭސްޓް މެނޭޖްމަންޓް ސިސްޓަމްސް: އޮޕަރޭޝަން އެންޑް މެއިންޓަނަންސް" ޕްރޮގުރާމް ތަމްރީންނަށް ދިޔަ ދިވެހިން ފުރިހަމަކުރާނެކަމަށް އެ ވުޒާރާއިން ވިދާޅުވިއެވެ.
މި ތަމްރީން ކުރިއަށްދާނީ 4 ދުވަހުގެ މުއްދަތަކަށެވެ. ކުނި މެނޭޖްކުރުމުގެ ދާއިރާއިން ދިވެހިން ތަމްރީންކުރުމަށް ހަމަޖެހިފައިވަނީ ރަށްރަށުގައި ކުނި މެނޭޖްކުރުމުގެ މަސައްކަތް ހަރުދަނާކޮށް، ރައްކާތެރިކަމާއެކު ކުނި މެނޭޖްކުރެވޭކަން ކަށަވަރުކުރުމުގެ ގޮތުންނެވެ.
ރާއްޖޭގައި ކުނި މެނޭޖްކުރުމުގެ ދާއިރާ ހަރުދަނާކޮށް، ކުރިއެރުވުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ކުނި މެނޭޖްކުރަން ބޭނުންވާ ވެހިކަލާއި އާލާތްތައް ތިމާވެށްޓާބެހޭ ވުޒާރާއިން ދަނީ ރަށްރަށަށް ފޯރުކޮށްދެމުންނެވެ. އަދި ދެމެހެއްޓެނިވި ގޮތެއްގައި ކުނި މެނޭޖްކުރުމަށް ރީޖަނަލް ކުނި މެނޭޖްކުރާ ސެންޓަރުތަކެއް ރާއްޖޭގެ 3 ސަރަހައްދެއްގައި ތަރައްޤީކުރުމަށް ސަރުކާރުން ވަނީ ނިންމަވާފައެވެ.
ކުނިން ގަސް ކާނާ އުފެއްދުމަށް ބޭނުންކުރާ މެކޭނިކަލް ކޮމްޕޯސްޓަރު ރަށްރަށުގައި ޤާއިމްކުރުމާއި ކުނިން ހަކަތަ އުފެއްދޭނެ ނިޒާމުތައް ޤާއިމްކުރުމުގެ މަސައްކަތްވެސް ތިމާވެށްޓާބެހޭ ވުޒާރާއިން ދަނީ ކުރައްވަމުންނެވެ.