ރައީސް ދެއްވީ ގެދޮރުވެރިކަމުގެ މައްސަލަ ހައްލުކުރައްވާނެކަމުގެ ޔަޤީންކަން

ގެދޮރުވެރިކަމުގެ މައްސަލައަށް ހައްލު ގެނެސްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ދެއްވާފައިވާކަމަށް ގެދޮރުވެރިކަމާ ބެހޭ ޖަމްޢިއްޔާތަކުން ބުނެފިއެވެ.

އެޖަމްޢިއްޔާތަކުން މިކަން ހާމަކުރެއްވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ ގެދޮރުވެރިކަމާއި ބެހޭ އެކި ޖަމްޢިއްޔާތަކާއެކު ބޭއްވެވި ބައްދަލުވުމަށްފަހު ޕީއެސްއެމް ނިއުސްއަށް މަޢުލޫމާތުދެއްވަމުންނެވެ.

މާލެ ސަރަޙައްދުގައި ހަރަކާތްތެތިވާ ގެދޮރުވެރިކަމާގުޅޭ ބައެއް ޔޫނިއަންތަކާއެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި ގެދޮރުވެރިކަމާބެހޭ ޔުނިއަންތަކުގެ މެންބަރުން ވަނީ، މާލެ ސަރަޙައްދުގައި ކުރިއަށްގެންދާ ބޯހިޔާވަހިކަމުގެ މަޝްރޫޢުތަކާއި ގުޅިގެން، ރައްޔިތުންގެ ހުރި ކަންބޮޑުވުންތަކާއި ގޮންޖެހުންތައް ރައީސުލްޖުމްހޫރިއްޔާއާ ހިއްސާ ކުރައްވާފައެވެ. އެ ގޮތުން އެބޭފުޅުން ފާހަގަކުރެއްވި ކަންކަމުގެ ތެރޭގައި، މާލެ ސަރަޙައްދުން ދޫކޮށްފައިވާ ގޯތިތަކުގެ ތެރެއިން އެކިކަންކަމާއި ގުޅިގެން އަދި ހަވާލުނުކުރެވި ހުރި ގޯތިތަކުގެ ރަޖިސްޓްރީތަކާއި، އެޝުއަރެންސް ސިޓީގެ ކަންކަން އަވަސް ކޮށްދެއްވުމާއި، ކަމާގުޅޭ ފަރާތްތަކުން ޖަވާބުދާރީވުން މިހާރަށްވުރެ ހަރުދަނާގޮތެއްގައި ކުރިޔަށްގެންދިއުމާއި،އަދި ރައްޔިތުންގެ ހައްގުތައް ކަށަވަރުކުރެވޭގޮތަށް މިކަންކަން ހައްލުކޮށްދެއްވުން ހިމެނެއެވެ.

މިބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ބޯހިޔާވަހިކަމަކީ މި ސަރުކާރުން އެންމެ ބޮޑު އިސްކަމެއް ދެއްވާ އެއްކަންތައް ކަމަށެވެ. އެގޮތުން ގެޒެޓްގައި ނަން ޢާންމުކޮށްފައިވާ ކޮންމެ ބޭފުޅަކަށް، ރައީސުލްޖުމްހޫރިއްޔާގެ ރިޔާސީ ވަޢުދާ އެއްގޮތަށް، ޤަވާޢިދާ ޚިލާފުނުވާނަމަ ގޯތި ލިބޭނެކަމުގެ ޔަޤީންކަން އެމަނިކުފާނު ދެއްވިއެވެ. އަދި މިހާރު ކުރިއަށްގެންދާ މަސައްކަތްތަކާ ކުރިއަށް ގެންދަން ރޭވިފައިވާ މަޝްރޫޢުތަކުގެ އަދާހަމަ ތަފްސީލުތައް މެންބަރުންނާއި ހިއްސާ ކުރައްވައި، އެ މަސައްކަތުގައި ކުރިމަތިވާ ދަތިތަކަށް ހައްލެއް ހޯއްދަވައި ދެއްވާނެކަމުގައި އެމަނިކުފާނު ވިދާޅުވިއެވެ. އަދި ރައްޔިތުންނަށް ފަސޭހަވާނެ ގޮތަށް ކަމާގުޅޭ ފަރާތްތަކާ ގުޅިގެން، ވީހާވެސް އަވަހަށް އެކަންކަން ހައްލުކޮށްދެއްވާނެކަމުގެ ޔަޤީންކަން އެމަނިކުފާނުގެ ވަނީ ޔޫނިއަންތަކުގެ މެމްބަރުންނަށް ދެއްވާފައެވެ.

