ޕްރޮސެކިއުޓަރ ޖެނެރަލްގެ ކުރީގެ ނިންމުންތަކާއި ގުޅިގެން 500އަށްވުރެ ގިނަ ޝަކުވާ

ޕްރޮސެކިއުޓަރ ޖެނެރަލްގެ އޮފީހުގެ ނިންމުންތަކަށް ޝަކުވާ ހުށައެލުމަށް ހުޅުވާލި ފުރުޞަތުގައި 500އަށްވުރެ ޝަކުވާ ހުށައަޅައިފިއެވެ. ޕްރޮސެކިއުޓަރ ޖެނަރަލްގެ ނިންމުންތަކާމެދު ޝަކުވާ ހުށައެޅުމަށް ހުޅުވާލީ ޕްރޮސެކިއުޓަރ ޖެނެރަލްގެ މަގާމާ އަލަށް ހަވާލުވެވަޑައިގެންނެވި އަލްއުސްތާޛް ޢައްބާސް ޝަރީފެވެ.

ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް ވަނީ މި ފާއިތުވި 3 ހަފުތާގެ ތެރޭގައި ގިނަ ބައެއްގެ ފަރާތުން އެކި ވަސީލަތްތައް މެދުވެރިކޮށް ޝަކުވާތައް ލިބެމުން އަންނަ ކަމަށް ވިދާޅުވެފައެވެ. އެހެންކަމުން އެ ޝަކުވާތައް ބެލުމަށް ރަސްމީކޮށް ޝަކުވާ ހުށަހެޅުމުގެ ނިޒާމެއް ޕީޖީ އޮފީހުގެ ވެބްސައިޓާއި އެކި ގޮފިތަކުގައި ޤާއިމުކޮށް، ޝަކުވާ ހުށަހެޅުމަށް މިމަހުގެ 1އިން ފެށިގެން 20 ދުވަހުގެ ނިޔަލަށް ފުރުސަތެއް ހުޅުވާލިއެވެ.

ޕީޖީ އޮފީހަށް ހުށައަޅާފައިވާ ދަޢުވާތަކާއި، ހައްޔަރުކޮށްފައި ނުވަތަ ބަންދުކޮށްފައި ތިބި މީހުންގެ ބަންދު މުރާޖަޢާކުރުމަށް އެދި ޝަކުވާތައް މުރާޖަޢާ ކުރުމުގެ ކަންކަން ކުރަނީ އެކަމަށް ޚާއްޞަ ކޮމިޓީއަކުންނެވެ. އެ ކޮމިޓީގެ މައިގަނޑު މަސައްކަތަކީ މިހާރު ކޯޓަށް ހުށައަޅާފައިވާ ދަޢުވާތަކާއި، ޖިނާޢީ ކުށްތަކާ ގުޅިގެން ހައްޔަރުކޮށް ނުވަތަ ބަންދުކޮށްފައި ތިބި މީހުންގެ ބަންދު މުރާޖައާކުރުމަށް އެދި ހުށަހަޅާ ހުށަހެޅުންތަކާމެދު ޤާނޫނުގައިވާގޮތަށް އެކަންކަމުގައި ޢަމަލުކުރަންވީ ގޮތުގެ ލަފާ ޕްރޮސިކިއުޓަރ ޖެނެރަލަށް އަރުވައި، އެ ނިންމުންތައް ބަދަލުކުރަންޖެހޭނަމަ އެކަން ކުރުމެވެ.

ޕްރޮސެކިއުޓަރ ޖެނެރަލްގެ އޮފީހަށް ހުށަހަޅަން ބޭނުންވާ ޝަކުވާތައް ހުށެހެޅުމަށް ހުޅުވާލި މުއްދަތު ހަމަވުމުން އެކަމާ ގުޅޭގޮތުން ޕީޖީ އޮފީހުން ވިދާޅުވީ ކޮމިޓީއަށް ލިބިފައިވަނީ 539 ޝަކުވާ ކަމަށާއި މި ޝަކުވާތައް މުރާޖާޢާކުރަމުންދާކަމަށެވެ.

ޕީޖީ އޮފީހުން ވިދާޅުވީ އެ އޮފީހުން ކޯޓަށް ހުށަހަޅައި ހިނގަމުންދާ ދަޢުވާތަކާއި އިސްތިޢުނާފަކާ ބެހޭ ޝަކުވާއަކާ ގުޅިގެން ހިނގަމުންދާ ޝަރީޢަތެއް ފަސްކޮށްދިނުމަށް ކޯޓުގައި އެދޭނީ އެ މައްސަލައެއްގެ ޙުކުމާ ހަމައަށް ގޮސްފައިވާ މައްސަލަތަކުގައި އެކަނި ކަމަށެވެ.

ޕީޖީ ވަނީ އެ އޮފީހުގައި ހުރި ބައެއް މައްސަލަތައް ހައްލުކުރުމަށް މަސައްކަތް ކުރައްވަމުންގެންދަވާނެ ކަމަށް ވިދާޅުވެފައެވެ. އެގޮތުން، ނިޒާމަށް ގެންނަންޖެހޭ ބަދަލުތައް ގެނައުމާއި ބައެއް އުޞޫލުތައް އިސްލާހު ކުރުން ހިމެނޭކަން ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް ވަނީ ވިދާޅުވެފައެވެ.