ޣައްޒާގައި ވެރިކަން ކުރާ ޙަމާސް ޖަމާޢަތުގެ މުޖާހިދުންނަށް ޙަމަލަ ދިނުމުގެ ނަމުގައި ޔަހޫދީ ފައުޖުން ޔަހޫދީ ރައްޔިތުންނަށް އަމާޒުކޮށް ނުރައްކާތެރި ޙަމަލާތަކެއް ދީފައިވާ ކަން ފަޅާއަރައިފިއެވެ. ޔަހޫދީ ފައުޖުގެ އަސްކަރީ ހެލިކޮޕްޓަރުތަކުން އެ ޤައުމުގެ ރައްޔިތުންނަށް އަމާޒުކޮށް ޙަމަލަދީފައިވާ ކަން ފަޅާއަރާފައި ވަނީ ލީކު ކޮށްލާފައިވާ އޯޑިޔޯ ރެކޯޑިންތަކެއްގައެވެ.
އެ އޯޑިޔޯ ރެކޯޑިންތަކަކީ، ޔަހޫދީންގެ ހަނގުރާމައިގެ ކެބިނެޓުގެ މިނިސްޓަރުންނާއި ޙަމާސް ޖަމާޢަތުން މިނިވަން ކޮށްފައިވާ އަސީރުންގެ ބަޔަކާ ދެމެދު ބާއްވާފައިވާ ބައްދަލުވުންތަކެއްގައި ދައްކާފައިވާ ވާހަކަތައް ހިމެނޭ އޯޑިޔޯތަކެކެވެ. އެ އޯޑިޔޯތަކުގައި، މިހާރު މިނިވަން ކޮށްފައިވާ އަސީރުން ވަނީ ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫއާއި، އޭނާގެ ސަރުކާރާއި އަސްކަރިއްޔާއަށް ވަރަށް ބޮޑަށް ފާޑު ކިޔާފައެވެ.
އޯޑިޔޯ ކްލިޕްތައް ލީކު ކޮށްލާފައި ވަނީ އިސްރާޢީލުގެ ނޫހެއް ކަމުގައިވާ ވައިނެޓުންނެވެ. މިނިވަން ކޮށްފައިވާ އަސީރުން ބުނީ، އެ މީހުން ރަހީނު ކޮށްގެން ޣައްޒާއަށް ގެންދިޔަ މަގުމަތީގައި ޔަހޫދީ ފައުޖުގެ އަސްކަރީ ހެލިކޮޕްޓަރުތަކުން އެއްވެސް ބެލުމެއް ނެތި އެ މީހުންނަށް އަމާޒުކޮށް ޙަމަލާ ދީފައިވާ ކަމުގައެވެ. އަދި، މި ޙަމަލަތަކުގައި އަސީރުންގެ ތެރެއިން ގިނަ ޢަދަދެއްގެ ބަޔަކު ޒަޚަމުވި ކަމުގައެވެ.
"އަހަރުމެންނަށް އިހުސާސްވީ، އެއްވެސް ބަޔަކު އަހަރުމެން ސަލާމަތް ކުރަން މަސައްކަތް ނުކުރާ ކަން. އަހަރުމެން ފޮރުވާފައި ތިބި ތަނަށް [ޔަހުދީ ފައުޖުން] ދިޔައީ ބޮން އަޅަމުން. [އެ ޙަމަލަތަކުގައި] އަހަރުމެންގެ ތެރެއިން ގިނަ ޢަދަދެއްގެ ބަޔަކު ޒަަޚަމުވި. އަހަރުމެން ޣައްޒާއަށް ގެންދިޔަ މަގުމަތީގައި ވެސް އަސްކަރީ ހެލިކޮޕްޓަރަކުން އަހަރުމެންނަށް ޙަމަލާ ދިން،" އެ ބައްދަލުވުމުގައި ވާހަކަދެއްކި އަންހެނަކު ކިޔައިދިނެވެ.
