ޏ.އަތޮޅު ފެމިލީ އެން ޗިލްޑްރަން ސަރވިސް ސެންޓަރުގެ އާ އިމާރާތް ހުޅުއްވައި މިއަދު އެތަނުގައި ޚިދުމަތްދޭން ފަށްޓަވައިފިއެވެ.މިނިސްޓްރީ އޮފް ލޯ އެންޑް ޖެންޑާރގެ ބެއްލެވުމުގެ ދަށުން ހިންގަވާ މި ސެންޓަރުގެ އާ އިމާރާތް މިއަދު ފުވައްމުލަކުގައި ހުޅުވި ނަމަވެސް ދެހާސް ހަތްވަނަ އަހަރުން ފެށިގެން އެރަށުގައި އަންނަނީ އެ ސެންޓަރުން ދެއްވާ ޚިދުމަތްތައް ފޯރުކޮށްދެއްވަމުންނެވެ. އެހެންނަމަވެސް ޚިދުމަތް ދިނުމުގައި ދަތިތަކެއް ހުރުމާއެކު އަދި މި ޚިދުމަތް ދިނުމުގައި ސަރުކާރުން ގެންގުޅުއްވާ ސިޔާސަތު ފުރިހަމަކުރެއްވުމަށް ބޭނުންވާ ވަސީލަތާއި އުމްރާނީ ތަރައްޤީތައް ގެނައުމަށް ގިނަ މަސައްކަތްތަކެއް ގެންދަވަނީ ކުރައްވަމުންނެވެ. އެގޮތުން ބައެއް އަތޮޅުތަކުގައި ސެންޓަރުތައް ޤާއިމު ކުރެވިފައިވާއިރު، ބައެއް އަތޮޅު ތަކުގައި މި ޚިދުމަތް މަޑުޖެހިފައިވާކަމަށް ޖެންޑަރ މިނިސްޓްރީން މަޢުލޫމާތުދެއްވައެވެ.ފުވައްމުލަކުގައި މިއަދު ހުޅުވި އިމާރާތުގައި އޮފީސްބަޔަކާއި މީޓިން ރޫމެއްގެ އިތުރުން ޗައިލްޑް ފްރެންޑްލީ ރޫމަކާއި ސައިކޯ ސޯޝަލް ސަޕޯޓް ދޭނެ ތަނެއް ހުރެއެވެ.އާ އިމާރާތް މިއަދު މެންދުރު ހުޅުއްވައިދެއްވާ ވާހަކަފުޅު ދައްކަވަމުން ބަންޑާރަ ނައިބު އަދި މިނިސްޓްރީ އޮފް ލޯ އެންޑް ޖެންޑަރ ހިންގުމާ ހަވާލުވެހުންނެވި އަލްއުސްތާޛު މުޙައްމަދު އަނިލު ވިދާޅުވީ، މިއަދު ހުޅުވި އިމާރާތާއެކު މިހާރު އެ ސެންޓަރުން ފޯރުކޮށްދާ ޚިދުމަތް އިތުރަށް ހަރުދަނާވެ ފުރިހަމަވާނެކަމަށެވެ. އަދި ނަމޫނާ ޚިދުމަތްތަކެއް ފޯރުކޮށްދެއްވާ ތަނަކަށްވާނެކަމަށްވެސް އެމަނިކުފާނު ވިދާޅުވިއެވެ. މިތަނަކީ ހަމައެކަނި މައްސަލަތައް ހުށަހަޅާ ތަނެއްގެ ބަދަލުގައި ޚިޔާލު ހޯދުމާއި މަޝްވަރާ ލިބިގަންނަ ތަނަކަށް ހެއްދެވުމަށްވެސް ރައްޔިތުންގެ ކިބައިން އަނިލް އެދިވަޑައިގެންނެވިއެވެ.