ސަބްސިޑީ ނިޒާމަށް ގެންނަ ބަދަލުގެ އަސަރު ކުޑަކުރުމަށް ޚާއްސަ ފިޔަވަޅުތަކެއް

ސަބްސިޑީ ދިނުމުގެ ނިޒާމަށް ގެންނަން ނިންމާފައިވާ ބަދަލުތަކާއެކު އާއްމު ރައްޔިތުންނަށް ކުރާނެ އަސަރުތައް ކުޑަކުރުމަށް ޚާއްސަ ފިޔަވަޅުތަކެއް އެޅުމަށް ބަޖެޓުގައި ހިމަނާފައިވާނެކަމަށް މާލީ ވަޒީރުގެ ނައިބު އަޙްމަދު ސާއިދު މުޞްތަފާ ވިދާޅުވެއްޖެއެވެ.

ސާއިދު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ.

އަންނަ އަހަރަށް ލަފާކޮށް ދައުލަތުން ވަނީ 56.6 ބިލިޔަން ރުފިޔާގެ ބަޖެޓެއް ރައްޔިތުންގެ މަޖިލީހަށް ހުށަހަޅާފައެވެ. މިބަޖެޓުގެ ތެރެއިން އާމްދަނީ އިތުރުކުރުމަށްވުރެ ބޮޑަށް، އިތުރުވަމުން އަންނަ ދައުލަތުގެ ޚަރަދުތައް ކުޑަކުރުމަށް ގިނަ ފިޔަވަޅުތަކެއް އެޅުމަށްވަނީ ހިމަނާފައެވެ.

ޚަރަދުތައް ކުޑަކުރުމަށް ގެންނަ އެންމެ ބޮޑު ބަދަލަކަށްވާނީ ރާއްޖޭގައި ސަބްސިޑީދޭ އުސޫލަށް ގެންނަ ބަދަލުތަކެވެ. އެގޮތުން ސަރުކާރުން ވަނީ ސަބްސިޑީއަކީ އެންމެ ބޭނުންޖެހިފައިވާ މީހާއަށް ސީދާ ދައުލަތުން ފޯރުކޮށްދޭ އެހީއަކަށް ހަދައި، ނިކަމެތި މީހާގެ ޖީބަށް އެހީތެރިކަން ލިބޭނެ އިންތިޒާމު ހަމަޖެއްސުމަށް ނިންމާފައެވެ.

ސަބްސިޑީ ދޭ އުސޫލަށް ގެންނަ ބަދަލާއި ގުޅޭގޮތުން މާލީ ވަޒީރުގެ ނައިބު އަޙްމަދު ސާއިދު މުސްތަފާ ވިދާޅުވީ މިހާތަނަށް ރާއްޖޭގައި ދައުލަތުން ކުރާ ހޭދަތައް ރައްޔިތު މީހާއަށް އިހްސާސް ނުވާކަމަށެވެ.

"އާއްމު ދިވެހި މީހާއަށް އެދޭ ސަބްސިޑީއެއް އިހުސާސެއް ނުކުރެވޭ، ކަރަންޓު ބިލު ކުޑަވާ ކަމުގެ އިހުސާސެއް ނުކުރެވޭ، ކޮންމެ އާއްމު ރައްޔިތެއްމެ ގޭގައި އެއަރކޯނެއް އަޅުވާއިރު، ފްރިޖެއްލާއިރު، ހަގީގަތުގައި މުޅި ދައުލަތުގެ ފެންވަރުގައި އެއަށް ކުރާ އަސަރު ބަލައިގަންނަންވެސް ނޭގޭ،"ސާއިދު ވިދާޅުވިއެވެ.

ސާއިދު ވިދާޅުވީ ސަރުކާރު ހިއްސާވާ ކުންފުނިތައް ރިފޯމުކުރުމުގެ މަސައްކަތްކުރުމުގައި އެންމެ މުހިންމު އެއް މަސައްކަތަކީ އެކުންފުނިތަކަށް ދޭ ސަބްސިޑީތަކަށް ބަދަލުތަކެއް ގެނައުންކަމަށެވެ. އޭނާ ވިދާޅުވީ ރާއްޖޭގައި މިހާރު ސަބްސިޑީ ދެމުންދާ އުސޫލުގައި އިޖްތިމާއީ އިންސާފެއް ނެތް ކަމަށެވެ.

