ފަންނީ މުވައްޒަފުންގެ މުސާރަ ކުޑައެއް ނުކުރާނަން: ވަޒީރު ޒަމީރު

ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރަން ނިންމާފައިވީނަމަވެސް، ފަންނީ މުވައްޒަފުންގެ މުސާރައިން އުނި ނުކުރައްވާނެކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

މާލީ ވަޒީރު މިހެން ވިދާޅުވީ ދައުލަތުގެ ޚަރަދުތައް ކުޑަކުރުމަށް އަޅުއްވަމުން ގެންދަވާ ފިޔަވަޅުތަކާއި ގުޅޭގޮތުން ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަފުޅު ދައްކަވަމުންނެވެ.

ދައުލަތުގެ ޚަރަދުތައް ކުޑަކުރުމަށް ސިވިލް ސަރވިސް ނުހިމެނޭގޮތަށް ދައުލަތުން މުސާރަ ދޭ ފަރާތްތަކުގެ ތެރެއިން 12،000 ރުފިޔާއިން މަތީގެ މުސާރަތައް ކުޑަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައި، އެކަން އިއުލާންކުރެއްވީ މިދިޔަ ބުދަ ދުވަހުއެވެ.

ރައީސުލްޖުމްހޫރިއްޔާ ވަނީ ސިޔާސީ މުވައްޒަފުންނާއި ދައުލަތުގެ ތިން ބާރުގެ އިސް ބޭފުޅުންނާއި މިނިވަން މުއައްސަސާތަކުގެ ވެރިންނާއި ރައްޔިތުންގެ މަޖިލީހުގެ މެމްބަރުންނާއި ސަރުކާރު ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް ދެ އަހަރު ދުވަހުގެ މުއްދަތަށް އުނިކުރުމަށް ނިންމަވާފައެވެ.

ނަމަވެސް ފަންނީ ވަޒީފާތަކުގައި އުޅޭ ބައެއް ޕައިލެޓުންނާއި އިންޖިނިއަރުން ސޯޝަލް މީޑިއާގައި ވަނީ މުސާރަ ކުޑަކުރުމަށް ނިންމެވި ނިންމެވުމާއި ގުޅޭގޮތުން ކަންބޮޑުވުން ފާޅުކޮށްފައެވެ.

ޕައިލެޓުންނާއި އިންޖިނިއަރުންގެ ކަންބޮޑުވުންތަކަށް އިޝާރާތްކުރައްވައި ވާހަކަފުޅު ދައްކަވަމުން މާލީ ވަޒީރު މޫސާ ޒަމީރު ވިދާޅުވީ ދައުލަތުގެ ޚަރަދު ކުޑަކުރުމަށް ބައެއް މުވައްޒަފުންގެ މުސާރަ ކުޑަކުރިނަމަވެސް، އޭގެތެރޭގައި ފަންނީ މުވައްޒަފުން ނުހިމެނޭނެކަމަށެވެ. އަދި އެއީ ދައުލަތުގެ އެކި ވަޒީފާތަކުގައި އުޅޭ ފަންނީ މުވައްޒަފުން އެހެން ވަޒީފާތަކަށް ދިއުމުގެ ފުރުސަތު އޮތުމުންކަމަށްވެސް ވަޒީރު ވިދާޅުވިއެވެ.

"ޕްރޮފެޝަނަލް ކެޓަގަރީސްތައް އިސްތިސްނާވާނެ. އެއީ އަޅުގަނޑުމެން އެކްރޮސް ދަ ބޯޑު ނެގި ކަމުގައި ވިޔަސް ބައެއް ކަހަލަ އިންޖިނިއަރުންނާއި ބައެއް ކަހަލަ މީހުންނަކީ އެއީ އަޅުގަނޑުމެންނަށް، މިސާލަކަށް ސެލަރީ ދަށްކޮށްފި ކަމަށް ވެއްޖެއްޔާ، އެ މީހުންނަށް އެއަށް ވުރެ ބެޓާ އޮޕްޝަންސް އޮވެއްޖެއްޔާ، ގޮސްފިކަމަށް ވެއްޖެއްޔާ އެ ކުންފުނިތައް ހިންގަން އުނދަގޫވާނެ" ވަޒީރު ވިދާޅުވިއެވެ.

ކޮމިޓީގައި ވާހަކަ ދައްކަވަމުން ވަޒީރު ވަނީ ސަރުކާރުން މާލީ އިސްލާހުތައް ގެނައުމަށްޓަކައި ގިނަ މަސައްކަތްތަކެއް ކުރައްވަމުންދާކަމަށް ވިދާޅުވެފައެވެ. އެގޮތުން މިހާރު އޮތް ކުންފުނިތަކާބެހޭ ޤާނޫނު ނޫން އެހެން ޤާނޫނެއްގެ ދަށުން ކުންފުނިތައް ހިންގޭނެ ނިޒާމެއް ޤާއިމުކުރުމުގެ މަސައްކަތް ފަށާފައިވާކަންވެސް ވަޒީރު ފާހަގަކުރެއްވިއެވެ.

ސަރުކާރު ހިއްސާވާ ކުންފުނިތަކުން ދައުލަތަށް ބަރޯސާވުން ހުއްޓާލަން ޖެހޭ ކަމަށާއި އެގޮތުން ހާސިލުކުރަންޖެހޭ ލަނޑުދަނޑިތަކެއް އެ ކުންފުނިތަކަށް ދީފައިވާނެކަމަށްވެސް މާލީ ވަޒީރު ވިދާޅުވިއެވެ.

ދައުލަތުގެ ޚަރަދުތައް ކުޑަކުރުމަށް ސަރުކާރުން ފިޔަވަޅުތަކެއް އަޅުއްވަމުންދާއިރު، ރައީސުލްޖުމްހޫރިއްޔާ ހިމެނިވަޑައިގަންނަވާ ގޮތަށް ސަރުކާރުގެ ވެރިންގެ މުސާރަވެސް ކުޑަކުރުމަށް ވަނީ ނިންމަވާފައެވެ. އަދި ރައްޔިތުންގެ މަޖިލީހާއި ޖުޑީޝަރީގެ މުސާރަތައްވެސް ކުޑަކުރުމަށް ސަރުކާރުން ވަނީ ހުށަހަޅުއްވާފައެެވެ.