"އަހަރެމެންނަށް އަމާޒުކޮށް ޙަމަލަ ދިނުމުން ހާމަވީ، [ޔަހޫދީ އަސްކަރިއްޔާއަށް] އަހަރުމެން ތިބި ތަނެއް ނޭނގޭ ކަން. ޖާސޫސީ މަޢުލޫމާތު ލިބިފައިވާ ކަމަށް ކަލޭމެން ދިޔައީ ބުނަމުން. ނަމަވެސް، ކަލޭމެން ދިޔައީ އަހަރުމެން ފޮރުވާފައި ތިބި ތަންތަނަށް ބޮން އަޅަމުން،" އެ އަންހެން މީހާ ބުނާ އަޑު އޯޑިޔޯގައި އިވެއެެވެ. ޙަމާސުން މިނިވަން ކޮށްފައިވާ ބައެއް އަސީރުން ނަތަންޔާހޫއާ ވެސް ބައްދަލު ކޮށްފައިވެއެވެ. އަދި، އެ މީހުން ވަނީ، ނަތަންޔާހޫގެ އަމުރަށް ޣައްޒާގައި ޔަހޫދީ ފައުޖުން ހިންގަމުންދާ އުދުވާންތަކާ މެދު ހިތްހަމަނުޖެހުން ފާޅުކޮށްފައެވެ.
"ބަޔެއްގެ އަތްދަށުވުމަކީ ވަރަށް ހިތްދަތި ކަމެއް. ކޮންމެ ދުވަހަކީ ވެސް ދަތި، އުނދަގޫ ދުވަހެއް. އަހަރުމެން ފޮރުވާފައި ތިބީ ހޮހޮޅަތަކެއްގައި. ނަމަވެސް، އަހަރުމެން ބިރުގަތީ ޙަމާސް ދެކެއެއް ނޫން. އަހަރުމެންގެ ހިތްތަކަށް ބިރުވެރިކަން ވަނީ، [ޔަހޫދީ ފައުޖުން] ހިންގަމުން ދިޔަ އުދުވާނާ ގުޅިގެން. [ޔަހޫދީ ފައުޖުގެ] ޙަމަލަތަކުގައި އަހަރުމެން މަރުވެދާނެ ކަމާ މެދު ބިރުގަތް. އަހަރުމެން މަރައިލުމަށް ފަހު، އެ ކަމުގެ ޒިންމާ ޙަމާސްގެ ބޮލުގައި އެޅުވީސް،" ބައްދަލުވުމެއްގައި ވާހަކަ ދެއްކި އެހެން މީހަކު ބުނާ އަޑު ލީކު ކޮށްލާފައިވާ އޯޑިޔޯ ކްލިޕަކުން އިވެއެވެ.
އޮކްޓޫބަރު 7 ވަނަ ދުވަހު ޙަމާސްގެ މުޖާހިދުން ހިންގި އޮޕަރޭޝަނުގައި ޢައްޒާ ކައިރީގައި ކުރިއަށްދިޔަ މިޔުޒިކް ފެސްޓިވަލެއްގެ ބައިވެރިންނަށް ޔަހޫދީ ފައުޖުން އަމާޒުކޮށް ޙަމަލާތަކެއް ދީފައިވާ ކަން ވެސް އެ ޤައުމުގެ ނޫހެއް ކަމުގައިވާ ހައާރެތްޒްއިން ރިޕޯޓު ކޮށްފައިވާ ކަން ފާހަގަ ކޮށްލަން ޖެހެއެވެ. އެ މިޔުޒިކް ފެސްޓިވަލުގެ ބައިވެރިންނަށް ޙަމަލާ ދީފައި ވަނީ ވެސް ޔަހޫދީ ފައުޖުގެ އަސްކަރީ ހެލިކޮޕްޓަރުތައް ބޭނުން ކޮށްގެންނެވެ.
