ފެނަކައިގެ ކުރީގެ މެނޭޖިން ޑިރެކްޓަރުގެ ޕާސްޕޯޓު ހިފަހައްޓައިފި

ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު އަހްމަދު ސައީދުގެ ޕާސްޕޯޓު ހިފަހައްޓައިފިއެވެ.

ސައީދުގެ ޕާސްޕޯޓް ހިފަހައްޓާފައިވާކަން އެންޓި ކޮރަޕްޝަން ކޮމިޝަން (އޭސީސީ) އިން ވަނީ ކަށަވަރުކޮށްދެއްވާފައެވެ.

އެންޓި ކޮރަޕްޝަން ކޮމިޝަން (އޭސީސީ) ގެ މީޑިއާ އޮފިޝަލް އައިޝަތު ސަމާ ވިދާޅުވީ އެންޓި ކޮރަޕްޝަން ކޮމިޝަނުން ބަލަމުންދާ މައްސަލައަކާ ގުޅިގެން ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު އަހްމަދު ސައީދުގެ ޕާސްޕޯޓު ހިފަހައްޓާފައިވާކަމަށެވެ.

މިދިޔަ ސަރުކާރުގައި ފެނަކަ ކޯޕަރޭޝުން 60 މަޝްރޫޢު ހިންގާފައިވަނީ އެ ކޯޕަރޭޝަންގެ އިސްވެރިން ބޭނުންވި ވަކި ބަޔަކަށް މަންފާ ހޯދައިދިނުމަށްކަމަށް އެންޓި ކޮރަޕްޝަން ކޮމިޝަންގެ ރައީސް އާދަމް ޝާމިލް ވަނީ މިއަހަރުގެ ޖުލައި 16 ވަނަ ދުވަހު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަފުޅުދައްވަމުން ވިދާޅުވެފައެވެ.

އޭސީސީގެ ރައީސް އާދަމް ޝާމިލް ވިދާޅުވީ އޭސީސީން ބަލަމުންދާ މައްސަލަތަކުގައި ކޮރަޕްޝަނަށް ތުހުމަތުވާ ކަންކަން ފާހަގަކުރެވިފައިވާކަމަށާއި، އެންމެ ބޮޑަށް ފާހަގަކުރެވިފައިވަނީ ނުޙައްޤުން މުއްސަނދިކަން ހޯދާފައިވާ މައްސަލަތައް ކަމަށެވެ.

މިދިޔަ ސަރުކާރުގައި ފެނަކަ ކޯޕަރޭޝަނުން ކޮރަޕްޝަނަށް ތުހުމަތުވާފަދަ އެތައް މަޝްރޫޢުއެއް ހިންގާފައިވާކަމަށާއި، ސީދާ ކުންފުންޏަށް ގެއްލުންވާގޮތަށް އެތައް ކަމެއް ކޮށްފައިވާކަމަށް މިހާރުގެ މެނޭޖިން ޑިރެކްޓަރ މުޢާޒް މުޙައްމަދު ރަޝީދުވެސް ވަނީ ވިދާޅުވެފައެވެ.

މި ސަރުކާރު ހަވާލުވިއިރު ފެނަކަ ކޯޕަރޭޝަންގެ ދަރަނި 4.3 ބިލިއަން ރުފިޔާއަށްވުރެ ބޮޑެވެ. އޭގެ ތެރެއިން ކޮރަޕްޝަނަށް ތުހުމަތުވާގޮތަށް ފެނަކައިން ހިންގި 60 މަޝްރޫޢަށް ނިމިދިޔަ ސަރުކާރުން 1 ބިލިއަން ރުފިޔާ ޚަރަދުކޮށްފައިވާކަމަށް މެނޭޖިން ޑިރެކްޓަރ މުޢާޒް ވަނީ މީގެކުރިން ވިދާޅުވެފައެވެ.