ސެކިއުރިޓީ ފީޗަރތައް އިތުރުކޮށް ޑޮމެއިން ހުއްދަތައް އައުކުރަން މިމަހު 17ގައި ހުޅުވާލަނީ

ސެކިއުޓީ ފީޗަރތަށް އިތުރުކޮށް ރެޖިސްޓްރީ އަލުން ދޫކުރާގޮތަށް، ހުރިހާ ޑޮމައިން ހުއްދަތައް އައު ކުރަން މިމަހުގެ 17 ވަނަ ދުވަހު ހުޅުވާލާނެކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު މިހެން ވިދާޅުވީ އެ ވުޒާރާގެ މަސައްކަތްތަކާ ގުޅޭ މަޢުލޫމާތު ޙިއްސާކުރެއްވުމަށް ބޭއްވި ނޫސްވެރިންގެ ބައްދަލުކުރެއްވުމުގައެވެ.

ދަތުރުފަތުރާ ބެހޭ ވަޒީރު އަމީން ވިދާޅުވީ މިމަހުގެ 17 ވަނަ ދުވަހު ފަށާ މަސައްކަތަކީ، ރާއްޖޭގައި ބޭނުންކުރާ ޑޮމައިންގެ ސައްޙަކަށް ކަށަވަރުކޮށް އަދި ޑޮމައިން ބޭނުންކުރާ މީހުންނަށް ބޭނުންވާ ރައްކާތެރިކަން ކަށަވަރުކުރުމަށް ފަށާ މަސައްކަތެއްކަމަށެވެ.

ދަތުރުފަތުރާ ބެހޭ ވުޒާރާއިން ހުޅުވާލާ ފުރުޞަތުގައި ހުރިހާ ޑޮމައިންތަކުން ލިޔެކިޔުންތައް ހުށައަޅާ، އައު އުސޫލާ އެއްގޮތަށް ޑޮމައިން ރެޖިސްޓްރީ ބަދަލުކޮށް އަދި ސެކިއުރިޓީ ފީޗަރތަކާއެކު ލިބޭ ލައިސަންސެއް ލިބޭނެއެވެ. ވަޒީރު ވިދާޅުވީ، އައު އުސޫލާ އެއްގޮތަށް ލިޔެކިޔުތުންތައް ތައްޔާރުކޮށް 60 ދުވަހުގެ މުއްދަތުގެ ތެރޭގައި އައު ރެޖިސްޓްރިތައް ހަވާލުކުރާނެކަމަށެވެ.

މީގެއިތުރުން ޑޮމައިންއާ ގުޅޭ ޤަވާއިދު އިސްލާހުކުރުމާއި، ހަރުދަނާ އިދާރީ އޫސޫލުތައް ހެދުމާއި، އައު ސިސްޓަމެއް ތަޢާރަފުކޮށް ޑޮމައިންގެ ޑޭޓާބޭސް، އެއް ވިއުގައަކުން ގުޅާލުމުގެ މަސައްކަތް ހިމެނެއެވެ. މީގެސަބަބުން ވުޒާރާއާއި ތަންފީޒީ އިދާރާތަކަށްވެސް މަޢުލޫމާތުގެ ސައްޙަކަން ދެނެގަތުމަށް ފަސޭހަވަގެންދާނެކަން ވަޒީރު ފާހަގަކުރެއްވިއެވެ.

"މި ހުޅުވާލަނީ 60 ދުވަހުގެ ތެރޭގައި އެ ހުރިހާ ލިޔެކިޔުންތައް ވެރިފައިކުރުމަށް. އާ ސެކިއުރިޓި ފީޗަރއާއެކު ޑޮމައިން ރެޖިސްޓްރީ އަދި ބޭނުންކުރުމުގެ ހުއްދަ ދޫކުރެވޭނެ. މިއީ ޑޮމައިންގެ ސައްޙަކަން ކަށަވަރުކުރެވޭނެ މުހިންމު މަސައްކަތެއް. ހުށައަޅާތާ 60 ދުވަހަށް ފަހު ދެން ޤަބޫލުކުރާނީ އާ ލިޔެކިޔުން." ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ރާއްޖޭގައި 1200 އެއްހާ ޑޮމައިން ގެންގުޅޭކަމަށް ދަތުރުފަތުރާ ބެހޭ ވުޒާރާއިން އަންދާޒާކުރެއެވެ. ނަމަވެސް މިހާތަނަށް މިކަމާ ގުޅޭ ލިޔެކިޔުންތައް އެކަށީގެންވާގޮތުގައި ބެލެހެއްޓިފައި ނެތްކަމަށް ވަޒީރު ވިދާޅުިވއެވެ.

ވަޒީރު ވިދާޅުވީ، 2000ގެ ކުރީކޮޅު ވަކި ސިސްޓަމެއްގައި ރެކޯޑްކޮށްގެން އެ ޚިދުމަތް ދިން ނަމަވެސް، އޭގެއިތުރުން ފޮތްތަކުގައިވެސް ރެކޯޑްތައް ބަލަހައްޓާފައިވާކަމަށެވެ. މީގެސަބުން ސިސްޓަމްގައި ހުރި މަޢުލޫމާތުތައް ދިމާނުވުމާއި، ވެރިޔާ ބަދަލުވުމުގެ ލިޔެކިޔުން ނެތުމުގެ ސަބަބުން ސައްޙަކަން ކަށަވަރު ކުރަންވެސް ވަނީ ދަތިތަކާ ކުރިމަތިވެފައެވެ.

"އެއް ވިއުގައަކުން ފެންނަ ނެތީމަ ޑޮމައިން ކެޓަގަރީ، ފުރަތަމަ ވިއްކި ތާރީޚު، ވެރިފަރާތް ބަދަލުވިގޮތް، ޑޮމައިން ބޭނުންކުރާ އުޅަނދު ދެނެގަންނާކަށް ނޭންގޭ." ވަޒިރު ވިދާޅުވިއެވެ.

ވަޒީރު ވިދާޅުވީ އައު އުސޫލުތަކާއެކު ގެންނަ ބަދަލާއެކު، ޑޮމައިންއަށް ދޭންވޭ ރައްކާތެރިކަން ވަރަށް ބޮޑަށް ލިބިގެންދާނެކަމަށެވެ. އަދި ވޭތުވެދިޔަ ގިނަ އަހަރުތަކުގައި ޑޮމައިންއާިއ ގުޅިގެން ހުރި މައްސަލަތައް ޙައްލުވެގެންދާނެކަމަށެވެ. ވަޒީރު ވިދާޅުވީ މި ފަހިކޮށްދޭ ކޮންމެ ފުރުޞަތަކީ، މައްސަލަތަކަށް ޙައްލު ހޯދައިދިނުމަށް ދޭ ވަރަށް ފަހި ފުރުނތަުތަކެއްކަމަށެވެ.