ރާއްޖޭގައި އިދިކޮޅު ސިޔާސީ ހަރަކާތް ހިންގުމުގެ ފުރުޞަތު ހުރިހާ ސިޔާސީ ޕާޓީތަކަށް އެބައޮތް ކަމަށާއި، އެކަމަށް އެއްވެސް ހުރަހެއް، އޮތްކަމަށް ޤަބޫލު ނުކުރައްވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަންސް ކޮމިޝަނުން މިހެން ވިދާޅުވީ އިދިކޮޅު ބައެއް ޕާޓީތަކުން ރާއްޖޭގައި އިދިކޮޅު ސިޔާސީ ހަރަކާތް ހިންގުމުގެ ފުރުޞަތު ހަނިކޮށްފައިވާކަމަށް ބުނެ ދައްކަމުންދާ ވާހަކަތަކާ ގުޅިގެން ޕީއެސްއެމް ނިއުސްއިން ދެންނެވި ސުވާލަކަށް ޖަވާބު ދެއްވަމުންނެވެ.
އިދިކޮޅު ސިޔާސީ ޕާޓީތަކުން އިސްނަގައިގެން މާލޭގައި ކުރިއަށްގެންދާ އެއްވުންތަކާއި މުޒާހަރާތަކަށް ފުލުހުން ހުރަސްއަޅަމުންދާކަމަށް ބުނެ އިދިކޮޅު ފަރާތްތަކުން ދަނީ ރާއްޖޭގައި އިދިކޮޅު ސިޔާސީ ހަރަކާތް ހިންގުމުގެ ފުރުޞަތު ހަނިކުރަމުންދާކަމަށް ތުހުމަތު ކުރަމުންނެވެ. އެހެން ނަމަވެސް ޤާނޫނާ ޤަވާއިދާ އެއްގޮތަށް، ފުރިހަމަ ކުރަންޖެހޭ އިޖްރާޢަތުތައް ފުރިހަމަ ކުރުމަށްފަހު ކުރިއަށްގެންދާ މުޒާހަރާއަކަށް ނުވަތަ އެއްވުމަކަށް ފުލުހުން ހުރަސް ނާޅުއްވާނެކަމަށް ފުލުހުން ގެންދަވަނީ ތަކުރާރުކޮށް ވިދާޅުވަމުންނެވެ.
މުޖުތަމަޢުގެ ހަމަޖެހުމާއި، ރައްކާތެރިކަން ކަށަވަރު ކުރެއްވުމަށްޓަކައި، ކުރިން ރާވައިގެން ކުރިއަށްގެންދާ އެއްވުންތަކާއި، މުޒާހަރާތަކާ ބެހޭ މަޢުލޫމާތު އެއްވުން ފެށުމުގެ ވަކި ވަގުތެއް ކުރިން، އެއެއްވުމެއް ނުވަތަ މުޒާހަރާއެއް ރާވާ ފަރާތްތަކުން ފުލުހުންނަށް އެކަން އެންގަވަން ޖެހޭނެކަމަށް ހޯމް މިނިސްޓަރ ވަނީ ކަނޑައަޅުއްވާފައެވެ. އަދި، އެފަދަ ހަރަކާތްތައް އިންތިޒާމްކުރާ ފަރާތްތަކުން ފުރިހަމަކުރަން ޖެހޭ އިޖްރާޢަތުތައް ފުރިހަމަ ކުރުމުން އެއެއްވުމަކަށް ފުލުހުންގެ ފަރާތުން ދެއްވަންޖެހޭ އެއްބާރުލުން ދެއްވަމުންގެންދަވާނެކަމަށް ފުލުހުން ވިދާޅުވެއެވެ.