މީގެ އިތުރުން، ޔަހޫދީ އަސްކަރިއްޔާގެ އިސް އޮފިސަރުންގެ ހުއްދައާ ނުލައި، ޔަހޫދީ ސިފައިން ބަރުހަތިޔާރު ބޭނުން ކޮށްފައިވާ ކަން ވެސް ވަނީ ފަޅާ އަރާފައެވެ. އަސްކަރީ ޓޭންކުފަހަރު ފަދަ ބަރުހަތިޔާރު ބޭނުން ކޮށްގެން ދީފައިވާ ބައެއް ޙަމަލަތައް އަމާޒު ކޮށްފައި ވަނީ، ފަލަސްޠީނުގައި ވަޒަންވެރި ކޮށްފައިވާ ޔަހޫދީ އާބާދީތަކުގައި ދިރިއުޅޭ ޢާންމު ރައްޔިތުންނަށެވެ. ޔަހޫދީ ފައުޖުގެ ބައެއް ސިފައިންގެ މީހުން ދީފައިވާ އިންޓަރވިއުތަކުން މި ކަން ހާމަވެއެވެ.
ޔަހޫދީންގެ ޓީވީ ސްޓޭޝަނެއް ކަމުގައިވާ ޗެނަލް 12 ނިއުސަށް ދިން ބަސްދީގަތުމެއްގައި ޔަހޫދީ އަސްކަރިއްޔާގައި ލެފްޓިނެންޓެއްގެ މަޤާމު އަދާކުރާ ސިފައިންގެ މީހަކު ބުނީ، ޔަހޫދީ ވަޒަންވެރިން ދިރިއުޅޭ ޚުލީތް ކޮމްޕައުންޑަށް ޙަމަލާ ދޭން އެހެން އޮފިސަރަކު އަމަރު ކޮށްފައިވާ ކަމުގައެވެ. އަދި، އެ އަމުރަށް ކިޔަމަންތެރިވުމުގެ ގޮތުން އެ ކޮމްޕައުންޑުގައި ދިރިއުޅޭ ޔަހޫދީ ވަޒަންވެރިންނަށް އަމާޒުކޮށް ވަރުގަދަ ޙަމަލާތަކެއް ދީފައިވާ ކަމުގައި އިންޓަރވިއު ދިން ސިފައިންގެ މީހާ ބުންޏެވެ.
ނަމަވެސް، ޔަހޫދީ ސަރުކާރާއި ޔަހޫދީ ފައުޖުން ދަނީ މި ތުހުމަތުތައް ދޮގު ކުރަން މަސައްކަތް ކުރަމުންނެވެ. އަދި، ޙަމާސްގެ މުޖާހިދުންގެ އަސްކަރީ މަރުކަޒުތަކެއްގެ ގޮތުގައި ޣައްޒާގެ ހޮސްޕިޓަލްތައް ބޭނުން ކުރަމުން ގޮސްފައިވާ ކަމަށް ދައްކަން މަސައްކަތް ކުރަމުންނެވެ. ނަމަވެސް، އެތަކެއް ނޫސްވެރިންނެއް ވަނީ، މި ކަމުގެ ހަޤީޤަތް ހާމަކޮށްފައެވެ. އަދި، ނަތަންޔާހޫގެ ސަރުކާރާއި އަސްކަރިއްޔާއިން ހަޤީޤަތް އޮޅުވައިލަން މަސައްކަތް ކުރަމުންދާ ކަން ހެއްކާ އެކު ހާމަ ކޮށްފައެވެ. ޙަމާސްގެ މުޖާހިދުންނާ ދެކޮޅަށް ކަމަށް ބުނެ ޔަހޫދީ ފައުޖުން ދެމުންދާ ޙަމަލާތަކުގައި، އެ ޖަމާޢަތުން ރަހީނު ކޮށްފައިވާ ގިނަ ޢަދަދެއްގެ އަސީރުން މަރުވެފައިވާ ކަމުގައި ޙަމާސް ޖަމާޢަތުން ވެސް ބުނެފައިވާ ކަން ފާހަގަ ކޮށްލަން ޖެހެއެވެ.