ވީއައިއޭގެ އައު ފިއުލް ފާމާއި ފިއުލް ހައިޑްރަންޓްގެ ޚިދުމަތް ރައީސް ފަށްޓަވައިދެއްވައިފި

ވެލާނާ އިންޓަރނޭޝަނަލް އެއަރޕޯޓްގެ އައު ފިއުލް ފާމާއި ފިއުލް ހައިޑްރަންޓް ނިޒާމުގެ ޚިދުމަތް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިފްތިތާޙުކޮށްދެއްވައިފިއެވެ.

މިކަމަށްޓަކައި ވެލާނާ އިންޓަރނޭޝަނަލް އެއަރޕޯޓްގައި ޚާއްސަ ރަސްމިއްޔާތެއްވަނީ ބާއްވާފައެވެ. މި ރަސްމިއްޔާތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އާއި އެމަނިކުފާނުގެ ނައިބު އަލްއުސްތާޛު ޙުސައިން މުޙައްމަދު ލަތީފާއި، ސަރުކާރާއި އެމްއޭސީއެލްގެ އިސްވެރިން ބައިވެރިވެވަޑައިގެންނެވިއެވެ. އަދި އެއަރލައިންތަކުންވެސް ބައިވެރިވިއެވެ.

މިރަސްމިއްޔާތުގައި ވާހަކަދައްކަވަމުން އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރ އިބްރާޙިމް ޝަރީފް މުޙައްމަދު ވިދާޅުވީ ކުރިން ބޭނުންކުރި ފިއުލް ފާމަކީ 13 މިލިއަން ލީޓަރުގެ ތެޔޮ ރައްކާކުރެވޭ ފާމެއްކަމަށެވެ. ނަމަވެސް އަލަށް ތަރައްޤީކޮށް ބޭނުންކުރަން ފެށި ފިއުލް ފާމުގައި 45 މިލިއަން ލީޓަރުގެ ޖެޓް ފިއުލް ރައްކާކުރެވޭނެކަމަށެވެ. އަދި މީގެ އިތުރުން 1 މިލިއަން ލީޓަރުގެ ޑީސަލާއި، 100،000 ލީޓަރުގެ ޕެޓްރޯލް ރައްކާކުރެވޭނެއެވެ.

ޝަރީފް ވިދާޅުވީ ފިއުލް ހައިޑްރަންޓް ނެޓްވޯކާއެކު، ފްލައިޓްތަކަށް ތެޔޮ އެޅުމަށް ހޭދަވާ ވަގުތު ވަރަށް ބޮޑަށް ކުޑަކުރެވޭނެކަމަށެވެ. މިޚިދުމަތް ދިނުމަށް 8.4 ކިލޯމީޓަރުގެ ވިއުގައެއް ވަނީ އަޅާފައެވެ. މި ނިޒާމް ބޭނުންކޮށްގެން އެއްފަހަރާ 7 ބޯޓަށް ތެޔޮ އެޅުމުގެ ޚިދުމަތް ދެވޭނެކަމަށް އެމްއޭސީއެލްއިން ފާހަގަކުރައްވައެވެ.

"60 ހާސް ލީޓަރުގެ 2 ބައުޒަރު ކުރިން ބޭނުންކުރީ. 1 ގަޑިއިރާ 30މިނެޓު ހޭދަވޭ ބޮޑު ބޯޓަކަށް ތެޔޮ އަޅަން. މި ސިސްޓަމާއެކު މިއިން 45 ވަރަކަށް މިނެޓު އެބަ ސަލާމަތްވޭ." އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރ އިބްރާހިމް ޝަރީފް މުޙައްމަދު ވިދާޅުވިއެވެ.

ޝަރީފް ވިދާޅުވީ ކުރިން އޮތް ޕްލޭނަށް ބަލާއިރު، މި ޚިދުމަތްތައް ދިނުމަށް އަދިވެސް އަހަރެއްހާ ދުވަސް ހޭދަވާނެކަމަށެވެ. ނަމަވެސް ރައީސުލްޖުމްހޫރިއްޔާގެ މަސައްކަތްޕުޅާއި ހިތްވަރާއެކު އެއަރޕޯޓްގެ ތަރައްޤީގެ މަސައްކަތްތައް ވަރަށް ބޮޑަށް އަވަސްކޮށްފައިވާކަމަށެވެ.

"ކުރިން އޮތް ޕްލޭނަށް މަސައްކަތްތައް ދާނަމަ 2026އަށްވެސް މިމަސައްކަތް ނުނިމޭނެ. ރައީސް ވަރަށް ބޮޑަށް މަސައްކަތްކުރައްވާ އެއަރޕޯޓް މަޝްރޫޢު އަވަސްކުރަން. އަައު ޓަރމިނަލްގެ ޚިދުމަތްތަކަށްވެސް މީގެ ލުއިކަން ލިބޭނެ." އެމްއޭސީއެލްގެ އެމްޑީ ޝަރީފް ވިދާޅުވިއެވެ.

ޝަރީފް ވިދާޅުވީ މިޚިދުމަތްތަކާއެކު، އެއަރޕޯޓް ގްރައުންޑްގައި ފްލައިޓް އޮންނަންޖެހޭ ވަގުތު ވަރަށް ބޮޑަށް ކުޑަކުރެވޭނެކަމަށެވެ. އަދި މިއީ އެއަރލައިންތަކުން ކުރާ ހޭދަ ކުޑަކުރެވޭނެ ކަމެއްކަމަށާއި އައު އެއަރލައިންތައް ރާއްޖެ ގެނައުމަށްވެސް ލިބޭ ހިތްވަރެއްކަމަށްވެސް ވިދާޅުވިއެވެ.

މި ޚިދުމަތްތަކާއެކު، އެއަރޕޯޓްގެ ގްރައުންޑްގައި ބޭނުންކުރާ ވެހިކަލްތައް މަދުކުރެވި، ގްރައުންޑްގެ ރައްކާތެރިކަންވެސް އިތުރުރެވޭނެއެވެ. މިއީ ޗައިނާގެ އެގްޒިމް ބޭންކްގެ ލޯނު އެހީގައި ވީއައިއޭގައި ކުރިއަށްގެންދިޔަ މަޝްރޫޢެކެވެ.