ފީ.އެސް.އެމް ނިއުސްއަށް ދެއްވި ޚާއްޞަ އިންޓަރވިއުއެއްގައި ސިޔާސީ ޕާޓީތަކުގެ ހަރަކާތްތައް ވިލަރެސް ކުރައްވާ އެޕާޓީތަކުގެ ބެލެނިވެރިފަރާތް، އިލެކްޝަންސް ކޮމިޝަންގެ ސެކްރެޓަރީ ޖެނެރަލް އަޙްމަދު ޢަލީ ވިދާޅުވީ ޤާނޫނީ ތަރަހައިގެ ތެރެއިން އެއްވެސް ސިޔާސީ ޕާޓީއަކުން ހިންގާ އެއްވެސް ހަރާކާތަކަށް ދައުލަތުގެ އެއްވެސް މުއައްސަސާއަކުން ހުރަސް ނާޅާކަމަށެވެ. ރާއްޖޭގައި އިދިކޮޅު ސިޔާސީ ހަރަކާތް ހިންގުމުގެ ފުރުޞަތު އެންމެ އެކަށީގެންވާ ގޮތުގައި ލިބިދެވޭކަމަށް އިލެކްޝަންސް ކޮމިޝަނުން ދެކެވަޑައިގަންނަވާކަމަށް އޭނާ ވިދާޅުވިއެވެ.
ސިޔާސީ ޕާޓީތަކުން ކުރިއަށްގެންދާ އެކިއެކި ހަރަކާތްތަކަށް އިލެކްޝަންސް ކޮމިޝަނުން މަގު ފަހިކޮށްދެއްވާކަމަށާއި، ދައުލަތުގެ މުއައްސަސާތަކުގެ ރޫޙަކީ ވެސް އެއީކަމަށް އޭނާ ވިދާޅުވިއެވެ. އަދި ކުރިއަށްއޮތް ތަނުގައިވެސް ޤާނޫނާ އެއްގޮތައް ކުރިއަށްގެންދާ އެފަދަ ހަރަކާތްތަކަށް އިލެކްޝަންސް ކޮމިޝަމުން ސިޔާސީ ޕާޓީތަކަށް އެއްވެސް ހުރަހެއް ކުރިމަތި ނުކުރައްވާނެކަމަށް އަޙްމަދު ޢަލީ ވިދާޅުވިއެވެ.
ޤާނޫނީ ތަރަހައިގެ ބޭރުން ޢަމަލުކުރާ ޕާޓީތަކާ މެދު ފިޔަވަޅު އަޅުއްވަމުންގެންދަވާނެ ކަމަށާއި، ހުރިހާ ސިޔާސީ ހަރަކާތްތައް ކުރިއަށްގެންދަވަން ވާނީ ޤާނޫނީ ހަމަތަކާ އެއްގޮތްވާގޮތުގެ މަތިންކަމަށް އިލެކްޝަންސް ކޮމިޝަނުން ވިދާޅުވެއެވެ. ސިޔާސީ ޕާޓީތަކުން ހިންގާ ބައެއް ހަރަކާތްތައް ޤާނޫނާ ޤަވާއިދާއި، ޢާންމު އިޖްތިމާޢީ މިންގަނޑުތަކާއި ޚިލާފުވުމުން އިލެކްޝަންސް ކޮމިޝަނުންވަނީ އެކަންކަން ކުއްވެރި ކުރައްވައި، އަދި ބައެއް ޙާލަތްތަކުގެ ފިޔަވަޅުވެސް އަޅުއްވާފައެވެ. އެގޮތުން 2015 ވަނަ އަހަރުގެ މެއި މަހުގެ އެއްވަނަ ދުވަހު އިދިކޮޅު ފަރާތްތަކުން ކުރިއަށްގެންދިޔަ މުޒާހަރާ ފާހަގަކޮށްލެވެއެވެ.
އެމުޒާހަރާގައި ފުލުހުންނާއި އާންމުންގެ އެތައް ބަޔަކަށް އަނިޔާވެ، ހަމަނުޖެހުން ހިނގައި، މުޖުތަމައުގެ ހަމަޖެހުމާއި ރައްކާތެރިކަން ގެއްލޭފަދަ ޢަމަލުތައް ހިންގާފައިވެއެވެ. މިފަދަ ހަމަނުޖެހުމަކަށް ފުރުޞަތު ނުދެއްވުމަށް ސަލާމަތީ ގޮތުން ފުލުހުން ކުރައްވަންޖެހޭ ކަންކަން ކުރެއްވުމަކީ ފުލުހުންގެ ޒިންމާއެކެވެ.