ފީވަކު ޞިއްޙީ މަރުކަޒު އެކްސްޓެންޝަން އިމާރާތާއެކު ޚިދުމަތް 24 ގަޑިއިރަށް

ށ. ފީވަކު ޞިއްޙީ މަރުކަޒުގެ އެކްސްޓެންޝަން އިމާރާތް ހުޅުވައި ޚިދުމަތް 24 ގަޑިއިރަށް ބަދަލުކޮށްފިއެވެ. ފީވަކު ޞިއްޙީ މަރުކަޒުގެ އެކްސްޓެންޝަން އިމާރާތް ހުޅުއްވައިދެއްވީ ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވަޒީރު ޤީލާ ޢަލީއެވެ.

މި ރަސްމިއްޔާތުގައި ވާހަކަ ދައްކަވަމުން ވަޒީރު ގީލާ އަލީ ވިދާޅުވީ އެކްސްޓެންޝަން އިމާރާތާއެކު ޞިއްޙީ ޚިދުމަތް 24 ގަޑިއިރަށް ބަދަލުވުމަކީ ރަށަށް ލިބުނު ބޮޑު ކުރިއެރުމެއް ކަމަށެެވެ. ވަޒީރު ވިދާޅުވީ މިއިމާރާތާއެކު އިދާރީ ހިންގުން ހަރުދަނާވާނެކަމަށެވެ. އަދި މިހާރު ދެމުން އަންނަ ޕަބްލިކް ހެލްތުގެ ޚިދުމަތް މިއިމާރާތަށް ބަދަލުވާނެކަމަށް ވިދާޅުވިއެވެ. ވަޒީރު ވިދާޅުވީ ބަލިތަކުން ރައްކާތެރިވެ ތިބުމުގެ އާދަ އަށަގަންނަވަން ޖެހޭކަމަށާއި، އަމާޒަކީ ފީވަކަކީ އާންމު ޞިއްޙަތުގެ ނަމޫނާ ރަށަކަށް ހެދުން ކަމަށެވެ.

ފީވަކުގައި މީގެ ކުރިން ޚިދުމަތް ދެމުންއައީ 16 ގަޑިއިރަށެވެ. އެހެންނަމަވެސް އައު އެކްސްޓެންޝަން އިމާރާތާއެކު އެރަށުގެ ޞިއްޙީ މަރުކަޒުގެ ޚިދުމަތް ވަނީ 24 ގަޑި އިރަށް ބަދަލުވެފައެވެ. ފީވަކުގައި ހުޅުވުނު މިއިމާރާތަށް އިދާރީ ޚިދުމަތްތަކާއި ބަޕްލިކް ހެލްތު ޔުނިޓްވެސް ވަނީ ބަދަލުކޮށްފައެވެ. މީގެ އިތުރުންވެސް ގިނަ ޚިދުމަތްތަކެއް ވަނީ އައު އިމާރާތަށް ބަދަލުކޮށްފައެވެ.

ފީވަކު ޞިއްޙީ މަރުކަޒުގެ އެކްސްޓެންޝަން އިމާރާތް ހުޅުވާ ޚިދުމަތް 24 ގަޑި އިރަށް ބަދަލުކުރުމަށް މިއަދު އެރަށުގައި ބޭއްވި ރަސްމިއްޔާތުގައި ޞިއްޙީ ވުޒާރާގެ އިސްވެރިންނާއި، ފީވަކުގެ ކައުންސިލްގެ އިސްވެރިންނާއި، ޞިއްޙީ މަރުކަޒުގެ އިސްވެރިން ބައިވެރިވެ ވަޑައިގެންނެވިއެވެ. މިތަން ހުޅުވުމަށްފަހު ވަޒީރު ވަނީ އެ އިމާރާތް ބައްލަވައިލައްވާ ފީވަކުގެ ޞިއްޙީ މަރުކަޒުގެ މުވައްޒަފުންނާއި އިސްވެރިންނާއި ބައްދަލު ކުރައްވާފައެވެ.