ފަތުރުވެރިކަމުގެ ދާއިރާގައި ހަރަކާތްތެރިވާ އަންހެނުންނަށް ޓްރެވަލް ކޮންފަރެންސެއް ބާއްވަނީ
-
މި ކޮންފަރެންސް ބާއްވަނީ މަޓާޓޯއާއި ހޮޓެލް ޖެން ގުޅިގެން
-
ކޮންފަރެންސް އޮންނާނީ އަންނަ މަހުގެ 19 ގައި
ހުސް އަންހެނުން ބައިވެރިވާ ޓްރެވަލް ކޮންފަރެންސެއް ހޮޓެލް ޖެން އާއި ގުޅިގެން ބޭއްވުމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ނިންމައިފިއެވެ.
މަޓާޓޯ އިން ބުނީ ފަތުރުވެރިކަމުގެ ސިނާއަތުގައި ހަރަކާތްތެރިވާ އަންހެނުންނަށް ޚާއްސަކޮށްގެން ބާއްވާ މި ކޮންފަރެންސް އޮންނާނީ އަންނަ މަހުގެ 19 ވަނަ ދުވަހު، ހޮޓެލް ޖެންގައި ކަމަށެވެ.
މި ކޮންފަރެންސްގެ އަމާޒަކީ ލީޑަރޝިޕްގެ މަގާމުތަކުގައި ތިބި އަންހެނުންނަށް ދިމާވާ މުހިންމު މައްސަލަތަކަށް އަލިއަޅުވާލުން ކަމަށް މަޓާޓޯއިން ބުނެއެވެ. ހަމަހަމަކަން އިތުރުކުރުމަށާއި، ފަތުރުވެރިކަމުގެ ސިނާއަތަށް ދިމާވާ ގޮންޖެހުންތަކަށް ހައްލު ހޯދުމުގެ މަޤްޞަދުގައި ކުރިއަށް ގެންދާ މި ހަރަކާތުގައި މުޅިންވެސް އަންހެން ސްޕީކަރުން ހިމެނޭ ދެ ޕެނަލެއް އޮންނާނެކަމަށް އެ އެސޯސިއޭޝަނުން ބުނެއެވެ.
މަޝްވަރާ ކުރުމަށް ނިންމާފައިވާ މައުޟޫޢުތަކަކީ:
• ވިމެން އިން މެނޭޖްމަންޓް - އެޑްރެސިން ދަ ޖެންޑަރ ޑިސެމްބްލިޓީ
• ވިމެން އިން ޓުއަރިޒަމް - ކޮމްބެޓިން ސޯޝަލް ސްޓިގްމާ
މަޓާޓޯއިން ބުނީ މި ކޮންފަރެންސަކީ ފަތުރުވެރިކަމުގެ ދާއިރާގައި އަންހެނުންނަށް ކުރިމަތިވާ ހުރަސްތަކާ މެދު ހޭލުންތެރިކަން އިތުރުކުރުމަށާއި، އެއްބާރުލުންދޭ އަދި ހަމަހަމަ މާހައުލެއް ގާއިމުކުރުމަށް ބޭނުންވާ ސްޓްރެޓެޖީތައް ދެނެގަތުމުގެ މަޤްޞަދުގައި ބާއްވާ ކޮންފަރެންސެއް ކަމަށެވެ.