އައްޑޫ ސިޓީގެ ތަރައްްޤީއަށް ސަރުކާރުން ކުރިއަށްގެންދާ ތަރައްޤީގެ އެންމެ ބިޔަ މަޝްރޫޢަކީ އެސިޓީގެ ގިނަ ރައްޔިތުންތަކެއް އިންތިޒާރުކުރަމުންދާ ބިން ހިއްކުމުގެ މަޝްރޫޢެވެ. އެއް ބިލިއަން ރުފިޔާގެ މިމަޝްރޫޢާއެކު އައްޑޫ ސިޓީއަށް ކުރިމަތިވެފައިވާ ބިމުގެ މައްސަލަ ކުރިއަށް އޮތް 50 އަހަރާ ހަމައަށް ޙައްލުވެގެންދާނެކަމަށް ސަރުކާރުން ވިދާޅުވެއެވެ.
ތިރީސް ހާހާއި ގާތްކުރާ އާބާދީއެއް އައްޑޫ ސިޓީގައި އަންނަނީ ދިރިއުޅެމުންނެވެ. އިތުރުވަމުން އަންނަ އާބާދީއަށް ބޭނުންވާ ބިން އެސިޓީގައި ނެތްކަމާއި ތަރައްޤީގެ ޕްރޮޖެކްޓްތައް ހިނގުމަށް އެޅިފައިވާ އެންމެ ބޮޑު ހުރަހަކީވެސް އެސިޓީގައި ބިން ނެތުންކަމަށް އެސިޓީގެ ރައްޔިތުން ބުނެއެވެ. އައްޑޫގައި ބޯހިޔާވަހިކަމުގެ މަޝްރޫޢުތަކާއި، އިޤްތިސާދީ ޙަރަކާތްތައް ކުރިއެރުވުމަށްވެސް އެންމެ ބޮޑަށް ބޭނުންވަނީ ބިންކަމަށް އައްޑޫ ސިޓީގެ ރައްޔިތުން ބުނެއެވެ.
ބިމުގެ ދަތިކަމުގެ މައްސަލައަށް ޙައްލެއް ގެނެސްދިނުމަށް އައްޑޫ ސިޓީގެ ބިން ހިއްކުމަށް ނިންމަވާ އެމަސައްކަތް ރަސްމީކޮށް ފެށުމަށް އަންނަނީ ތައްޔާރުވަމުންނެވެ. އައްޑޫގައި ބިން ހިއްކުމުގެ މަސައްކަތް ކުރަމުން އަންނަނީ، ނެދަލޭންޑްސްގެ ވެންއޫޑް ކުންފުންޏާއި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިކް ކޮމްޕެނީ އެމްޓީސީސީއާއި ޙަވާލުކޮށްގެންނެވެ.
އިންޑިއާއިން ފޯރުކޮށްދީފައިވާ ލައިން އޮފް ކްރެޑިޓްގެ ދަށުން، އައްޑޫގައި 228 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މިއާއެކު އައްޑޫއަށް ކުރިމަތިވެފައިވާ ބިމުގެ ޖާގައިގެ ދަތިކަން ކުރިއަށް އޮތް 50 އަހަރުވެސް އިތުރު މައްސަލައެއް ކުރިމަތިނުވެ ޙައްލުވެގެންދާނެކަމަށް ސަރުކާރުން ވިދާޅުވެއެވެ. މިމަސައްކަތް ކުރާ ވެންއޫޑް ކުންފުނީގެ ޖައްރާފު ވަނީ އައްޑޫއަށްގޮސް، ޓްރައިލް ޑްރެޖިންގެ މަސައްކަތްވެސް ކުރިއަށްގެންގޮސްފައެވެ.
އައްޑޫގެ ބިން ހިއްކުމަށް ކުރިއަށްގެންދާ މަޝްރޫޢުގެ ދަށުން ހިތަދޫގެ ދެ ސަރަޙައްދަކުން 80 ހެކްޓަރު މަރަދޫއާއި މަރަދޫފޭދޫއިން 76 ހެކްޓަރު ހިއްކުމަށްވަނީ ހަމަޖެހިފައެވެ. އަދި ހުޅުމީދޫގައި 32.3 ހެކްޓަރުގެ ބިން އެމްޓީސީސީއާއި ޙަވާލުކޮށްގެންވެސް ހިއްކުމަށްވެސްވަނީ ހަމަޖެހިފައެވެ. މީގެއިތުރުން އައްޑޫގެ ފަތުރުވެރިކަން ކުރިއެރުވުމަށް އެސިޓީގެ ރަށްރަށުގެ ފަޅުތައް ހިއްކައިގެން 8.3 ހެކްޓަރުގެ 3 ރަށް ހިއްކުމަށްވެސްވަނީ ނިންމާފައެވެ.
