10 ވަނަ ގައުމީ ރާޒުވާ މުބާރާތުގެ އަންހެން ބައިގެ ޗެމްޕިއަންކަން ނިހާޔާ އަޙްމަދު އަދި ފިރިހެން ބައިގެ ޗެމްޕިއަންކަން މުޙައްމަދު ޝުއާއު ހޯދައިފިއެވެ.
ގައުމީ ރާޒުވާ މުބާރާތުގެ އޯޕަން ބައިގެ އަންހެން އަދި ފިރިހެން ޗެމްޕިއަން ކުޅުންތެރިންނަށް އިނާމު ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ. މި އަހަރުގެ ގައުމީ ރާޒުވާ މުބާރާތަކީ މިހާތަނަށް އެންްމެ ގިނަ ކުޅުންތެރިން ވާދަކުރި ގައުމީ މުބާރާތެވެ.
އެގޮތުން މި އަހަރު ދެ ކެޓެގަރީގައި 111 ކުޅުންތެރިން ވާދަކުރިއެވެ. އެއީ އަންހެން ކެޓެގަރީގައި 33 ކުޅުންތެރިންނާއި، އޯޕަން ބައިގައި 78 ކުޅުންތެރިންނެވެ. މެއި މަހުގެ 27 އިން ޖޫން ހަތަކަށް ކުރިއަށްދިޔަ މުބާރާތުގެ ދެ ކެޓެގަރީގައި ޖުމްލަ 580 މެޗު ކުޅުނެވެ.
މި އަދަދުތަކަކީ މިދިޔަ އަހަރާ ބަލާއިރު 24 އިންސައްތަ ކުރިއެރުމެކެވެ. މިދިޔަ އަހަރުގެ އަންހެން ބައިގައި ވާދަކުރީ 19 ކުޅުންތެރިންނެވެ. އޯޕަން ބައިގައި ވާދަކުރީ 65 ކުޅުންތެރިންނެވެ.