މިބައްދަލުވުމަށްފަހު ޕީއެސްއެމަށް ދިން އިންޓަރވިއުގައި ގެދޮރުވެރިކަމާއި ބެހޭ ޖަމްޢިއްޔާތަކުން ބުނީ ރައީސުލްޖުމްހޫރިއްޔާ މިޖަމްޢިއްޔާތަކާއި ބައްދަލުކުރެއްވުމަކީ ގެދޮރުވެރިކަމުގެ މައްސަލައަށް ރައީސް އަހަންމިއްޔަތުކަން ދެއްވާކަންދޭހަވާކަމެއްކަމަށެވެ. އަދި މީގެކުރިން އެކި މުއައްސަސާތަކަށް ގޮސްގެންވެސް މިކަމުގައި އެދެވޭ ޖަވާބުތަކެއް ނުލިބޭކަމަށާއި ރައީސްއާއެކު ބޭއްވި ބައްދަލުކުރެއްވުމުގައި މިކަމުގައި ކުރިއަށްދާންވީ ރަނގަޅު މަގު ސާފުވެފައިވާކަމަށް އެޖަމްޢިއްޔާތަކުން ފާހަގަކުރިއެވެ.

"އަޅުގަނޑުމެން ވަރަށް ބަލައިގަންނަން ރައީސް އަޅުގަނޑުމެންގެ ކަންބޮޑުވުން އަޑުއަހާ އެކަމަށް އުއްމީދީ ޖަވާބުތަކެއް ދެއްވުމުން. މިއޮތްހާ ދުވަހުވެސް އެކި މިނިސްޓްރީތަކުން ޖަވާބުތަކެއް ނުލިބި އޮތީ. އެހެންނަމަވެސް ރައީސް އެސްޓެބްލިޝްކޮށްދެއްވި މިޗެނަލްގެ ސަބަބުން ގޯތިގެދޮރުގެ މައްސަލައިގައި އެންމެންގެ އޮތް ހާސްކަން ފިލައިގެންދާނެކަމަށް ޤަބޫލުކުރަނީ." ޖަމްޢިއްޔާއެއްގެ މެމްބަރަކު ފާހަގަކުރިއެވެ.

ބިންހިއްކުމާއި ގޯތި ދިނުމަށްޓަކައި ސަރުކާރުން ގެންގުޅުއްވާ ސިޔާސަތުތައް ވަރަށް ތަފްސީލީގޮތެއްގައި ހިއްސާކޮށްދެއްވާފައިވާކަމަށް ޖަމްޢިއްޔާތަކުގެ މެމްބަރުންވަނީ ބުނެފައެވެ.

އެގޮތުން ރައީސުލްޖުމްހޫރިއްޔާއާއެކު ބޭއްވެވި ބައްދަލުކުރެއްވުމަކީ ގިނަ ކަންބޮޑުވުންތަކަކަށް އުއްމީދީ ޖަވާބުތަކެއް ލިބިގެންދިޔަ ބައްދަލުވުމެއްގެގޮތުގައި ޖަމްޢިއްޔާތަކުންވަނީ ސިފަކޮށްފައެވެ. އަދި ރައްޔިތުންގެ މަޖިލީހުގައި ތިއްބެވި ސަރުކާރުގެ މެމްބަރުންނާއި ސަރުކާރަށް ނިސްބަތްވާ ފަރާތްތަކަކީ ރައްޔިތުންގެ ޙައްގުތައް ރައްކާތެރިކުރުމަށް މަސައްކަތްކުރާ ފަރާތްތަކެއްކަން ޔަގީންކުރައްވާނެކަމަށް ރައީސުލްޖުމްހޫރިއްޔާ ވިދާޅުވެފައިވާކަމަށް މެމްބަރުންވަނީ ބުނެފައެވެ.