އައްޑޫގައި ހިއްކާ ރިސޯޓު ތަރައްޤީކުރުމަށް ނެދަލޭންޑްސްގެ ކުންފުނިން 3 ރަށް ހިއްކަމުން އަންނައިރު، އެމްޓީސީސީން 5 ހެކްޓަރުގެ 2 ރަށެއް ތަރައްޤީކުރުމަށްވެސް ވަނީ ހަމަޖެހިފައެވެ. އައްޑޫގައި ހިއްކާ ސަރަޙައްދު ޙިމާޔަތްކުރުމަށް 11 ކިލޯމީޓަރުގެ ސަރަޙައްދެއް ޙިމާޔަތްކުރުމަށްވެސް ވަނީ ހަމަޖެހިފައެވެ.
އައްޑޫ ސިޓީ ކައުންސިލުން ބުނާގޮތުން ބިން ހިއްކުމުގެ މަސައްކަތުގެ ކުރިން ހަންކެޑެ ސަރަޙައްދުގައި އަޅާ ބްރިޖު، މަރަދޫއާއި ގުޅާލާ ސަރަޙައްދަށް ބޭނުންވާ ބިން ހިއްކުމުގެ ބޮޑުބައެއް މިހާރުވަނީ ނިމިފައެވެ. އަދި ބިން ހިއްކުމުގެ މަސައްކަތަށް ބޭނުންވާ ހުރިހާ ސަރވޭއެއްގެ މަސައްކަތް މިހާރު ނިމިފައިވާކަމަށް ސަރުކާރުން ވިދާޅުވެއެވެ.
މި މަޝްރޫޢު ސަރުކާރުން ކުރިއަށް ގެންދަވަނީ ތިމާވެއްޓަށް ލިބޭ ގެއްލުން ވީހާވެސް ކުޑަވާނެ ގޮތަކަށެވެ. ހިއްކާ ސަރަހަައްދުތަކުން މިގޮތުން މިހާރުވެސް 24000އަށްވުރެ ގިނަ މުރަކަ އެހެން ސަރަޙައްދުތަކަށް ބަދަލުކޮށްފައިވާ ކަމަށް އައްޑޫ ސިޓީ ކައުންސިލުން ވިދާޅުވެއެވެ. އަދި ބިން ހިއްކާއިރު އެސަރަޙައްދުގައި ކިސަޑު ފެތުރުން މަދުކުރުމަށް ބަންޑްވޯލް ޖަހާފައެވެ.
ރާއްޖޭގައި ދެވަނައަށް އެންމެ ބޮޑު އާބާދީއެއް އޮތް ސަރަޙައްދަކީ، ރާއްޖޭގެ އެންމެ ދެކުނުން އައްޑޫ ސިޓީގައެވެ. ކުރީ ސަރުކާރުތަކުން އައްޑޫގެ ތަރައްޤީއަށް މާބޮޑު ސަމާލުކަމެއް ދީފައި ނުވިނަމަވެސް، ރައީސުލްޖުމްހޫރިއްޔާ އިބްރާޙިމް މުހައްމަދު ސާލިހުގެ ސަރުކާރުން ޤަބޫލުކުރައްވާ ގޮތުގައި އައްޑޫ ސިޓީ ތަރައްޤީނުވެ މުޅި ރާއްޖެ ތަރައްޤީވެގެން ނުދާނެއެވެ. އެހެންކަމުން 1.6 ބިލިއަން ރުފިޔާ ޚަރަދުކުރައްވައިގެން އައްޑޫ ސިޓީ ބިން ހިއްކަން ކުރިއަށްގެންދާ މަޝްރޫޢުއަކީ އައްޑޫގެ އިތުރުން އެކަމުގެ އިޤްތިޞާދީ ފައިދާ ރާއްޖޭގެ އިޤްތިޞާދަށްވެސް ކުރާނެ ތަރައްޤީގެ މުހިއްމު މަޝްރޫޢެކެވެ.