އެމެރިކާގެ މޭޖާ ލީގު ސޮކާގައި ފިލަޑެލްފިއާ ޔޫނިއަންއާ ދެކޮޅަށް އިންޓަ މިއާމީ އަށް އޮތް މެޗުގައި އާޖެންޓީނާގެ ކެޕްޓަން، ލިއޮނަލް މެސީ އަށް ކުޅެވިދާނެ ކަމަށް އެ ޓީމުގެ ކޯޗު، ޓާޓާ މާޓީނޯ ބުނެފިއެވެ.
"އާނ، އޭނާ މިހާރު އަނިޔާއިން ރަނގަޅުވެއްޖެ،" މާޓީނޯ ހުކުރު ދުވަހު ނޫސްވެރިންނަށް ސްޕެނިޝް ބަހުން ދިން އިންޓަވިއުގައި ބުންޏެވެ.
"އިއްޔެ އޭނާ ޓްރެއިނިންގ އަށް އެނބުރި އައިސްފި، އޭނާ (ހޮނިހިރު ދުވަހުގެ މެޗަށް) ނެގުމުގެ ފުރުޞަތު އެބައޮތް. މިއަދުގެ ސެޝަނަށްފަހު މެސީ ބޭނުންކުރުމާ މެދު ގޮތެއް ނިންމާނަން، އެކަމަކު އޭނާގެ ބޭނުން ކުރެވިދާނެ." މާޓީނޯ ބުންޏެވެ.
މިވަގުތު އެމްއެލްއެސްގެ އީސްޓަން ކޮންފަރެންސްގެ އެއްވަނައިގައި ކުޅުނު 27 މެޗުން ލިބުނު 59 ޕޮއިންޓާއެކު މިއާމީ އޮތްއިރު، އެ ޓީމަށް އެންމެ ފަހުން މެސީ ކުޅެފައިވަނީ މިދިޔަ ޖޫން މަހުގެ 1 ވަނަ ދުވަހު އެވެ.
އެއަށްފަހު، އެންމެ ފަހުގެ ކޮޕާ އެމެރިކާ ފުޓްބޯޅަ މުބާރާތުގައި ކުޅުނު އާޖެންޓީނާ އާއެކު މިދިޔަ ޖުލައި މަހުގެ 14 ވަނަ ދުވަހު ކޮލަމްބިއާ އާ ބައްދަލުކުރި ފައިނަލް މެޗުގައި ފައިގެ ކުޑަހުޅުގެ ލިގަމެންޓަށް ލިބުނު އަނިޔާގެފަހުން ކުޅެފައެއްނުވެއެވެ.
މި އަނިޔާއިން ރިކަވާވެ، މެސީ ވަނީ މިދިޔަ އޮގަސްޓް މަހުގެ 31 ވަނަ ދުވަހު މިއާމީން ޝިކާގޯއާ ދެކޮޅަށް ކުޅުނު މެޗުގެ ކުރީން އެ ޓީމާއެކު ފަރިތަކުރުންތަކުގައި ބައިވެރިވާން ފަށައިފައެވެ. އެއަށްފަހު، ނިމިދިޔަ އިންޓަނޭޝަނަލް ބްރޭކްގައި އާޖެންޓީނާގެ ސްކޮޑުގައި ބައިވެރިނުވެ، މެސީ ވަނީ މިއާމީ އާއެކު މަޑުކޮށްފައެވެ.
މިއާމީ އިން މެސީ ނެތި ކުޅުނު 9 މެޗުގެ ތެރެއިން 8 މެޗުން ވަނީ މޮޅުވެފައެވެ. އަދި ޝީލްޑް ރޭހުގައި ލޮސް އެންޖެލެސް ގެލެކްސީ އަށްވުރެ އެއް މެޗު މަދުން ކުޅެ 7 ޕޮއިންޓް ކުރީގައި އޮތްއިރު، ލީޑް އިތުރަށް ފުޅާކުރުމުގެ ފުރުޞަތު އެބައޮތެވެ.
އަދި އީސްޓަން ކޮންފަރެންސްގެ އެއްވަނަ މަގާމުގައި މިވަގުތު އެ ޓީމު އޮތީ ދެވަނައިގައި އޮތް ސިންސިނާޓީ އަށް ވުރެ އަށް ޕޮއިންޓް އިތުރަށް ހޯދައިގެންނެވެ. ސިންސިނާޓީ އަށް 27 މެޗުން ލިބިފައިވަނީ 51 ޕޮއިންޓެވެ. ތިންވަނައިގައި އޮތް ކޮލަމްބަސް ކްރޫ އަށް 26 މެޗުން 49 ޕޮއިންޓް ލިބިފައިވާއިރު، ނިއު ޔޯކް ރެޑް ބުލްސް އޮތީ 28 މެޗުން ލިބުނު 43 ޕޮއިންޓާއެކު ހަތަރުވަނައިގައެވެ.
މެސީ ނެތި މިއާމީން ދައްކަމުންއަންނަ މޮޅު ކުޅުމުގައި އެންމެ ހިއްސާ ބޮޑު އެއްކުޅުންތެރިއަކީ ދާދިފަހުން އުރުގުއޭ ގައުމީ ޓީމަށް ކުޅުން ހުއްޓާލި ފޯވާޑް، ލުއިސް ސުއަރޭޒް އެވެ. އޭނާ ވަނީ އެ ޓީމު އެންމެ ފަހުން ޝިކާގޯއާ ދެކޮޅަށް ކުޅުނު މެޗުގައި ޖެހި ދެލަނޑާއެކު، މުޅިއެކު 16 ގޯލް ހަމަކޮށްފައެވެ. މިއާއެކު، ލަނޑުލިސްޓުގެ އެންމެ ކުރީގައި އުޅޭ ކުޅުންތެރިޔާއަށް ވުރެ މަދުވަނީ އެންމެ ދެ ގޯލެވެ.
މިއާމީން ކުރިއަށް އޮތް މެޗުގައި ބައްދަލުކުރުމަށް ހަމަޖެހިފައިވާ ފިލަޑެލްފިއާ މިވަގުތު އޮތީ ލީގުގެ 11 ވަނައިގައެވެ. މިހާތަނަށް ކުޅުނު 27 މެޗުން އެ ޓީމަށް ލިބިފައިވަނީ 30 ޕޮއިންޓެވެ. އެ ޓީމުން މީގެ ދެ ހަފްތާކުރީން ރެޑް ބުލްސް އަތުން 2-0 އިން ހޯދީ މޮޅާއެކު ޕްލޭ-އޮފް ރޭހަށް އެނބުރިއައުމަށް ވަނީ އުއްމީދެއް ލިބިފައެވެ.
މިއާމީގެ ދަނޑުގައި ފިލަޑެލްފިއާ އާ ބައްދަލުކުރާ މެޗު ކުޅުމަށް ހަމަޖެހިފައިވަނީ ރާއްޖޭގަޑިން މިރޭ ފަތިހު 4:30 ގައެވެ.