ޤައުމީ ތަރައްޤީގެ ޕްލޭން އެކުލަވާލިއަސް، ސަރުކާރުތަކުން ކުރަން ބޭނުންވާ ކަންކަމަށް ޖާގަ އޮންނާނެ: ރައީސް

ޤައުމީ ތަރައްޤީގެ ޕްލޭންގެ އެކުލަވާލި ނަމަވެސް، ސަރުކާރުތަކަށް ސިޔާސީ ގޮތުން އެއްވެސް ގޮންޖެހުމެއް ކުރިމަތި ނުވާނެކަމަށާއި، ސަރުކާރުތަކުން ކުރަން ބޭނުންވާ ކަންކަން ކުރުމުގެ ޖާގަ ފުރިހަމައަށް އޮންނާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ 20 އަހަރުގެ ޤައުމީ ތަރައްޤީގެ ޕްލޭން އެކުލަވާލުމުގެ މަޝްވަރާތައް ފެށުމަށް ބޭއްވި ރަސްމިއްޔާތު ނިންމާ މީޑިއާއަށް ދެއްވި އިންޓަވިއުއެއްގައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، ޤައުމީ ތަރައްޤީގެ ޕްލޭން އެކުލަވާލުމުގައި މުޖުތަމަޢުގެ ބައިވެރިވުން ނެތް އެއްވެސް ދާއިރާއެއް ނޯންނަނެކަމަށެވެ. އެގޮތުން ސިޔާސީ ޕާޓީތަކުން ޚިޔާލު ހުށައަޅައި، ގޮތް ކިޔުމުގެ ފުރުޞަތުވެސް ފުރިހަމައަށް ލިބޭނެކަމަށް ރައީސް ވިދާޅުވިއެވެ.

ރައީސް ވިދާޅުވީ ކޮންމެ ވެރިކަމެއް ބަދަލުވާއިރު ސިޔާސަތުތަކަށް ވަރަށް ބޮޑެތި ބަދަލުތައް އަންނަކަމަށެވެ. މިއާއެކު މަސައްކަތްތައް ހުއްޓުމަކަށް އައިސް ވަރަށް ގިނަ ވަގުތުތަކެއްވެސް ހޭދަވާކަމަށާއި، މީގެސަބަބުން ގެއްލުމާ ކުރިމަތިލާންޖެހެނީ ރައްޔިތުންކަމަށް ރައީސް ވިދާޅުވިއެވެ.

"މިގޮތަށް އަންނަ ބަދަލުތަކުގެ ސަބަބުން ޤައުމު ކުރިއަށްދާންވީ ސްޕީޑްގައި ކުރިއަކަށް ނުދޭ. އެންމެންވެސް އޯނަޝިޕް ނަގާ ޕްލޭނަކަށް މި ޕްލޭން ވާނީ. މުޅި މުޖުތަމަޢު ޝާމިލުވާނެ. ސިޔާސީ ޕާޓީތަކުންވެސް ގޮތް ކިޔަންވާނެ. އެއް ޕްލެޓްފޯމަކުން ބައްދަލުވެ މަޝްވަރާއާއި ޚިޔާލު ހުށައެޅުމުގެ ފުރުޞަތު ސިޔާސީ ޕާޓީޓަކަށް ދޭނަން." ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ މި ޕްލޭންގެ ސަބަބުން ސިޔާސީ ގޮތުން އެއްވެސް ގޮންޖެހުމެއް ސަރުކާރުތަކަށް ކުރިމަތި ނުވާނެކަމަށެވެ. އަދި ސަރުކާރުތަކުން ކުރަން ބޭނުންވާ ކަންކަން ކުރުމުގެ ޖާގަވެސް ފުރިހަމައަށް ލިބޭނެކަމަށް އެމަނިކުފާނު ވިދާޅުވިއެވެ. ނަމަވެސް މި ޕްލޭންގެ ބޭނުންމަކަށްވަނީ، ރައްޔިތުންނަށް ފައިދާވާގޮތަށް އެއް މިސްރާބަކަށް ޤައުމުގެ ކަންކަން ގެންދާނެ ގޮތް ފަހިކޮށްދިނުންކަމަށް ރައީސް ވިދާޅުވިއެވެ.

ޤައުމީ ތަރައްޤީގެ ޕްލޭން ތަންފީޒުކުރާއިރު ޤާނޫނު އަސާސީއަށްވެސް ބަދަލުތައް ގެންނެވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަނީ ނިންމަވާފައެވެ.