އިނގިރޭސި ޕްރިމިއަރ ލީގުގައި ރަށުން ބޭރުގައި ސައުތެމްޓަން އަތުން 0-3 ގެ ނަތީޖާއަކުން މޮޅުވެ، މެންޗެސްޓާ ޔުނައިޓެޑުން ބަލިވުމުގެ ސިލްސިލާ ނިމުމަކަށް ގެނެސްފިއެވެ.
މިއީ ލީގުގައި އެންމެ ފަހުން ކުޅުނު ތިން މެޗުގެ ތެރެއިން ޔުނައިޓެޑް މޮޅުވި ފުރަތަމަ ފަހަރެވެ. އަނެއް ދެ މެޗުންވީ ބައްޔެވެ. ލީގުގައި އެ ޓީމު މޮޅުވެފައިވަނީ ފުރަތަމަ މެޗުގައި ފުލަމް އަތުން 1-0 އިންނެވެ.
އޯލްޑް ޓްރެފޯޑްގައި ކުޅުނު މި މެޗުގެ ފުރަތަމަ ހާފުގެ 35 ވަނަ މިނެޓުގައި ޔުނައިޓެޑްގެ ފުރަތަމަ ލަނޑުޖަހައިދިނީ ނެދަލެންޑްސްގެ ޑިފެންޑަރު، މަތައިސް ޑި ލިޓް އެވެ. އޭނާ މި ލަނޑުޖެހީ އެ ޓީމުގެ ކެޕްޓަން، ބްރޫނޯ ފެނާންޑޭސް ނަގައިދިން ހުރަހަކުން ލިބުނު ބޯޅައެއް ބޮލުން ގޯލްގެ ތެރެއަށް ފޮނުވާލައިގެންނެވެ.
ޔުނައިޓެޑުން ލީޑްނެގުމުގެ ކުރީން، ސައުތެމްޓަނަށް ލަނޑެއްޖަހައިދޭން ވަނީ ރަނުގެ ފުރުޞަތެއްލިބި ބޭކާރުވެފައެވެ. މެޗުގެ 33 ވަނަ މިނެޓުގައި ލިބުނު ޕެނަލްޓީއަކުން އެ ޓީމުގެ ފޯވާޑް، ކެމަރަން އާޗާ ފޮނުވާލި ބޯޅަ ޔުނައިޓެޑްގެ ގޯލްކީޕަރު، އަންދްރޭ އޮނާނާ ވަނީ މަތަކޮށްފައެވެ.
ފުރަތަމަ ހާފު ނިމެން ހަތަރު މިނެޓަށްވެފައިވަނިކޮށް، ޔުނައިޓެޑްގެ ދެވަނަ ލަނޑުޖަހައިދިނީ މާކަސް ރަޝްފޯޑް އެވެ. އޭނާ މި ލަނޑުޖެހީ އަމަޑް ޑިއާލޯ ދިން ބޯޅައަކުންނެވެ.
މެޗުގެ ދެވަނަ ހާފުގައި ޔުނައިޓެޑްގެ ލީޑް ފުޅާކޮށްދޭން ލިބުނު ފުރުޞަތުތަކުގެ ތެރެއިން ރަޝްފޯޑް އާއި ނުސައިރު މަޒްރައޮއީ ފޮނުވާލި ހަމަލާތަކުގައި ގޯލެއް ކާމިޔާބުނުކުރެވުނުއިރު، މެޗު ނިމެން 11 މިނެޓަށްވެފައިވަނިކޮށް ސައުތެމްޓަންގެ ޑިފެންޑަރު، ޖެކް ސްޓީވެންސް އަށް ސީދާ ރަތެއް ދެއްކުމުން ބާކީބައި ފުރިހަމަކުރީ 10 ކުޅުންތެރިންނާއެކު އެވެ.
ޔުނައިޓެޑްގެ ތިންވަނަ ލަނޑު، މެޗުގެ އިތުރުވަގުތުގެ ތެރޭގައި ކާމިޔާބުކޮށްދިނީ ފަހު ހާފުގައި ކުޅެން ނިކުތް އާޖެންޓީނާގެ ވިންގް، އަލެހަންދްރޯ ގަނާޗޯ އެވެ. މި ލަނޑުޖެހުމަށް އެހީތެރިވެދިނީ އެ ޓީމުގެ ޕޯޗުގީޒް ފުލްބެކް، ޑިއޯގޯ ޑަލޮޓް އެވެ.
މި މެޗުން ހޯދީ މޮޅާއެކު ޔުނައިޓެޑުން ބަލިވުމުގެ ސިލްސިލާ ނިމުމަކަށް ގެނެސް ކޯޗު، އެރިކް ޓެން ހާގްގެ އިތުރުން ސަޕޯޓަރުންނަށް އުފާވެރިކަން ގެނެސްދިން ނަމަވެސް، މެޗުގެ ފަހުބައިގައި އެ ޓީމުގެ ސެންޓްރަލް ޑިފެންޑަރުން ކަމަށްވާ، ލިސަންދްރޯ މާޓިނޭޒް އާއި ޑި ލިޓް ވަނީ އަނިޔާގެ ސަބަބުން ބަދަލުކޮށްފައެވެ.
ޔުނައިޓެޑް ވަނީ ހަތަރު މެޗުން ހަ ޕޮއިންޓް ހަމަކޮށް، ތާވަލްގެ ހަތްވަނަ އަށް ޖެހިލައިފައެވެ. މި މެޗުން ބަލިވި ސައުތެމްޓަން އޮތީ ފުލުން ދެވަނައިގައެވެ. މިހާތަނަށް ކުޅުނު ހަތަރު މެޗުން ވެސް އެ ޓީމު ވަނީ ބަލިވެފައެވެ.
ޔުނައިޓެޑުން ދެން އެންމެ އަވަހަށް ނިކުންނާނީ އީއެފްއެލް ކަޕްގެ ތިންވަނަ ބުރުގައި އަމިއްލަ ދަނޑުގައި އިނގިރޭސި ތިންވަނަ ޑިވިޝަނުގެ ބާންސްލީއާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ އަންނަ ބުދަ ދުވަހުގެ ރޭގަނޑު 12 ޖަހާއިރު އެވެ.