ނިލަންދޫ ނަރުދަމާގެ މައްސަލަ ޙައްލުކުރަން އައު ޒަމާނީ ނިޒާމެއް

ނިލަންދެ އަތޮޅު އުތުރުބުރި ނިލަންދޫގެ ނަރުދަމާގެ މައްސަލަ ޙައްލުކުރުމަށް، މުޅިން އައު ޒަމާނީ ނިޒާމެއް ޤާއިމްކުރުމަށް ނިންމާފައިވާކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ ލިމިޓެޓް އެމްޑަބްލިއުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވެއްޖެއެވެ.

މަތީން ވިދާޅުވީ ޢިމާރާތްކުރުމާ ބިނާރާ ބެހޭ ވުޒާރާއިން އެކަމުގެ ހުއްދަ ލިބުނުހާ އަވަހަކަށް އެރަށުގެ މަސައްކަތްތައް ފަށްޓަވާނެކަމަށެވެ.

ނިލަންދޫގައި ޤާއިމްކޮށްފައިވާ ނަރުދަމާއަކީ މީގެ 17ވަރަކަށް އަހަރު ކުރިން އެރަށުގައި ބޭނުންކުރަން ފެށި ނިޒާމެކެވެ. މިއީ ރާއްޖޭގައި އާއްމުކޮށް އަޅާ ނަރުދަމާ ނިޒާމްގެ މޮޑެލާއި ތަފާތުކޮށް، ނެދަލޭންޑްގެ ކުންފުންޏަކާ ހަވާލުކޮށްގެން އަޅާފައިވާ ވެކިއުމް ނަރުދަމާ ނިޒާމެކެވެ.

ނިލަންދޫގެ ނަރުދަމާ ނިޒާމަކީ ދުވަސްވީ ނިޒާމަކަށްވެފައި، އެ ނިޒާމު ރަނގަޅަށް ނުބެލެހެއްޓުމުގެ ސަބަބުން ގިނަ މައްސަލަތަކަކާވަނީ ކުރިމަތިވެފައެވެ. އެގޮތުން ވެކިއުމް ސިސްޓަމް އަދި ނަރުދަމާ ވިއުގައިން ރަނގަޅަށް ފެން ނުދާތީ، މަގުތަކަށް ނަޖިސް ބޭރުވުމުގެ މައްސަލަ އެރަށުގައި ވަނީ ބޮޑުވެފައެވެ. އެމައްސަލަ ހައްލުނުވުމުގެ ސަބަބުން ރަށުގެ މަގުތަކުގައި ވަޅުގަނޑު ހަދައިގެން ފެން ބޭރުކުރަން ރައްޔިތުންނަށް މަޖުބޫރުވާ ހިސާބަށް އެމައްސަލަ ގޯސްވެފައިވެއެވެ.

ނިލަންދޫގެ ނަރުދަމާ ބެލެހެއްޓުމުގެ މަސައްކަތް 2019ވަނަ އަހަރު ފެނަކައާއި ހަވާލުކޮށްފައިވެއެވެ. ނަމަވެސް މި ނިޒާމަކީ ރާއްޖޭގައި އާންމުކޮށް ބޭނުންކުރާ ނަރުދަމާއާއި ތަފާތު ނިޒާމަކަށްވުމުން، ވިއުގަ ރަނގަޅަށް ނުބެލެހެއްޓި މައްސަލައަށް އަދިވެސް އޮތީ ޙައްލެއް ނުލިބިފައެވެ. މިއާއެކު ރައްޔިތުންނަށް ވަނީ އެތައް ތަކުލީފެއް އުފުލަންޖެހިފައެވެ.

މި މައްސަލައަށް ވަގުތީ ޙައްލެއް ހޯދައިދިނުމުގެ ގޮތުން އެރަށަށް ޖަންކްޝަން ހިއްކާ ބައުޒަރެއް ގެންގޮސް އަންނަނީ ބޭނުންކުރަމުންނެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އެމްޑަބްލިއުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވީ ނިލަންދޫގެ ނަރުދަމާގެ މައްސަލަ ޙައްލުކުރުމަށް އެ ކުންފުންޏާ ހަވާލުކޮށްފައިވާކަމަށެވެ. މަތީން ވިދާޅުވީ ފުރަތަމަ ހަވާލުކުރީ މިހާރު އޮތް ވެކިއުމް ނިޒާމު ރަނގަޅުކުރުމަށްކަމަށެވެ. ނަމަވެސް މިހާތަނަށްވެސް ދާއިމީ ޙައްލެއް ނުލިބޭތީ އެކަމަށް މިހާރު އޮތް ދާއިމީ ޙައްލެއްގެ ގޮތުގައި ދެކެނީ އައު ނިޒާމެއް އެޅުންކަމަށާއި، އެކަމަށް އެދި ޢިމާރާތްކުރުމާ ބެހޭ ވުޒާރާއަށް ހުށައަޅާފައިވާކަމަށް މަތީން ވަނީ ވިދާޅުވެފައެވެ.

"ވަރަށް ތަކުލީފު ބޮޑު ނިޒާމެއް އެރަށުގައި މިހާރު އޮތީ. މައްސަލަ ޙައްލުކުރަން ބޭނުންވާ އެހީ މިދަނީ ދެމުން. މިހާރު އަޅުގަނޑުމެން ހުށައަޅާފަވީ މިހާރު އޮތް ވެކިއުމް ސިސްޓަމް ދޫކޮށްލާފައި ގްރެވިޓީ ނިޒާމަކަށް ދާން. ސަރުކާރުން ގޮތެއް ނިންމިހާ އަވަހަކަށް މަސައްކަތް ފަށާނަން." އެމްޑަބްލިއުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވިއެވެ.

ނިލަދޫގެ އިތުރުން އެހެން ރަށްރަށުގައިވެސް ފެނާ ނަރުދަމާއަށް ދިމާވެފައިވާ އެފަދަ މައްސަލަތައް ޙަލުކުރުމަށް އެމްޑަބްލިއުއެސްސީން ދަނީ މަސައްކަތްކުރަމުންނެވެ. އެގޮތުން މަސައްކަތް ނުނިމިވާ 22 ރަށެއްގެ ފެނާ ނަރުދަމާ ނިޒާމު ނިންމުމަށް އެ ކުންފުނިން މިހާރު ވަނީ މަސައްކަތް ފަށާފައެވެ.