ވަކި އަދަދެއްނެތި އަމިއްލަ އުޅަނދުތަކުގައި ގައު ކުނޑި އުކާލުމުގެ އިންތިޒާމް

އެއްވެސް ލިމިޓެއް ނެތި އަމިއްލަ އުޅަނދުތަކުގައި ގައު ކުނޑި އުކާލުމުގެ އިންތިޒާމް ހަމަޖައްސައިފިއެވެ.

ވެމްކޯއިން ވިދާޅުވީ، މާލެ އަދި ހުޅުމާލެގައި ވެމްކޯއިން ދެމުންގެންދާ ގައުކުނޑި އުކާލުމުގެ ޚިދުމަތް މިހާރަށްވުރެ އަވަސް އަދި ފަސޭހަ ނިޒާމަކުން ފޯރުކޮށްދިނުމުގެ މަޤުޞަދުގައި މިއަދުން ފެށިގެން އެއްވެސް ލިމިޓެއްނެތި އަމިއްލަ އުޅަނދުތަކުގައި މާލެ އަދި ހުޅުމާލެ ވެމްކޯގެ ރިސޯސް ރިކަވަރީ ސެންޓަރަށް ގެނެސް ކުނި އުކާލުމުގެ އިންތިޒާމް ހަމަޖައްސާފައިވާ ކަމަށެވެ.

ވެމްކޯއިން ވިދާޅުވީ، އުކާލަން ގެންނަ ކުނި ހުންނަން ވާނީ އެކުންފުނިން ކަނޑައަޅާފައިވާ މިންގަނޑުތަކަށް ކުނި ވަކިކޮށްފައި ކަމަށެވެ.

މީގެ ދުވަސްކޮޅެއް ކުރިން ވަނީ، ގައު ކުނޑި އުކާލުމަށް ދަތިތަކެއް ހުރިކަމުގެ ކަންބޮޑުވުންތަކެއް ފެންމަތިވެފައެވެ. ވެމްކޯއިން މީގެކުރިން މި ޚިދުމަތް ދެމުން ދިޔައީ އެ ކުންފުނީގެ ވެހިކަލްގެ ކެޕޭސިޓީ ހުރި މިންވަރަށް ބަލައި، ކޮންމެ ދުވަހަކުވެސް ވަކި ލިމިޓެއްގައެވެ.

އެއްވެސް ލިމިޓެއްނެތި އަމިއްލަ އުޅަނދުތަކުގައި ގައު ކުނޑި އުކާލުމުގެ އިންތިޒާމް ހަމަޖައްސާފައިވާއިރު އެކަމަށް ޚާއްސަ ކޮޅުވެއްޓިތަކެއްވެސް ވެމްކޯއިމް ވަނީ ހަމަޖައްސާފައެވެ.