ރައީސް ފެށްޓެވީ ސިއްޙީ ނިޒާމުގެ މުޅިން އައު ބާބެއް: ވަޒީރު ނާޒިމް
-
ސިއްޙީ ނިޒާމަށް ހަރުދަނާ މެނޭޖްމަންޓް ހައްލެއް ބޭނުންވޭ
-
ޚިދުމަތްތައް އިތުރަށް ފުޅާކުރުމުގެ މަސައްކަތް ދަނީ ކުރިއަށް
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ފެށްޓެވީ ސިއްޙީ ނިޒާމުގެ މުޅިން އައު ބާބެއް ކަމަށް ސިއްޙަތާ ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ. ވަޒީރު މިހެން ވިދާޅުވީ ވިލިމާލެ ހޮސްޕިޓަލުގައި މުޅިން އަލަށް ދަތުގެ ފަރުވާގެ ޚިދުމަތް އިފްތިތާހުކުރުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ.
ވިލިމާލެ ހޮސްޕިޓަލުގައި މުޅިން އަލަށް ދަތުގެ ފަރުވާގެ ޚިދުމަތް އިފްތިތާހުކުރުމަށް ބޭއްވި ހަފްލާގައި ވާހަކަފުޅުދައްކަވަމުން ސިއްޙަތާ ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ފައްޓަވާފައިވަނީ ސިއްޙީ ޚިދުމަތުގެ ތާރީޚުގެ މުޅިން އައު ސަފުހާއެއް ކަމަށެވެ. އެކަން ސާފުވެވަޑައިގަތް ކަމަކީ އިންތިޤާލީ މަރުހަލާގައި ރައީސް ގެންގުޅުއްވި ވިސްނުންފުޅާއި ފިކުރުކަމަށް ވަޒީރު ވިދާޅުވިއެވެ.
އެގޮތުން މާލެ ގްރޫޕް އޮފް ހޮސްޕިޓަލްސް އެއް ފުރާޅެއްގެ ދަށުން ހިންގެވުމަށް ރައީސް ނިންމެވި ނިންމެވުމުގެ ސަބަބުން އެމަނިކުފާނުގެ ވިސްނުންފުޅު ސާފުވެވަޑައިގެންނެވިކަމަށް ވިދާޅުވިއެވެ.
ރާއްޖެ ފަދަ ކުޑަ މުޖުތަމައެއްގައި އެއް ނިޒާމަކުން ގުޅިގެން ނޫނީ ސިއްޙީ ޚިދުމަތް އެންމެ ފުރިހަމައަށް ނުދެވޭނެކަން ފާހަގަކުރައްވާ ވަޒީރު ވަނީ ސިއްޙީ ނިޒާމަށް ހަރުދަނާ މެނޭޖްމަންޓް ހައްލެއް ބޭނުންވާކަމަށެވެ.
ސިއްޙަތާ ބެހޭ ވަޒީރު ވަނީ ސަރަހައްދުގެ ހުރިހާ ހޮސްޕިޓަލްތައް އެއް ނިޒާމެއްގެ ތެރެއިން ހިންގަވަން ރައީސް ވިސްނަވާ ވިސްނުންފުޅު ރަނގަޅު ކަމަށް ވިދާޅުވެ އެއީ ސިއްޙީ ނިޒާމުގެ މުޅިން އައު ބާބެއްކަން ފާހަގަކުރައްވާފައެވެ.
ވަޒީރު އަބްދުﷲ ނާޒިމް އިބްރާހިމް ވަނީ ވިލިމާލޭގައި އަޅާ 100 އެނދުގެ އައު ހޮސްޕިޓަލުގެ އެންމެ ފަހުގެ މައުލޫމާތުވެސް ހިއްސާކުރައްވާފައެވެ. އެގޮތުން ހޮސްޕިޓަލުން ދެމުންދާ ޚީދުމަތްތައް ބަދަލުކުރާނެ ތަން މިހާރު ނިންމަވާފައިވާކަމަށާއި އެތަނަށް ހިނގާނެ ޚަރަދުތައް ހޯދުމުގެ ކަންކަން ކުރިއަށްދާ ކަމަށް ވިދާޅުވިއެވެ.
"މިތަނުގައި އިމާރާތް އަޅަންޖެހެނީ، އަޅާއިރު މިހާރު ހޮސްޕިޓަލުން ދެމުންދާ ޚިދުމަތްތައް އެހެން ތަނަކަށް ބަދަލުކުރުމުގެ މަސައްކަތް މިހާރު ފައްޓަވައިގެން ކުރިއަށް ގެންދަނީ. ބަދަލުކުރާނީ ކޮންތަނެއްކަން މިހާރު ވަނީ ނިންމަވާފައި. އެތަނަކަށް ބަދަލުކުރާއިރު މަރާމާތު ކުރުމަށް ޚަރަދުތައްވެސް ހިނގާނެ. އެ ޚަރަދުތައް ހޯދުމުގެ މަސައްކަތް މިހާރު ކުރިއަށްދަނީ. ވިލިމާލެ ހޮސްޕިޓަލުގެ މަސައްކަތް ވަރަށް އަވަހަށް ފެށިގެންދާނެ" އަބްދުﷲ ނާޒިމް އިބްރާހިމް ވިދާޅުވިއެވެ.
ސިއްޙަތާ ބެހޭ ވަޒީރު އަބްދުﷲ ނާޒިމް ވިދާޅުވީ އިބްރާހިމް ވަނީ ސިއްޙީ ކަންތައްތަކާއި ޚިދުމަތްތަކަށް އާންމުން އަހުލުވެރިވެ، ހޭލުންތެރިވުން މުހިންމުކަމަށެވެ.