"އެންމެ ބޮޑަށް އެހީ މިލިބެނީ އެންމެ މުއްސަނދި 10 އިންސައްތަ ގޭބީސީއަށް، އަދި މި 10 އިންސައްތަ ގޭބީސީއާއި، އެންމެ ނިކަމެތި 20 އިންސައްތަ ގޭބީސީއަށް މި ލިބޭ ސަބްސިޑީގެ މިންވަރު އެއްވަރު،" ސާއިދު ވިދާޅުވިއެވެ. އަދި ސަބްސިޑީ ދިނުމުގެ ނިޒާމަށް ގެންނަ ބަދަލުތަކާއެކު ދައުލަތުގެ ޚަރަދުން އަހަރުން އަހަރަށް އެތައް ބިލިއަން ރުފިޔާ ސަލާމަތްކުރެވޭނެ ކަމަށެވެ.

ސާއިދު ވިދާޅުވީ ސަބްސިޑީއަށް ގެންނަ ބަދަލުތަކާއެކު ރައްޔިތު މީހާއަށް އެކަމުން ކުރާ އަސަރުތައް ކުޑަކުރުމަށްވެސް މަސައްކަތްތަކެއް ކުރުމަށް ރާވާފައިވާކަމަށެވެ. އެގޮތުން ސިވިލް ސަރވިސް އަދި ޖުޑީޝަރީގެ މުވައްޒަފުންގެ މުސާރަ ބޮޑު ކުރުމަށް ބަޖެޓުގައި ހިމަނާފައިވާކަން ސާއިދު ފާހަގަކުރެއްވިއެވެ.

"އޭގެތެރެއިން 2 ކަމެއް ހިމަނާފައިވާނެ، ކަރަންޓަށް ކުރާ ހޭދަ އިތުރުވެދާނެ، އެކަންކަން ރަނގަޅުކުރުމަށް މެގަ ސޯލާ ޕްރޮޖެކްޓުތައް އިތުރުކުރާނެ، މީގެއިތުރުން 500 މިލިއަން ރުފިޔާ ހިމަނާފައިވާނެ، މުވައްޒަފުންގެ މުސާރަ ބޮޑުކުރުމަށް،" ސާއިދު ވިދާޅުވިއެވެ.

މާލީ ވަޒީރުގެ ނައިބު ވިދާޅުވީ މި ސަރުކާރުން ވެރިކަމާއި ހަވާލުވުމާއެކު ސަބްސިޑީއަށް ގެންނާނެ ބަދަލުތަކާއި އެއާއެކު އަންނާނެ ބަދަލުތައް ދެނެގަނެ އެކަންކަމުން ރައްޔިތުންނަށް ކުރާނެ އަސަރުތައް ކުޑަކުރުމަށް އަޅާނެ ފިޔަވަޅުތައް އެކުލަވާލުމުގެ މަސައްކަތް ފެށި ކަމަށެވެ.

ސަބްސިޑީ ނިޒާމު އެއްކޮށް ބަދަލުކުރުމަށް ސަރުކާރުން ނިންމާފައިވާއިރު، މި ފިޔަވަޅަކީ ބައިނަލްއަޤްވާމީ މާލީ އިދާރާތަކުން ކުރުމަށް ބާރުއަޅަމުން އައިސްފައިވާ ކަމެކެވެ. އެގޮތުން މިހާރު އޮންނަ ސަބްސިޑީ ނިޒާމުގެ ދަށުން އެންމެ ބޭނުންޖެހޭ ފަރާތްތަކަށް އޭގެ ހެޔޮ އަސަރު ނުކުރާ ކަމަށް މާލީ އިދާރާތަކުން ވަނީ ވިދާޅުވެފައެވެ.