ގޮންޖެހުންތަކާއެކުވެސް އައު ސިނާއަތްތައް ތަޢާރަފްކުރުމުގެ މަސައްކަތުގައި ސަރުކާރުން ފަހަތަށް ނުޖެހޭނެ: ވަޒީރު ސަޢީދު

ރާއްޖެއަށް އައު ސިނާއަތްތައް ތަޢާރަފްކުރުމަކީ ގިނަ ގޮންޖެހުންތަކެއް ހުރި ކަމެއް ކަމަށާއި އެހެން ނަމަވެސް އެކަމުގައި ސަރުކާރުން ފަހަތަށް ނުޖެހޭނެކަމަށް އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ވަޒީރު މިހެން ވިދާޅުވީ އިހަވަންދިއްޕޮޅުގައި ތަރައްޤީކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު"ގެ ޕޯޓު ތަރައްޤީކުރުމާއި، މަޝްރޫޢާއި ގުޅުންހުރި އިތުރު މަސައްކަތްތައްކުރުމަށް ސިންގަޕޫރުގެ ކެޕިޓަލް އޭޝިއާ އިންވެސްޓުމަންޓު ކުންފުންޏާއެކު ފްރޭމްވޯކް އެއްބަސްވުމެއްގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މީގެ ފަންސާހަކަށް އަހަރު ކުރިން ރާއްޖެއަށް ފަތުރުވެރިކަން ތަޢާރަފްވެގެންދިޔައީވެސް ގިނަ ގޮންޖެހުންތަކާއި އެކުކަން ފާހަގަކުރައްވަމުން އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު ވިދާޅުވީ ރާއްޖޭގައި ފަތުރުވެރިކަން ކާމިޔާބުކަމާއި އެކު ނުހިންގޭނެ ކަމަށް ބުނަމުން ދިޔަބަޔަކުވެސް ތިބިކަަމަށެވެ. އެހެންނަމަވެސް މިހާރު ރާއްޖެއަކީ ފަތުރުވެރިކަމުގެ ދާއިރާގައި އެންމެ ކުރީ ސަފުގައި ގުނާލެވޭ ޤައުމެއް ކަމަށް ވަޒީރު ސަޢީދު ވިދާޅުވިއެވެ.

"ވަރަށް ގިނަ ބަޔަކު ސުވާލު އުފެއްދި ރާއްޖޭގައި ފަތުރުވެރިކަން ތަރައްޤީވުމާއި މެދު، އެކަމަށް ބޭނުންވާ ވަސީލަތްތައްވެސް ނެތް ކަމަށް ބުނަމުން ދިޔަ، އެހެން ނަމަވެސް މިހާރު ދުނިޔެއިން މިކަމުގައި ސުވާލެއް ނުއުފައްދާނެ،" ވަޒީރު ސައީދު ވިދާޅުވިއެވެ.

ވަޒީރު ސައީދު ވިދާޅުވީ ރާއްޖެއަށް އައު ސިނާއަތްތައް ތައާރަފްކުރުމަށް ގިނަ ފުރުޞަތުތަކެއް އެބަހުރި ކަމަށެވެ. އެހެންނަމަވެސް މިހާ ޒަމާންވީ އިރުވެސް އެކަމަށް އަޅަން ޖެހޭ ފިޔަވަޅުތައް އަޅާފައި ނުވާކަން ވަޒީރު ފާހަގަކުރެއްވިއެވެ.

ރައީސުލްޖުމްހުރިއްޔާ ޑރ. މުހައްމަދު މުޢިއްޒުގެ ވިސްނުންފުޅު ހުރީ މި ފުރުޞަތުތަކުގެ ބޭނުން ހިފާ ރާއްޖެ ތަރައްޤީގެ އެހެން ހަރުފަތަކަށް ގެންދިޔުމަށް ކަމަށް ވަޒީރު ސައީދު ވިދާޅުވިއެވެ.

"ކުރީ ސަރުކާރުތަކުންވެސް މިކަމާއި ވިސްނާފައި އޮވެދާނެ، އެހެންނަމަވެސް އެކަމަށް އަޅަންޖެހޭ ފިޔަވަޅުތައް އަޅާފައިނުވޭ،އެހެންނަމަވެސް މިކަމުގައި ރައީސް ޑރ. މުޢިއްޒު ފަހަތަށް ނުޖެހޭނެ" ވަޒީރު ވިދާޅުވިއެވެ.

އަދުގެ ސަރުކާރުން މަސައްކަތްކުރަމުންދަނީ ރާއްޖޭގެ އިޤްތިސާދަށް އައު ސިނާއަތްތައް ތައާރަފްކޮށް ރާއްޖެއަށް މާލީ ގޮތުންނާއި އިޤްތިސާދީގޮތުން ގިނަ ކުރިއެރުންތަކެއް ގެނައުމެވެ. އެގޮތުން ދާދިފަހުން ރާއްޖެއަށް ވަނީ ބަންކަރިންގެ ޚިދުމަތް ތަޢާރަފްކޮށްފައެވެ. އަދި މީގެއިތުރަށްވެސް ތަރައްޤީގެ ބިޔަ އެތައް މަޝްރޫޢުތަކެއް ފެށުމަށް ސަރުކާރުން ދަނީ ތައްޔާރުވަމުންނެވެ.