ސިޓީގެ ޗެއާމަންގެ ބަހަށް އިތުބާރު ކުރަން: ހާޓް

އިންގްލިޝް ޕްރިމިއަރ ލީގުގެ މެންޗެސްޓަރ ސިޓީގެ ޗެއާމަން ހަލްދޫމް އަލް މުބާރަކްއަށް ފުރިހަމަ އިތުބާރު ކުރާކަމަށާއި އެކްލަބްގެ މައްޗަށް އުފުލާފައިވާ ދައުވާތަކުން ސަލާމަތްވާނެކަމަށް އޭނާާ ބުނެފައިވާ ވާހަކަ ގަބޫލް ކުރާކަމަށް އެޓީމުގެ ކުރީގެ ތަރި ޖޯ ހާޓް ބުނެފިއެވެ.

ހާޓް މިހެން ބުނެފައިވަނީ އިންގްލިޝް ޕްރިމިއަރ ލީގުން ސިޓީގެ މައްޗަށް އުފުލާފައިވާ 115 ދައުވާގެ ތެރެއިން އެންމެ ދައުވާއެއް ފިޔަވާ އެހެން ހުރިހާ ދައުވާއެއް ސާބިތުވާކަމަށް އިނގިރޭސި މީޑިއާތަކުން އާންމު ކުރި ހަބަރާއި ގުޅޭގޮތުން ވާހަކަ ދައްކަމުންނެވެ. އިނގިރޭސި މީޑިއާތަކުން މިކަން މިދިޔަ ހުކުރު ދުވަހުން ފެށިގެން ވަރަށް ގަދައަށް ކަވަރު ކުރަމުންދިޔަ ނަމަވެސް މިކަމާއި ގުޅޭގޮތުން ރަސްމީކޮށް އެއްވެސް ފަރާތަކުން އެއްވެސް ކަމެއް ހާމަކޮށްފައެއް ނުވެއެވެ. މިގޮތުން މިދައުވާތަކުގެ ތަހްގީގް ކުރިއަށް ގެންދިޔަ މިނިވަން ކޮމިޝަނުން ބަހެއް ބުނެފައިނުވާއިރު ޕްރިމިއަރ ލީގުންވެސް ބަހެއް ބުނެފައެއް ނުވެއެވެ. އަދި ސިޓީއިންވެސް މިމައްސަލަ އާއި ގުޅޭގޮތުން އެއްޗެއް ހާމަކޮށްފައިނުވި ނަމަވެސް އެކްލަބުންވަނީ ފެތުރެމުންދާ ވާހަކަ ތަކާއި ގުޅިގެން އެކްލަބްގެ ސަޕޯޓަރުންނަށް ޔަގީންކަން އެރުވުމުގެ ގޮތުން ޗެއާމަންގެ ސިޓީއެއް އާންމު ކޮށްފައެވެ. އެސިޓީގައި ވާގޮތުން އެކްލަބާއި ދެކޮޅަށް އުފުލާފައިވާ ދައުވާތަކުގެ މައްސަލަ އަދި ނުނިމޭ ކަމަށާއި އެކަން ނިމުމަށް ގިނަ މަރުހަލާތަކެއް ފުރިހަމަ ކުރުމަށް ބާކީ އޮތްކަން ހާމަކޮށްފައިވެއެވެ. އަދި އެކްލަބާއި ދެކޮޅަށް އުފުލާފައިވާ ދައުވާތަކުން ސިޓީ ސަލާމަތް ކުރެވޭނެ ކަމުގެ ޔަގީންކަން އެބައޮތްކަން ހާމަކޮށްފައިވެއެވެ.

މިކަމާއި ގުޅޭގޮތުން ވާހަކަ ދައްކަމުން ސިޓީއަށް ގިނަ އަހަރު ތަކެއް ވަންދެން ކުޅެފައިވާ ކުރީގެ ތަޖްރިބާކާރު ކީޕަރ ހާޓް ބުނީ މިކަމާއި ގުޅޭގޮތުން ހުރިހާ ފަރާތްތަކުން ތަފާތު އެކި ގޮތްގޮތަށް ދައްކަމުންދާ ވާހަކަތައް އަޑުއިވިފައިވާ ކަމަށެއެވެ. އަދި މިކަމާއި ގުޅޭގޮތުން ތެދަށް ހިޔާލެއް ފާޅުކުރާނަމަ ބުނެވޭނީ ސިޓީގެ ޗެއާމަނަށް އިތުބާރު ނުކުރެވޭ އެއްވެސް ސަބަބެއް ނެތް ކަމަށެވެ. އަލް މުބާރަކް މިކަމާއި ގުޅޭގޮތުން ބުނި ބަސް އޭނާއަށް މިކަމުގައި ފުދޭކަމަށް ހާޓް ފާހަގަ ކުރެއެވެ. ހާޓް ބުނީ މިހާރު މީޑިއާ ތަކުން އާންމު ކޮށްފައިވާ މަޢުލޫމާތު ތަކާއި ގުޅޭގޮތުން އަލް މުބާރަކް ވާހަކަ ދައްކާފައިވަނީ ކްލަބް ދެކެ ލޯބިވާ އެކްލަބަށް ހެޔޮއެދޭ ފަރާތެއްގެ ހައިސިއްޔަތުން ކަމަށެވެ.

ހާޓްވަނީ ސިޓީ އާއެކު 2011-2012 ވަނަ ސީޒަނާއި 2013-2014 ވަނަ ސީޒަންގައި ލީގު ކާމިޔާބު ކޮށްފައެވެ. މީގެއިތުރުން 2011 ވަނަ އަހަރު އެފް އޭ ކަޕް އަދި 2013-2014 ވަނަ ސީޒަނާއި 2015-2016 ވަނަ ސީޒަންގައި ލީގު ކަޕްވެސް ކާމިޔާބު ކޮށްފައެވެ. އުމުރުން 39 އަހަރުގެ ހާޓް ބުނީ ސިޓީއާއެކު ހޯދާފައިވާ ކާމިޔާބީތަަކާމެދު އޭނާ ވަރަށް ފަހުރުވެރިވާ ކަމަށާއި އެތަށިތަށް އެކްލަބަށް ގެއްލިދާނެކަމަށް ގަބޫލް ނުކުރާ ކަމަށެވެ. ހާޓް ބުނީ އޭނާ އެކްލަބްގައި ކުރި މަސައްކަތް އޭނާއަށް އެނގޭ ކަމަށާއި އޭނާ އާއެކު އެހެން ހުރިހާ ކުޅުންތެރިންނާއި ފަރާތްތަކުން ކުރިކަންތައް އެނގޭ ކަމަށާއި އަދި ކަންތައްތައް ހިނގައިދިޔަގޮތްވެސް އެނގޭ ކަމަށާއި އަދި އެހެންކަމުން ބުނެވޭނީ ސިޓީއިން އެއްވެސް ކަމެއް އޮޅުވާލައިގެން މަކެއް ކުރަން އުޅެފައިނުވާ ކަމަށެވެ.