ސްޕެއިންގެ ކުޅުންތެރިއަކަށް ބެލޮންޑިއޯ ލިބޭނެކަމަށް ގަބޫލު ކުރަން: ޑެލަ ފުއެންޓޭ

ފީފާ ވޯލްޑް ކަޕްގެ ތަށި ކާމިޔާބު ކުރި ސްޕެއިން ޓީމުގައި ހިމެނުނު ކުޅުންތެރިންގެ ތެރެއިން ކުޅުންތެރިޔަކަށް މިފަހަރުގެ ބެލޮން ޑިއޯ އެވޯޑް ލިބުން ހައްގުކަމަށް ސްޕެއިން ޤައުމީ ޓީމުގެ ކޯޗު ލުއިސް ޑެލަ ފުއެންޓޭ ބުނެފިއެވެ.

އޭނާ މިހެން ބުނެފައިވަނީ މިހާރު ކުރިއަށްދާ ޔުއޭފާ ނޭޝަންސް ލީގުގައި ކްރޮއޭޝިއާ އާއި ދެކޮޅަށް ކުޅުމަށް ހަމަޖެހިފައިވާ މެޗުގެ ކުރިން ނޫސްވެރިންނާއި ވާހަކަ ދައްކަމުންނެވެ. ޑެލަ ފުއެންޓޭ ބުނީ އޭނާ ޤަބޫލް ކުރާގޮތުގައި ދުނިޔޭގައި އެންމެ މޮޅެތި ކުޅުންތެރިން ތިބީ ސްޕެއިން ޓީމުގައި ކަމަށާއި އޭގެ ތެރެއިން ކުޅުންތެރިޔަކަށް މިފަހަރުގެ ބެލޮން ޑިއޯ ލިބުން ހައްގު ކަމަށެވެ. އަދި ފާއިތުވީ ތަނުގައި މި އެވޯޑް ލިބުން ހައްގު ސްޕެއިންގެ އިތުރު ކުޅުންތެރިން ނުލިބި ތިބިކަން އޭނާ ފާހަގަ ކުރިއެވެ. އަދި އެންމެ ފަހުން ރޮޑްރީއަށް މިއެވޯޑް ލިބުމުން އުފާކުރި ކަމަށްވެސް އޭނާ ހާމަކުރިއެވެ. އަދި މިފަހަރު އަނެއްކާވެސް ސްޕެއިންގެ ކުޅުންތެރިޔަކަށް މިއެވޯޑް ލިބޭތަން ދެކެން ބޭނުން ވާކަމަށްވެސް ސްޕެއިންގެ ކޯޗު ބުންޏެވެ. އަދި މިހާރު ނޮމިނޭޓްވެފައިވާ ސްޕެއިންގެ ކުޅުންތެރިންގެ ތެރެއިން ކޮންމެ ކުޅުންތެރިޔަކަށް މި އެވޯޑް ލިބުނަސް އޭނާ އުފާވާނެ ކަމަށް ޑުލަ ފުއެންޓޭ ބުންޏެވެ.

މީގެއިތުރުން އެންމެ މޮޅު ކޯޗުގެ މަގާމަށް އޭނާ ނޮމިނެޓް ވެފައިވުމަކީ އޭނާއަށް ލިބިގެންދާ ވަރަށް ބޮޑު ޝަރަފެއްގެ ގޮތުގައިވެސް ޑެލަ ފުއެންޓޭ ފާހަގަ ކުރިއެވެ. އެންމެ ފަހުން ބެލޮން ޑިއޯގެ އެވޯޑް ސްޕެއިންގެ ކުޅުންތެރިޔަކަށް ލިބިފައިވަނީ 2024 ވަނަ އަހަރު ރޮޑްރީ އަށެވެ. އަދި އޭގެ އިތުރުން މިއެވޯޑް ލިބިފައިވާ ސްޕެއިންގެ އެހެން ކުޅުންތެރިންނަކީ 1957 ވަނަ އަހަރާއި 1959 ވަނަ އަހަރު އަލްފްރެޑޯ ޑި ސްޓެފާނޯ އަދި 1960 ވަނަ އަހަރު ލުއިސް ސުވަރޭޒްއެވެ.

ޑެލަ ފުއެންޓޭގެ ކޯޗު ކަމުގެ ދަށުން ސްޕެއިންވަނީ 2023 ވަނަ އަހަރުގެ ނޭޝަންސް ލީގުގެ އިތުރުން 2024 ވަނަ އަހަރުގެ ޔޫރޯ އަދި މިފަހަރު ފީފާ ވޯލްޑް ކަޕް ކާމިޔާބު ކޮށްފައެވެ. އަދި އެޓީމަށް ގެއްލިފައިވަނީ 2025 ވަނަ އަހަރުގެ ނޭޝަންސް ލީގެވެ. އެމުބާރާތުގައި ސްޕެއިން ވަނީ ޕޯޗުގަލް އާއި ވާދަކޮށް ޕެނަލްޓީ ޖަހައިގެން ބަލިވެފައެވެ. މީގެއިތުރުން ސްޕެއިން އަކީ ބައިނަލްއަޤްވާމީ ފުޓްބޯޅައިގާ ޖެހިޖެހިގެން އެންމެ ގިނަ މެޗުުން ބަލިނުވުމުގެ ރިކޯޑް އޮންނަ ޓީމެވެ. ސްޕެއިން އެންމެ ފަހުން އިންގްލަންޑްގެ މައްޗަށް ހޯދި ކާމިޔާބީ އާއެކު މިހާރުވަނީ ބަލިނުވެ 39 މެޗު ހަމަކޮށްފައެވެ. އަދި ކްރޮއޭޝިއާ އާއި ދެކޮޅަށް ކުޅޭ މެޗު ކާމިޔާބު ކޮށްފި ނަމަ މިއަދަދު 40 އަށް އެރުވުމުގެ ފުރުސަތު އޮންނާނެއެވެ.