މުދާ އުފުލާ ބޯޓުތަކުގެ ދަތުރުތައް އިންޑިއާއިން ސީދާ ކުޅުދުއްފުއްޓަށް ފެށުމަށް، މަޝްވަރާ ބައްދަލުވުމެއް
-
އެމްޕީއެލްގެ އިސްވެރިންވަނީ ކުޅުދުއްފުށި ސިޓީގެ ވިޔަފާރިވެރިންނާ ބައްދަލުކުރައްވާފައި
-
އިންޑިއާއިން ޕެރިޝަބަލް އަދި ޖެނެރަލް ކާގޯ އުފުލާ ބޯޓުތަކުގެ ދަތުރުތައް ފަށާނީ ކުޅުދުއްފުއްޓަށް
ޕެރިޝަބަލް އާއި ޖެނެރަލް ކާގޯ އުފުލާ ބޯޓު ދަތުރުތައް އިންޑިއާގެ ޓުޓިކޮރިންއިން ސީދާ ކުޅުދުއްފުށި ސިޓީއަށް ފެށުމާ ގުޅޭގޮތުން އެސިޓީގެ ބައެއް ވިޔަފާރިވެރިންނާއި އެމްޕީއެލްގެ އިސްވެރިން ބައްދަލުކުރައްވައިފިއެވެ.
އެމްޕީއެލްގެ އިސްވެރިން ކުޅުދުއްފުށި ސިޓީއަށް ޒިޔާރަތްކުރައްވާ އެރަށުގެ ވިޔަފާރިވެރިންނާ ބައްދަލުކުރައްވައި، ޕެރިޝަބަލް އާއި ޖެނެރަލް ކާގޯ އުފުލާ ބޯޓުތައް އިންޑިއާގެ ޓުޓިކޮރިންއިން ކުޅުދުއްފުށި ސިޓީއަށް ސީދާ ދަތުރުތައް ފެށުމާ ގުޅޭގޮތުން ވަނީ މަޝްވަރާކުރައްވާފައެވެ.
ޕެރިޝަބަލް އަދި ޖެނެރަލް ކާގޯ އުފުލާ ބޯޓުތައް އިންޑިއާގެ ޓުޓިކޮރިންއިން ކުޅުދުއްފުށި ސިޓީއަށް ސީދާ ދަތުރުތައް ފެށުމާއި ގުޅޭގޮތުން މަޝްވަރާކުރުމަށް ސީ.އީ.އޯ މުޙައްމަދު ވަޖީހް އަދި މެނޭޖްމަންޓްގެ ޓީމުން ވަނީ މިއަދު ކުޅުދުއްފުށި ސިޓީގެ ބައެެއް ވިޔަފާރިވެރިންނާއި ބައްދަލުކޮށްފައި.… pic.twitter.com/6m6YMmPGNv
— Maldives Ports Limited (@Portmv) November 10, 2024
އިންޑިއާއިން ދާއިމީ ގޮތަކަށް ކުޅުދުއްފުށި ސިޓީއަށް ޕެރިޝަބަލް މުދާ އެތެރެކުރެވޭ ގޮތް ހެދުމަށް މަސައްކަތް ކުރަމުންދާއިރު އެމްޕީއެލްއިން މިހާރު އަންނަނީ އިންޑިއާގެ ޓުޓިކޮރިން އިން އައްޑޫ ސިޓީއަށް ޕެރިޝަބަލް މުދާ އެތެރެކުރަމުންނެވެ. ޖުލައިމަހުގެތެރޭގައި ފެށި މި ޚިދުމަތުގެ ފުރަތަމަ ޝިޕްމަންޓްގައި 150 ޓަނުގެ މުދާ ވަނީ ގެނެސްފައެވެ.
ކުރިން އިންޑިއާގެ ޓުޓިކޮރިންއިން އައްޑޫ ސިޓީއަށް، އަވަހަށް ހަލާކުވާ ޒާތުގެ ކާބޯތަކެތި ނުވަތަ ޕެރިޝަބަލް ކާގޯ ގެންނަމުން އައީ ލަކުޑި ބޯޓުތަކުގައެވެ. އެހެންނަމަވެސް އިންޑިއާގެ ފައިނެސް ގްރޫޕް މެދުވެރިކޮށް މިހާރު އެފަދަ މުދާ ގެންނަނީ ދަގަނޑު ބޯޓުފަހަރުގައެވެ.
އެމްޕީއެލްއިން އަންނަނީ ސަރަހައްދީ ބަނދަރތައް ތަރައްޤީކުރުމުގެ މަސައްކަތްވެސް ކުރަމުންނެވެ. އެމްޕީއެލްއިން ބުނެފައިވަނީ މިވީ 19 ވަރަކަށް އަހަރުތެރޭ ކުޅުދުއްފުށި ސިޓީގެ ބަނދަރަށް އެއްވެސް ތަރައްޤީއެއް އައިސްފައިނުވާކަމަށެވެ. އަދި އެތަން ހިންގަމުން އައިސްފައިވަނީ ގެއްލުމުގައި ކަމަށެވެ. އެހެންނަމަވެސް އެބަނދަރަކީވެސް ފައިދާ ލިބޭނެ ތަނަކަށް ހެދުމަށް މިހާރު މަސައްކަތްތައް ފަށާފައިވާކަމަށް އެމްޕީއެލްއިން ވިދާޅުވެއެވެ.
ކުޅުދުއްފުށީ ޕޯޓުގައި ބޯޓު ޔާޑެއް ހިންގުމުގެ މަސައްކަތްތައް ފެށުމަށް ތައްޔާރުވަމުން އަންނަކަމަށާއި އެތަން ޚާއްސަކުރުމަށް ހަމަޖެހިފައިވަނީ ފައިބަރުން ބޯޓު ބަނުމަށްކަމަށް އެމްޕީއެލްއިން ވިދާޅުވިއެވެ. އަދި އެޕޯޓަށް ފަސޭހައިން ބޯޓުފަހަރު ގާތްކުރެވޭގޮތަށް ޖެޓީ ހެދުމުގެ މަސައްކަތް ކުރަމުން އަންނަކަމަށްވެސް މީގެކުރިން އެމްޕީއެލުން ވިދާޅުވެފައިވެއެވެ.