ގައުމީ އެތުލެޓިކްސް ޗެމްޕިއަންޝިޕް: 100 މީޓަރު ދުވުމުގައި ސާއިދު ފަހަތަށް ޖައްސާލައި ރަން މެޑަލް އިބާދުﷲ އަށް

އެތުލެޓިކްސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބާއްވާ 33 ވަނަ ގައުމީ އެތުލެޓިކްސް ޗެމްޕިއަންޝިޕް މިއަދު ފެށިއިރު، ފިރިހެނުންގެ 100 މީޓަރު ދުވުމުގެ ރަން މެޑަލް އިބާދުﷲ އާދަމް ހޯދައިފިއެވެ.

މާލޭ އެކުވެނި ސިންތެޓިކް ޓްރެކުގައި ކުރިއަށްދާ މި މުބާރާތުގައި މިއަދު ކުރިއަށްދިޔަ ފައިނަލް ހީޓު ރައުހަތު ސްޕޯޓްސްގެ އިބާދުﷲ ކާމިޔާބުކުރީ 10.59 ސިކުންތުން ރޭސް ނިންމައިގެންނެވެ. މި ބައިން ރިހި މެޑަލް ހޯދީ ރާއްޖޭގައި އުފެދުނު އެންމެ ކާމިޔާބު ދުވުންތެރިޔާ, ދިވެހި ސިފައިންގެ ކުލަބުގެ ހަސަން ސާއިދެވެ. އޭނާ ރޭސް ނިންމާފައިވަނީ 10.67 ސިކުންތުންނެވެ. އަދި ލޯ މެޑަލް ހޯދި ޓްރެކް އެންޑް ފީލްޑް އެސޯސިއޭޝަނުގެ މުޙައްމަދު މިންހާލް ޝާމިން ރޭސް ނިންމާފައިވަނީ 10.74 ސިކުންތުންނެވެ.

މި ފަހަރުގެ ގައުމީ މުބާރާތުގެ 100 މީޓަރު ދުވުން އިބާދުﷲ ކާމިޔާބުކުރުމާއެކު، ސާއިދަށް ވަނީ ގިނަ އަހަރުތަކެއް ފަހުން މި އިވެންޓުގެ ރަން މެޑަލް ގެއްލިފައެވެ.

މީގެ އިތުރުން މިއަދު ކުރިއަށްދިޔަ އަންހެނުންގެ 100 މީޓަރު ދުވުމުން ރަން މެޑަލް ހޯދީ ޝަރީފް ސްޕޯޓްސްގެ އަހުނާ ނިޒާރެވެ. އޭނާ ވަނީ 12.33 ސިކުންތުން ރޭސް ނިންމާފައެވެ. ރިހި މެޑަލް ހޯދި ކަސްޓަމްސް ރެކްރިއޭޝަން ކުލަބުގެ އައިޝަތު ޝަބާ ސަލީމް 12.40 ސިކުންތުން ރޭސް ނިންމިއިރު، ލޯ މެޑަލް ހޯދާފައިވަނީ އައްޑޫ އެތުލެޓިކްސްގެ އައިޝަތު ހިމްނާ ހަސަނެވެ. އޭނާ ރޭސް ނިންމީ 12.58 ސިކުންތުންނެވެ.

މީގެ އިތުރުން މާސްޓާސް ކެޓެގަރީގެ ފިރިހެނުންގެ 100 މީޓަރު ދުވުމުން ރަން މެޑަލް ހޯދީ ނަސީރު ސްޕޯޓްސް ކުލަބުގެ އަޙްމަދު އަބްދުލް އަޒީޒެވެ. އޭނާ ވަނީ 13.03 ސިކުންތުން ރޭސް ނިންމާފައެވެ. ރިހި މެޑަލް ހޯދި ސިފައިންގެ ކުލަބުގެ ސޮލާހު މުޙައްމަދު 13.12 ސިކުންތުން ރޭސް ނިންމިއިރު، ލޯ މެޑަލް ހޯދާފައިވަނީ މެރެތަން ރަނާސް މޯލްޑިވްސްގެ މިންއާމް ނަސީމެވެ. އޭނާ ރޭސް ނިންމީ 13.29 ސިކުންތުންނެވެ.

މާސްޓާސް ކެޓެގަރީގެ އަންހެނުންގެ 100 މީޓަރު ދުވުމުން ރަން މެޑަލް ހޯދާފައިވަނީ ނަސީރު ސްޕޯޓްސް ކުލަބުގެ ފާތިމަތު މުޙައްމަދު މަނިކެވެ. އޭނާ ރޭސް ނިންމީ 16.11 ސިކުންތުންނެވެ. ރިހި މެޑަލް ހޯދި ނަސީރު ސްޕޯޓްސް ކުލަބުގެ ޔުމްނާ އަބްދުލް އަޒީޒް 16.49 ސިކުންތުން ރޭސް ނިންމިއިރު، ލޯ މެޑަލް ހޯދާފައިވަނީ އެލީޓް ރަނާސް މޯލްޑިވްސްގެ ހުސްނާ މުޙައްމަދެވެ. އޭނާ ރޭސް ނިންމީ 17.36 ސިކުންތުންނެވެ.

މީގެ އިތުރުން މިއަދު ކުރިއަށްދިޔަ އަންހެނުންގެ 5000 މީޓަރު ދުވުން ކާމިޔާބުކޮށް، ރަން މެޑަލް ހޯދީ އައިލެންޑް ރަނާސް މޯލްޑިވްސްގެ ޝްރެސްތާ ސަންތޯޝީއެވެ. އޭނާ ރޭސް ނިންމީ 17 މިނެޓު 50.68 ސިކންތުންނެވެ. މި އިވެންޓުން ރިހި މެޑަލް ހޯދި އައިލެންޑް ރަނާސްގެ ޝަމްހާ އަޙްމަދު ރޭސް ނިންމާފައިވަނީ 20 މިނެޓު 37.95 ސިކުންތުންނެވެ. އަދި ލޯ މެޑަލް ހޯދި އެލީޓް ރަނާސްގެ ނިޒްމީނާ އަޙްމަދު ރޭސް ނިންމާފައިވަނީ 22 މިނެޓު 37.29 ސިކުންތުންނެވެ.

މި އަހަރުގެ ގައުމީ އެތުލެޓިކްސް ޗެމްޕިއަންޝިޕް މިއަދު ފެށިއިރު، އަންނަ ހޮނިހިރު ދުވަހުގެ ނިޔަލަށް މި މުބާރާތް ކުރިއަށްދާނެއެވެ.