ރަމަޟާން މަހާއި ދިމާކޮށް، މަކަރާއި ހީލަތުން ރޯދަ ހަދިޔާ ދިނުމަށްކަމަށްބުނެ ލިންކުތަކެއް ދައުރުކުރަމުންދާތީ ސަމާލުވުމަށް ފުލުހުން އިލްތިމާސްކުރައްވައިފިއެވެ.
ފުލުހުން ވިދާޅުވީ، އެކި ކުންފުނިތަކުގެ ފަރާތުން ރަމަޟާން މަހާއި ދިމާކޮށް ކުރިއަށްގެންދާ އެކިއެކި އިނާމް ލިބޭ ޕްރޮމޯޝަންތަކުން އިނާމް ލިބެނީ ލިންކު މެދުވެރިކޮށްކަމަށްބުނެ ލިންކުތައް ފޮނުވަމުންދާކަމުގެ މަޢުލޫމާތު ލިބެމުންދާކަމަށެވެ. އެހެންކަމުން މިފަދައިން ލިބޭ ލިންކުތަކަށް ކްލިކްކޮށް، އޭގައި ހިމެނޭ ޒާތީ މަޢުލޫމާތުތައް ފުރަމުން ނުދިޔުމަށް ފުލުހުން އިލްތިމާސްކުރެއެވެ. އަދި ޝައްކުކުރެވޭ މިފަދަ ލިންކެއް ލިބިއްޖެނަމަ އެކަން ފުލުހުންނާއި ހިއްސާކުރުމަށްވެސް ފުލުހުންވަނީ އެދިވަޑައިގަންނަވާފައެވެ.
#ScamAlert: Fraudulent links are being circulated promising Ramadan gifts in the name of various companies. Beware and do not fall prey to these scams. Report any suspicious links to @policemv immediately. Stay safe and protect your personal information. pic.twitter.com/z2Bn9U4O9u
— Maldives Police (@PoliceMv) April 1, 2023
ރަމަޟާން މަހާއި ދިމާކޮށް ކޮންމެ އަހަރަކުވެސް އެކި ކުންފުނިތަކުން އަދި ވިޔަފާރިތަކުން އެކި އިނާމް ލިބޭ ޕްރޮމޯޝަންތައް ކުރިއަށްގެންދެއެވެ. އެހެންނަމަވެސް މިފަދަ ޕްރޮމޯޝަނެއްގައި ބައިވެރިވުމުގައި އިނާމު ލިބޭ ގޮތާއި އަދި އިނާމު ލިބުމުން އެކުންފުންޏަކުން ޢަމަލުކުރާ އުސޫލު ބެލުމަކީ ޕްރޮމޯޝަންގައި ބައިވެރުވުމުގެ ކުރިން ބެލުން މުހިއްމުކަމެކެވެ.
ތިމާ ބައިވެރިނުވާ ޕްރޮމޯޝަނަކުން އިނާމު ދޭކަމަށް ބުނަނީ އޮޅުވާލުމަށްކަން ދަންނަންޖެހެއެވެ. ކުންފުނިތަކުގެ ނަމުގައި ފޮނުވާ ލިންކުތަކާއި، ކުރާ ސްކޭމް ކޯލްތަކުގައި އަމިއްލަ ޒާތީ މަޢުލޫމާތު ހިއްސާ ނުކުރުމަށް ކަމާބެހޭ ފަރާތްތަކުން އަންނަނީ ތަކުރާރުކޮށް އެދެމުންނެވެ.